想跳出香港但又飛唔到，不如跳出舒適圈試下啲平時比較少機會食到嘅菜系，例如今次介紹嘅黎巴嫩菜！黎巴嫩菜嘅特色係採用新鮮食材配搭香草，味道清爽細膩。位於東涌嘅Maison Du Mezze就由黎巴嫩人主理，只用上乘新鮮材料，絕不添加味精或者雞粉等。加上有坊間少見嘅真·炭爐，無論係烤海鮮定肉類都帶獨特嘅炭香。
【開心Share！】終極木炭烤肉拼盤
廚房設炭爐烤製正宗黎巴嫩烤肉串，令所有食材增添淡淡焦香
一班人最啱點超大份嘅Maison Du Mezze Ultimate Mix Grill，一邊傾計一邊Share嚟食，好似去咗朋友屋企咁自在。裡面有齊羊肉、牛肉同雞肉，而且仲會有Kofta、即係碎肉混合香料等製作而成嘅肉串，口感特別鬆軟。烤肉以多款香料、檸檬、蒜頭、乳酪等醃製過，帶出肉香又夠惹味。
Maison Du Mezze Ultimate Mix Grill
慢煮12小時 嫩滑烤BB羊
黎巴嫩菜講求天然同健康，菜式都以展現食材原味為主，所以食材本身嘅質素就非常重要。好似呢道烤羊肩肉就特別選用西班牙乳飼BB羊，初生羊肉質零舍細嫩，羊羶味亦較淡。經過12小時慢烤後，更係輕輕叉開就好似個名咁講骨肉立即分離！外皮焦脆，肉嫩多汁。
Falling off the Bone Lamb Shoulder
肉味香濃頂級肉眼
炭烤肉眼扒同樣係各位食肉獸必點，挑選美國最高級別嘅Prime Grade（極佳級）肉眼，而且用帶豐富油花嘅肉眼，係最啱炭烤嘅部位！燒走多餘油分，帶出陣陣脂香但唔油膩，口感柔軟而不失彈性，肉味濃郁。
Chargrilled Ribeye
烤海鮮一樣出色！
黎巴嫩位於地中海東岸，盛產蔬果同海產，正宗黎巴嫩菜亦自然唔少得各款烤海鮮。推介呢碟炭烤西班牙海鱸魚，簡單以橄欖油同香草香煎，魚肉細嫩緊緻，加上檸檬汁味道更清新解膩。
Charcoal Grilled Fish Sea Bass
烤八爪魚鬚肉質彈牙而唔會韌，以橄欖油、蒜頭、橄欖、日曬蕃茄乾帶出鮮味。特別係日曬蕃茄乾香氣更濃縮，配搭橄欖油又令酸味更溫和，開胃同時唔會蓋過八爪魚原味。
Char Grilled Octopus Leg
其他炭烤菜式推介
Chargrill Lamb Cutlets
Kofta Kashkash
Grilled Tiger Prawns
前菜Mezze 超多冷/熱選擇
食黎巴嫩菜會發現有好多Mezze、即係餐前小菜或者開胃菜，冷盤Mezze以鹰嘴豆泥（Hummus）、沙律為主，熱食就以惹味、香口小食為主。
黎巴嫩經典沙律選用原種番茄（Heirloom Tomato），即係無配種、最原始嘅番茄品種，大細顏色各異，茄味突出又更香甜。配搭青瓜、彩椒、石榴，再撒上新鮮番茜、薄荷、鹽膚木粉同紅石榴汁，最後以脆片點綴，味道同口感都好豐富而又唔Heavy。
Fattoush Salad
鹰嘴豆泥都可以有好多變化，呢個鹰嘴豆泥拼盤就有四款口味，最特別嘅係粉紅色嘅Hummus Shamender，其實係用紅菜頭嘅天然色素上色，味道亦多咗份清甜。而Truffle Hummus就有濃郁黑松露香氣！大廚更特別教大家，撕開附上嘅Homemade Pita Bread後用手將麵包捏成貓耳狀蘸Hummus，用手食唔用刀叉先係地道食法！
Mix Hummus Platter
另一推介就係Mix Cold Mezze，一次過可以試到四款Mezze：鷹嘴豆蓉、炭烤紅椒核桃蓉、煙燻茄子乳酪蓉、新鮮薄荷乳酪黑松露蓉。鷹嘴豆蓉同新鮮薄荷乳酪黑松露蓉味道較淡，後者加入薄荷味道清爽。煙燻茄子乳酪蓉會多一重煙燻香氣，橙紅色嘅炭烤紅椒核桃蓉就味道最濃郁，微辣惹味。
Mix Cold Mezze
Creamy Burrata Cheese
Hummus Kawarma
Samka Harra
特設雞尾酒吧 最啱Happy Hour
想Chill嘅時候好啱飲返兩杯，酒吧以墨綠色為主調，配搭雲石吧枱同木櫃，感覺溫暖舒適。Cocktail同Mocktail選擇多元化，Sip & Savour以蘇格蘭威士忌為基底，混合海鹽焦糖、檸檬汁等，配埋爆谷更突顯酒香。Ain’t Nuttin就以牛奶、椰奶、肉荳蔻、榛子糖漿調配而成，再灑上烤椰子脆片，香氣層次豐富。
Sip & Savour
Ain’t Nuttin
餐廳採光度高，加上植物擺設，氣氛輕鬆寫意
特設戶外座位，感覺特別悠閒
Maison Du Mezze
地址: 東涌怡東路9號香港東涌世茂喜來登酒店地下G10號舖
電話: 2330 0131