如果你鍾意歐洲古典風，一定有留意INN Group旗下多間華美風cafe，尖沙咀“Royal INN”就係其中一間喇。呢度仲將成個凱旋門搬埋嚟，更有古典水晶燈、法式花店充滿法國小鎮vibe。
凱旋門好搶眼，全店洋溢法國小鎮vibe。
室內環境典雅浪漫，戶外露天庭園又係另一種輕鬆氛圍。適逢春夏，可以享受陽光微風下飲咖啡chill吓。
戶外景觀開揚，慢食傾計好chill。
不過呢度都唔只得咖啡飲㗎～大廚擅長傳統法國菜，主打海鮮、肉扒，招牌菜海鮮冷盤、威靈頓羊架都好受熟客歡迎。精緻法國料理加埋浪漫環境，好似飛咗去法國食飯咁，好啱約會、聚餐同慶祝特別日子。
【必食人氣菜式】
鮮牛肉他他
雖然叫牛肉他他，但原條半開牛骨髓超搶鏡！入面有新鮮牛肉、香烤牛骨髓，入口有滿滿肉香同油香～口感滑嘟嘟，好似每啖都補充緊膠原蛋白咁呀。
香煎原隻美國野雞仔
美國野雞仔啲肉好嫩，一搣開已經見到好多肉汁！配埋松露汁同炒野菌，未食已經聞到好香。
炭燒安格斯平鐵牛扒(8oz)
如果你鍾意有咬口、肉味嘅牛扒，一定要試平鐵牛扒(Flat Iron)。呢個係牛肩膀最嫩嘅位，口感紮實帶軟嫩，肉味愈食愈濃，8oz大份量絕對滿足。
西班牙黑毛豬胺架
講到黑毛豬，不得不提西班牙伊比利亞，係最頂級之一嘅黑毛豬嚟。嚴謹嘅飼養過程，令黑毛豬充滿油香同獨特果仁味。黑毛豬煎到粉粉嫩嫩，唔會太熟太韌，肉質仲好鬆軟。
波士頓龍蝦西班牙海鮮飯
西班牙海鮮飯好足料～除咗有新鮮活波士頓龍蝦、青口、大蜆等海鮮，仲有你可能錯過嘅矜貴香料—藏紅花。其獨特麝香味、微酸好突出海鮮甜味，具存在感又唔會遮蓋海鮮主角，係呢道經典料理必不可少嘅香料。但藏紅花相當矜貴，一定要人手採摘且過萬朵花先有約100克，真係要食真啲呀。
【IGable雞尾酒】
多款雞尾酒都加咗水果元素，清爽酒香好啱春夏微醮。
I'm NOT the Classic Sangria
相信大家對西班牙水果酒Sangria唔陌生，紅酒基調加入各種水果，清爽香甜。今次調酒師就將經典Sangria重新演繹，唔知同Classic Sangria有咩分別呢?
Apple-tini
呢杯雞尾酒以波蘭野牛草伏特加為基調，酒味本身帶有青草、百里香氣息，配上青蘋果清新得嚟又有強烈酒味，好有層次。
Passionfruit Martini
呢杯雞尾酒用咗原個熱情果，果香濃郁，用作餐前醒胃雞尾酒，或當做甜品都好啱。
Royal INN
地址: 尖沙咀彌敦道100號The ONE1樓L121號舖
電話: 23218289
