台灣人一向好客，好多當地人招呼朋友遊覽夜市，都會熱烈介紹對方食臭臭鍋～可想而知臭豆腐喺台灣人心中幾重要(笑)！如果以前喺香港心癮起想食臭臭鍋，都要出旺區同人逼先得……
而呢間主打臭臭鍋嘅「湯•米」店主家人係台灣人，以前成日喺台灣夜市「掃街」，當中最掛住就係圍埋一齊食臭臭鍋！於是一心將台灣人情味、抵食文化帶嚟香港，並且選址開揚恬靜嘅將軍澳海傍，等大家可以舒舒服服地慢食，唔使再同人逼啦。
食鍋前先來杯高質台灣手搖 頂級茶葉作茶底!
老闆想將台灣氣氛帶嚟呢度，店內梗係有手搖飲啦！呢度用四季春、頂級烏龍茶葉作茶底，茶香撲鼻。珍珠奶茶、芝士奶蓋、滿杯水果茶、純茶等都有，就算入嚟淨買手搖外帶都得㗎。
芝士奶蓋四季春
強力推薦用Cream Cheese 打製嘅芝士奶蓋，口感細膩軟滑、奶香溫和。先直接食一啖奶蓋，再混和四季春茶香飲最爽。
滿杯菠蘿 新鮮台灣鳳梨現打
另一必試係「滿杯菠蘿」，平時手搖店可能用果汁沖製，但呢度係用新鮮台灣鳳梨即叫即搾汁而成，飲落果香十足又有果肉口感，鍾意味道清爽嘅話好推介少甜。
滾住食！9款熱鍋選擇
講返正題，呢度有多達9款熱鍋揀，每款鍋嘅湯底都特別熬製。當中最受歡迎當然係「招牌臭臭鍋」(見最上圖)，每日向香港著名臭豆腐供應商拎貨，係香港食家都讚過嘅天然發酵臭豆腐，入口爆湯Q彈，最重要會喺口中慢慢滲出令人上癮嘅「臭味」！
臭豆腐由香港著名供應商提供，知道食物來源更安心，其天然發酵法安全可靠。
台灣抵食文化 白飯／粉絲免費追加
店主坦言喺香港食物成本好高，但又好想香港人感受喺夜市一齊圍埋傾計食飯嘅親切感，所以盡量將價錢降至最低，真係連喺香港都感受到台灣嘅人情味呀！HK$96 就食到滿滿鴨血、滷大腸、牛肉、貢丸等10幾款配料，而食材會跟季節不定時更換，並可免費追加白飯／粉絲，配料比台灣夜市更豐富。
四川麻辣臭豆腐 臭得有麻香勁暢快
嫌臭臭鍋臭得唔夠喉，仲可以單點「麻辣臭豆腐」小食加碼。店主特別加入四川口味，辣勁夠強夠香亦稍微遮蓋「臭味」，如果同行朋友係臭豆腐入門級別，都可以叫呢個小食畀佢試試感覺。
其他推薦熱鍋 巴蜀烤魚鍋
香港人一年四季都鍾意「拾吓拾吓」，烤魚就係人氣熱鍋之一。店主特別引入新鮮原條鯇魚，並只取厚肉魚腩位，啖啖都係嫩滑魚肉！湯底以豬骨湯、濃郁鹹香吊出魚鮮味。
巴蜀烤魚鍋
召喚沙茶醬Fans！沙茶牛肉鍋
身邊有唔少沙茶醬控，如果想試真啲店主特調嘅沙茶醬，一定要試埋「沙茶牛肉鍋」。特製沙茶醬經多番試味、調配而成，比一般沙茶醬味道更有層次，湯底以滿滿沙茶醬熬製，味道特濃，加埋本地肥牛佐飯真係可以食兩碗！
沙茶牛肉鍋
沙茶醬加本地肥牛真係無得輸！
養生族 藥膳豚肉鍋
藥膳味超強有後勁，配料有紅棗、枸杞、雲耳等，滾住食～獨有嘅中藥甘味、鹹香會越嚟越濃。
藥膳豚肉鍋，荷蘭豚肉極粉嫩，鮮甜柔軟。
台灣夜市小食 坐喺度「掃街」
有手搖、有臭臭鍋……有埋夜市小食真係台灣回憶返晒嚟！好多人都鍾意台灣鹽酥雞，香口得嚟又Juicy。店主透露呢度嘅「鹽酥雞扒」都沿用台灣做法，將調味料加水醃製雞扒，外皮香脆，內裡雞肉依然嫩滑多汁。
鹽酥雞扒
涼拌小青瓜
台灣夜市小香腸
湯•米
地址: 將軍澳唐賢街23號帝景灣商場1樓40號舖
電話: 27808210
