想食鑊氣小炒梗係要到大牌檔！今次介紹嘅「建榮特色桑拿菜火鍋店」就位於建榮熟食市場裡面，唔係屯門街坊真係未必知呢間藏身於工業區當中嘅高質小店啊。佢哋以鑊氣小炒聞名，特色招牌菜包括冰淋醬烤骨、脆皮原隻豬手等。氣氛熱鬧，一家大細約飯局或者三五知己嚟食飯都一流。
位於傳統熟食市場之中，餐廳室內有冷氣開放，室外亦放置大型風扇，夏天嚟都絕對唔怕熱。冬天嚟就有多款雞煲、火鍋選擇。亦設有VIP房，有需要嘅話建議提早預訂，私隱度更高。
送酒推介！脆皮原隻豬手、紅燒乳鴿
無論係放工後定放緊假，嚟到想放鬆心情飲返兩杯啤酒，當然要嗌埋送酒小菜先夠盡興。呢度最出名嘅脆皮原隻豬手炸至金黃酥脆，唔係講笑、豬皮食落真係脆到好似食緊薯片咁！豬肉亦有鹹香，口感軟嫩唔油膩。
脆皮原隻豬手
香口推介亦有呢碟紅燒乳鴿，用大細適中嘅乳鴿先用餐廳秘製鹵水浸過，再炸到啱啱熟就上枱。未食先聞到鹵水同油香，令人食指大動。咬落皮脆肉滑，更有肉汁噴出！唔需要多餘調味已經好出色。
紅燒乳鴿
送飯一流 冰淋醬烤骨、招牌小炒王
如果係同小朋友一齊嚟，可以嗌呢碟酸酸甜甜好開胃嘅冰淋醬烤骨，採用金沙骨（一字骨）先炸再加醬爆炒。醬汁啱啱好包住每一塊烤骨，肉質鬆軟好易咬開。而令人食到忍唔住連骨都吮埋嘅醬汁係用酸梅醬、XO醬、豆瓣醬調配而成，酸甜中帶少少辣，令人忍唔住食完一件又一件。
冰淋醬烤骨
招牌小炒王同樣熱辣辣香噴噴好啱送飯㗎，用新鮮蒜薹，加上蝦仁、魷魚、腰果、蝦乾、銀魚乾等配料一齊爆炒。睇落好似同其他餐廳差唔多，勝在用料優質，火候亦掌握得宜，海鮮更係餐廳每日採購，魷魚食落零舍新鮮彈牙！
招牌小炒王
食材新鮮 結合鑊氣至好味
咕嚕肉亦係餐廳嘅熱賣招牌菜，用肥瘦適中嘅新鮮豬腩肉先炸過，再加秘製咕嚕醬汁、洋蔥、青紅椒炒香。食落先有醬汁酸酸甜甜嘅滋味，再到豬肉嘅肉味同脂香。食到一半可以加埋碟邊嘅菠蘿，餐廳特別揀新鮮菠蘿再燒香，食落香甜多汁，同坊間常用嘅罐頭菠蘿完全無得比！
招牌咕嚕肉
上面都提到餐廳嘅海鮮係即日入貨，因此呢度嘅海鮮菜式亦絕對值得一試。椒鹽鮮魷脆漿厚薄適中，食得出酥脆又夠乾身唔會成口油，裡面嘅魷魚肉厚鮮甜。加上秘製椒鹽同炸蒜提鮮，十分惹味。
椒鹽鮮魷
無辣不歡嘅朋友就要嗌呢份川味辣子雞啦，用咗八種香料，包括四川辣椒乾、孜然等爆香雞件再灑上芝麻，每件雞肉入口都有齊麻、辣、酥、香，非常過癮！
川味辣子雞
鹹鵝嘅鵝肉非常入味軟嫩，鹵水嘅鹹香突出，同時唔會蓋過肉香。鵝皮亦夠爽滑，帶鵝油嘅甘香。當然亦係用餐廳嘅秘製鹵水煮成，點少少酸汁中和油膩感。
白切鹹鵝
建榮特色桑拿菜火鍋店
地址: 屯門建榮街32號建榮熟食市場地下C6號舖
電話: 27725333