南美洲菜喺香港絕對係冷門菜系，令大家錯過咗好多正嘢。其實南美洲菜包括咗秘魯菜、墨西哥菜等，香料豐富、味道多變都係佢哋嘅形容詞。食食吓仲會發現，有啲味真係從來未食過，堅有驚喜。
明明咁有特色，點解香港咁少機會食到？正正因為南美洲菜咁有性格，調味、烹煮都耗時又考手藝。雪藏食材更加免問，食材要夠新鮮先煮到。
新鮮食材，每日由歐洲、澳洲、荷蘭、日本等地運到。
終於！等到香港有南美洲菜新餐廳喇！新店Amusement Eatery由自小喺委內瑞拉長大嘅Alex掌廚，無論醬汁、醃料都係自家製，夠晒地道。自家食譜，坊間真係唔會食到一模一樣。
店內好有南美洲奔放玩樂氣氛。
設戶外座位，好歡迎狗狗嚟。
【招牌】秘魯特色燒春雞 外皮焦香，醃味香惹
正如文初所講，食材質素對南美洲菜系好重要，所以呢度全部食材均由外國新鮮引入。招牌「秘魯特色燒春雞」就係用天然香料醃製，再依Alex家鄉做法生烤春雞，利用火力封住肉汁，雞皮又燒到金黃香脆。
燒春雞未食已經聞到好香，因為Alex用多種香料如番紅花、西芹、蘿蔔等醃製，沾埋辣醬食好正，嚟梗仲會出個加辣版呀。
天然香料醃製，生烤勁juicy。
【秘魯菜必食】秘魯魚生 酸得過癮
如果無食過秘魯魚生，真係唔算食過秘魯菜㗎。秘魯魚生同我哋食開嘅刺身唔同，係用檸檬生醃「醃熟」，再加辣椒、洋蔥、芫荽等調味。Alex最後會火炙魚肉，令大家食得放心㗎。
今次魚生係日本刺身級平目魚，嚟梗會有吞拿魚。一入口第一吓好酸，但係酸得過癮醒神～魚肉好爽彈鮮甜，邊咬邊滲出香料辛辣味，估唔到一片魚生有咁大味蕾衝撃。
秘魯魚生上有一片印尼香薯，天然硬脆香甜可清新味蕾。
【CP值勁高】加勒比海拼盤
全部海鮮、肉品都係由歐洲、澳洲、日本引入，簡單烤熟已經勁juicy惹味。所以呢個拼盤真係必食，只係$598就有牛里脊肉、烤雞、刺身級大蝦、刺身級帶子、魷魚、澳洲青口，2-3個人share都好夠。
南美洲當地人會將全部食材、醬汁、檸檬汁撈勻，隨手拎咩食咩，飲住啤酒傾計好chill。
個人最鍾意大蝦同魷魚，勁鮮甜～一食就知係新鮮嘢。
【即開各國生蠔】一試新興杜拜生蠔
呢度按時令於世界各地引入生蠔，平時有日本、法國生蠔等，估唔到今次食到近年新興嘅杜拜生蠔。口感爽脆、礦物味重，加埋自家用西芹、香草調煮嘅醬汁，輕酸辣中和礦物味啱啱好。
店家特意引入新興杜拜生蠔，想畀大家試吓新嘢。
【自家製】手工薄餅 & 意粉
手工薄餅、意粉麵團用雞蛋、高質麵粉搓成，新鮮出爐特別有蛋香。
雙重辣肉腸手工披薩。餅底特別輕韌有咬口。
即刨新鮮松露雜菌手工闊條麵。今夏用法國松露，無咁重煤氣味，意粉彈牙掛汁。
【小食sharing】
蟹肉忌廉芝士炸雲吞
炸雲吞好爆餡，一咬開就有好creamy嘅忌廉芝士。
墨西哥粟米片 真係用新鮮粟米整！
南美洲係以粟米為主糧，所以你會發現好多料理都有粟米出現。相信好多人都鍾意食墨西哥粟米片，但坊間多數都係用現貨。呢度就用新鮮粟米全手工製，健康又有種獨特穀物香。
用黑色同黃色粟米，全天然人手製。
【南美特色甜品】芝士蛋糕都有粟米！
雖然話粟米係當地主糧，但點諗過連甜品都可以加粟米。呢道傳統甜品—粟米芝士蛋糕，真係食到粒粒歐洲粟米。
傳統做法比較腍身，Alex稍作改良變得更紮實有口感。芝士蛋糕唔會太甜，餘韻有種輕鹹芝士味，同粟米都幾夾。
Amusement Eatery
地址: 長沙灣福榮街538號喜遇地下2號舖
電話: 26666019
