茶餐廳一向係香港本土文化,坐低快、狠、準就食到碟頭飯同凍奶茶。可能大家都逐漸只求快,開始忽略咗食物質素。Lab Eat餐飲集團就以多年精緻西餐經驗,開設著重手藝鑊氣嘅茶餐廳Missy Cafe,每日午市料理都唔同;晚市仲有零味精燉湯送𠻹。
Missy Cafe特別邀請有25年川菜及港式菜經驗,並擁超過10年中菜及東南亞菜經驗—胡明光主廚坐陣。利用曾任米芝蓮餐廳經驗,設計一系列地道精美料理、小食,好似搵返細細個喺茶餐廳食到好滿足嘅感覺。
胡明光主廚有多年入廚經驗,曾任米芝蓮餐廳。
環境有別一般茶餐廳,木系典雅氣氛坐得舒服。
【本土必食】
Missy Cafe利用多年西餐經驗,將本土雞髀薯條、焗豬飯、西多士融入精美擺盤、外國食材,可以話係非一般茶餐廳呀。
雞髀薯條
呢度嘅生炸雞髀成隻手掌咁大~即叫即炸,外皮金黃勁脆,一咬落去真係會爆出肉汁。估唔到雞髀咁大隻,肉質仲keep到好彈牙。
平時喺茶餐廳食第一件薯角,都好驚食到雪味或好粉。Missy Cafe唔知係咪有西餐經驗,薯角真係食到扎實薯仔口感,好加分。
生炸雞髀有手掌咁大。
雞髀肉仲keep到好嫩。
蝦多士
好多地方都食唔到懷舊蝦多士喇~今次師傅用fusion做法重現獨特酥脆口感。用法包取代白麵包,加埋大蝦酥脆又鮮甜,啲芝士仲會拉絲㗎。
蝦多士換上法包,又係另一種酥脆煙韌感。
拉絲焗豬扒飯
估唔到焗豬飯咁大碟!上層鋪滿番茄、芝士微焦,一舀起就極級拉絲~好欣賞番茄汁唔係死甜,係食到淡淡番茄鮮甜。主角豬扒好大件厚肉,咬落好鬆化有肉感,食得出唔係行貨。
豬扒好大塊,厚肉之餘好鬆化。
滿滿芝士好邪惡。
西多士心太軟
西多望落普通,但一切開即刻爆出澎湃朱古力醬~加埋蜜糖同牛油好香濃輕脆,根本就係fusion甜品,女生一定鍾意。
西多士好厚身。
一切開即爆出朱古力醬。
【主廚推介】海南雞飯
主廚曾任米芝蓮新加坡餐廳,出自佢手嘅海南雞飯當然唔普通。原雞係用十幾種材料浸熟,雞肉都好入味軟嫩。
3款醬汁入面,我自己最鍾意沾「雞飯豉油」食~豉油加咗浸雞嘅精華,食落又香又有肉味。油飯就自家用香茅、薑、雞油煮製,鹹香有層次。
主廚拿手海南雞飯,原雞用十幾種材料浸到入味。
【暴露年齡系列】
魚翅撈飯
香港8、90年代嗌個魚翅撈飯係身份象徵嚟㗎~而家嚟呢度食都只係$118,就可以感受到呢種香港味。
魚翅撈飯唔係得個名,真係用足料牙揀翅、花膠、花菇上湯煮製。牙揀翅翅針多又軟滑,配埋大大件花膠好有口感,份量真係夠撈飯㗎。
松子魚
松子魚其實係好出名嘅粵菜,但因為手工繁複坊間比較少見喇。原條魚即叫即炸,魚肉酥脆嫩滑,最後淋上甜酸汁撈飯一流~食嗰陣魚肉仲好脆口㗎。
【最緊要飲杯奶茶】
好多人都係為咗杯奶茶去茶餐廳~所以呢度嘅奶茶都好講究,係師傅人手拉茶,特別柔滑有茶香。
每杯奶茶都係手工拉茶。
除咗平時必飲嘅奶茶、檸茶,呢杯「華田暴龍脆脆」都好人氣!華田味超濃郁~唔知你有無就咁食華田粉嘅童年回憶呢,叫呢杯可以重溫喇(笑)。
大小姐冰室
地址: 北角英皇道165-175號公主大廈01及10-13號地舖
電話: 28877087