放假去屯門,唔少得到三聖墟海鮮市場,買完生猛海鮮就可以嚟「棠記海鮮小廚」搵師傅幫你煮!唔單止你想點整就點整,從豉油王、避風塘、開邊蒸、豉椒炒等,都可以滿足到;而且師傅非常用心,部分醬料更係自家調配、加上鑊氣足,風味只此一家。
喺香港提到食海鮮,唔少得保留漁港風情嘅三聖墟,集合十幾個海鮮檔,有多款時令海鮮任揀。因此附近嘅棠記海鮮小廚就提供自來海鮮加工服務,明碼實價加工費海鮮每款每斤$75,揀啱煮法然後就可以坐低等食。餐廳環境闊落,裝修走家常平實路線,最緊要係夠乾淨企理。
外脆內鮮 即炸脆皮鮑魚
唔少客人嚟棠記都會點脆皮炸鮑魚,問過負責人先知,原來秘訣在於一定要生炸,而且要炸至七至八成熟而唔係全熟,咁樣先唔會流失鮑魚肉汁,食落特別鮮甜彈牙!脆漿亦經過特別調配,口感輕盈酥脆唔油膩,最後灑上少少椒鹽提鮮夠惹味。鍾意食辣嘅朋友可以加埋辣炸蒜乾,香氣加倍。
脆皮炸鮑魚
「芝」味十足 兩款芝士龍蝦推介
肉厚爽脆嘅龍蝦亦係唔少海鮮控嘅首選,經典嘅芝士龍蝦伊麵呢度亦做得好有水準。選用車打芝士等三款唔同種類嘅芝士製作三色芝士汁,加埋龍蝦同伊麵焗至金黃色。伊麵吸收咗龍蝦嘅鮮味,再撈埋芝士汁一齊食真係無得輸。
芝士龍蝦伊麵
想芝士香再濃郁啲?咁就要嗌脆皮芝士焗龍蝦!同樣用三色芝士配搭新鮮龍蝦,唔同嘅係會將芝士焗至焦香形成脆面,未食先聞到芝士香,每啖食到嘅芝士醬分外濃郁有「芝」味,同彈牙嘅龍蝦肉係絕配。
脆皮芝士焗龍蝦
自選烹調方法 食盡海鮮鮮味
問過餐廳負責人,大部分加工方法只要客人提出都會盡量做到,好似新鮮大蝦可以做黃金、茄汁炒、椒鹽、避風塘、開邊蒸等等,其中一個推介就係豉油王。簡單用蒜蓉、乾蔥、蔥花爆香,重點係加入秘製豉油王醬汁大火快炒,鑊氣十足,亦保留蝦肉彈牙口感!
豉油王大蝦
蟶子肉質爽口,本身味道較淡,所以可以用豉椒炒,加埋三色椒、洋蔥等,襯托出蟶子嘅鮮甜。煎米粉亦係一大亮點,同坊間一般嘅食到會黐牙嘅炸米粉唔同,呢度真係由師傅用心將每塊米粉煎到外脆內軟,吸收晒醬汁精華又有咬口。
豉椒蟶子煎米粉底
必點巧手小炒 招牌鹹鵝、拔絲咕嚕肉
估唔到海鮮街嘅餐廳裡面,鹹鵝都做得幾出色。負責人笑指因為附近餐廳都有賣燒鵝,佢哋想特別啲就做鹹鵝。佢哋嘅鹵水偏白鹵水風格,食落帶淡淡酒香同鹹鮮。皆因自家鹵水加咗酒同新鮮蝦殼熬製,而且每隻鵝都會鹵至少90分鐘至完全入味,香氣層次豐富唔死鹹。
招牌鹹鵝
就算係平時唔打卡嘅朋友,見到呢碟賣相別緻菠蘿咕嚕肉都會忍唔住相機食先!師傅特別揀用新鮮金菠蘿,起完果肉然後再輕燒,令菠蘿食落更香甜、更多汁。而咕嚕肉選用新鮮豬腩肉,炸至金黃香脆後用自家咕嚕醬汁炒過,酸甜開胃,更有脆皮拔絲嘅效果!
菠蘿咕嚕肉
送飯之選仲有招牌小炒皇,用蝦乾、蝦仁、魷魚、腰果、韭菜花一齊爆炒。當中更有大銀魚乾同自家秘製XO醬,大銀魚乾鮮甜、口感有嚼勁,XO醬用料有誠意、特別加入蝦子提鮮,令呢道小炒皇更香口。
招牌小炒皇
餐廳寬敞,以中式圓枱為主,乾淨企理
棠記海鮮小廚
地址: 屯門三聖村豐漁樓地下10-11號
電話: 24580636