街機真係8、90後童年回憶，幾位90後開設嘅酒吧餐廳「基地」就將打機回憶變成霓虹燈，店內掛滿食鬼、GAME OVER燈牌，仲有螢光graffiti大玩地道元素。
一入門口就有卡位。
90後老闆坦言：「如果個地方自己都唔鍾意，人哋點會鍾意？所以想呢度設計得年輕好玩，嚟到係成班朋友玩得開心，又有好嘢食」當你細心留意，店內好多設計細位都好有心思，「呢度嘅霓虹燈每幾個月就換一次，全部都係自家設計，以玩味同地道為主要概念。每到夜晚10:30後霓虹燈以外嘅燈都會熄，好靚好有氣氛。」
細心留意會搵到好多玩味驚喜。
訂座優惠！
只要經OpenRice訂座，即享全單88折 |
輕鬆氣氛 飲酒食法國菜
呢度唔只有得飲酒，仲請嚟法國菜大廚煮製料理，終於可以輕輕鬆鬆食餐法國菜，唔使咁拘謹喇。
【必食】
傳統法式雞飯 鵝肝+羊肚菌
特別係一開業就爆人氣嘅法式雞飯！依法國傳統煮法，用雞油代替牛油，再用法國黃酒、羊肚菌慢煮3小時先做到雞肉咁嫩又有酒香。食之前撈勻鵝肝粒、羊肚菌、雞油一齊食超正！之前大份量版本要600幾蚊，而家有$288/1-2人份量，價錢抵咗又可以留肚試多幾款。
龍蝦扁意粉 龍蝦膏係「天然味精」？
本身咁大隻龍蝦已經好搶眼，意粉汁仲係用龍蝦頭煮成，連意粉都好濃蝦味㗎！大廚更將龍蝦膏形容為「天然味精」，因為佢將龍蝦膏高溫焗乾後再撈入意粉，好似落咗味精咁鹹香呀。
香煎鵝肝多士+Q彈啫喱
鵝肝係傳統嘅外脆內嫩，驚喜之處反而係側邊嘅柚子啫喱，代替咗平時用作解膩嘅水果，啫喱Q彈微酸更加過癮。
西班牙豬肩 慢煮16小時
豬肩肉味以58°C慢煮咗16小時，可以想像幾咁軟腍，肉味仲好濃。
【最新雞尾酒】
駐場調酒師會keep住推出新酒，之前好有玩味嘅Another Kung Fu Cha仲好IGable𠻹。今次新出嘅cocktail就有Green One Minchee，以荔枝酒、檸檬汁、薄荷糖漿、綠茶、梳打水調配，入口微酸再滲出清爽薄荷味，好有東南亞風味。而mocktail則有呢杯Chocoberry，有士多啤梨、朱古力、牛奶、蔓越莓汁、鹽，綿滑輕甜好啱女仔飲。
(左)Green One Minchee、(右)Chocoberry
基地
地址: 尖沙咀山林道29-31號廣利樓地下A號舖
電話: 23613118