拎完消費券心郁郁想食好嘢，即刻mark低餐廳優惠更抵～慳埋慳埋可以食多餐好㗎。主打西式fusion菜嘅"Lab Eat" ，即日起至11月前全單8折！輕鬆食生蠔、鵝肝唔驚out budget。
旺角店以木系、藍色為主調，一整排落地玻璃好開揚，氣氛活潑輕鬆好啱閨蜜約會。今夏特別加入熱情果元素，酸酸甜甜好有夏日氣氛。
尖沙咀分店掛滿畫作，微光下更有氣氛，約會同慶祝重要日子一定要試！
消費券優惠！
即日起至11月前，全單享8折 |
墨西哥熱情果辣椒海鮮沙律
好少見前菜沙律咁靚咁大盤！上層係熱情果醬加新鮮士多啤梨、藍莓、紅石榴等，輕甜清新～單獨食或撈埋下層沙律食都好好味。
下層就有5款時令海鮮，今次有刺身級三文魚、刺身級帶子、燒大蝦等，配埋各種水果、牛油果同沙律菜，再加少少辣椒好香口，作為前菜真係誠意滿分。
超滿水果、牛油果同海鮮，作為前菜沙律好豐富。
極厚切鵝肝！配香茅青檸茉莉
鵝肝都好有夏天fu～特配香茅青檸茉莉，清新解膩。呢度嘅鵝肝堅持極厚切，因為咁先做到外層焦香；一咬開內裡又好軟嫩油香。
鵝肝好厚切，一定食到外焦內嫩口感。
法國新鮮生蠔
生蠔係直接向法國訂購運到，即叫即開勁新鮮！配埋特調生蠔汁，清爽又爆出海水味，好啱作為夏天頭盤。
直接法國訂購生蠔，每隻都好肥美。
招牌菜！西班牙紅蝦番茄意大利粉
嚟到必食嘅意粉！番茄特由意大利西西里島引入，再加入其他材料熬煮6小時，醬汁濃郁鮮甜，滿滿茄紅素好健康～
呢道意粉嘅主角，不得不提西班牙紅蝦。本來紅蝦身價已好高，大廚更用當地最高級嘅紅蝦。以高溫煮至4成熟啱啱好，蝦味同蝦膏都勁濃，真係有驚喜。
必試招牌菜，爆膏紅蝦好驚喜。
澳洲M6和牛斧頭扒
個人比較鍾意澳洲和牛，有日本和牛油香之餘，牛味亦好濃。大廚特別以低溫慢煮、高溫炭燒方法，可以鎖住肉汁、外層又有炭香。
講真呢道斧頭扒真係勁大件足料，約定幾個牛控friend一齊share好正。
勁大件澳洲M6和牛斧頭扒！
熱情果甜品拼盤
呢個甜品拼盤好IGable呀！上層熱情果不斷散出仙氣；下層則有多款甜品師傅手工甜品，一次過食到咁多夏日水果、甜品，CP值真係好高。
多款法國蛋糕、法式焦糖燉蛋都係自家製，享用每件蛋糕之間可以熱情果清清味蕾。
甜品拼盤好IGable，每款手工甜品之間可以熱情果清味蕾。
甜品師傅親手製作，多款蛋糕甜點。
【國際調酒師特選】夏日紅白酒
"Lab Eat"嘅國際調酒師，更特地為夏天揀選紅白酒。點菜時可叫員工為你推薦匹配你料理嘅餐酒，令整個用餐過程更圓滿。
國際調酒師特別引入，適合夏天飲嘅紅白酒。
【多款特調雞尾酒】
夏天想飲得清甜微酸啲，一試調酒師用熱情果設計嘅新口味。
Sneaking Around
新鮮熱情果嘅獨特果香、酸味，撞上波本威士忌嘅複雜溫和酒體，一嚐果香同烈酒融合，味道好獨特。
Welcome Summer
當熱情果遇上英式奶茶，熱情果嘅輕酸令英式茶香更有層次，口感柔滑香純好獨特。
