出街食都可以食得健康啲！呢間意式餐廳Homeland嘅大埔本店一直受歡迎，皆因主打無味精菜式，而且會融入fusion口味，並引入世界各地嘅特色料理，健康得嚟又提供多元化選擇。餐廳最近選址荃灣開新店，佈置充滿藝術感，如天花有大量乾花，又以唔同風格嘅牆畫、掛畫作裝飾，色彩繽紛，好啱鍾意嘆美食同時打卡嘅朋友仔。
鮮打法式龍蝦湯
餐廳嘅菜式擺盤幾IG-able，好似呢個鮮打法式龍蝦湯，配嘅多士放上法國龍蝦仔肉、食用花、蘆筍等，有啲fine dining嘅感覺。湯底更用10斤龍蝦頭、30至35斤梭羅魚、池魚仔等新鮮魚仔同蝦熬煮4個鐘，鮮味濃郁。
鮮打法式龍蝦湯
馬德里式燉牛肚配多士
至於開胃小菜，不妨試下西班牙常見嘅菜式——馬德里式燉牛肚配多士。牛肚先以香葉、黑椒煲3個鐘至腍身，再將新鮮西班牙辣肉腸、洋蔥、蒜頭炒香兼逼出油分，再加入番茄、藏紅花、多款蔬菜同牛肚一齊燉煮3個鐘。味道酸爽開胃，牛肚經長時間烹調亦好易咬開。
馬德里式燉牛肚配多士
墨西哥夾心薄餅（雞肉/豬肉）
如果想試新派啲嘅薄餅，墨西哥夾心薄餅就啱你喇。本身帶鹹味嘅墨西哥捲餅皮，做成夾餅款式嘅薄餅，內餡有雙色車打芝士、燈籠椒，再自選雞肉或豬肉，咬落幾煙韌；想fresh啲可以蘸少少酸忌廉或牛油果醬。
墨西哥夾心薄餅配嘅牛油果醬，加入檸檬汁調味，微酸幾開胃
手工肉醬芝士四重奏薄餅
另外薄批嘅手工肉醬芝士薄餅則推出2.0版本，以前嘅肉醬偏港式口味，新版則偏東歐風味，加入較多當地嘅香料，鹹中帶辣，番茄味會輕啲。另外芝士亦由3款增加至4款，包括雙色車打芝士、Mozzarella同巴馬臣芝士。
手工肉醬芝士四重奏薄餅
招牌桂花釀啤酒雞
肉食控唔可以錯過嘅菜式，有呢款2.0版本招牌桂花釀啤酒雞！今次特別喺話梅啤酒加入桂花蜜，然後做法不變，連同用多款新鮮蔬菜、香料製成嘅蔬菜水一齊浸泡雞隻，並將醃汁注入雞肉，抽真空醃3日至入味。雞隻表面有辛辣香料，燒起後焦香惹味，而盤底嘅蔬菜吸收燒雞時逼出嘅精華，沾滿肉香𠻹。
招牌桂花釀啤酒雞
蒙古風孜然麥芽糖羊膝
澳洲當地人食羊肉，流行配蒙古汁加甜味，但香港比較少見，所以師傅特別炮製呢款fusion口味畀大家試一試。紐西蘭羊膝用蒙古汁加蜜糖燘煮約3個鐘，軟腍到唔使太用力就切得開，入口微甜，帶少少孜然香氣。而圍邊嘅薯蓉伴上唔同顏色嘅蔬菜，好似花圈咁靚，打卡啱晒。
蒙古風孜然麥芽糖羊膝分量十足，可以2-3個人share
香煎西班牙伊比利亞豬肩肉
鋸扒除咗牛肉，豬肉都係唔錯嘅選擇。西班牙伊比利亞豬肩肉扒，每份約8安士，先低溫慢煮1個鐘再煎香，鎖緊肉汁同時保持軟腍口感；配上薯蓉、椰菜仔、甘筍等蔬菜，飽肚又解膩。
香煎西班牙伊比利亞豬肩肉
泡菜伊比利亞豬肩漢堡
而鋸扒之外，師傅重將豬肩肉製成韓式fusion漢堡包。原條豬肩先慢煮15個鐘，再刨成薄片，每份約有4安士肉，配上泡菜、雙色車打芝士、洋蔥等配料，口感豐富。
泡菜伊比利亞豬肩漢堡配上粗直薯條
伊比利亞火腿卡邦尼意粉
呢道卡邦尼意粉，底味同配料都上用伊比利亞火腿！師傅以20副西班牙火腿骨加火腿肉，熬煮3日製成骨湯，再用嚟炒意粉，散發獨特鹹香味。食嘅時候破開溫泉蛋，撈埋蛋汁同西班牙白毛豬火腿一齊食，入口creamy又惹味。
伊比利亞火腿卡邦尼意粉
招牌西班牙海鮮炒飯
如果你係飯控，可以試下呢個招牌西班牙海鮮炒飯，有大大隻阿根庭赤蝦、日本八爪魚、蜆同青口等餸料；飯底則由意大利米改用珍珠米，加入辣肉腸、番茄、藏紅花等材料同龍蝦湯煮成，集香甜同鮮味於一身。
招牌西班牙海鮮炒飯
Homeland精選全日早餐
輕食朋友好多時會揀嘅全日早餐，呢度都有供應。精選全日早餐嘅沙律菜，加埋先焗後炒嘅雜菇、太陽蛋、煙三文魚、牛油果、煙肉等餸料都幾大份。
Homeland精選全日早餐伴上欖油果醋解膩