放工去銅鑼灣食飯，朋友揀咗位於利苑二期嘅「NINETYs Roastery」。呢間餐廳喺其他地方都有店，之前食過已經覺得好唔錯，而銅鑼灣店嘅整體格調更加係升級版🌟。餐廳環境好正，二人拍拖或多人聚會都好適合，門口更設有幾個好啱打卡嘅咖啡位添📸。呢度各方面都好好，唯一唔好就係太早閂門喇，閂九點。幸好店員們好好人，無嫌我哋阻收工。佢哋全程都非常專業，主動清晰介紹菜式，抵讚👍。Scallops Tarts($188)，帶子酥皮撻一客有三件，造型精緻，睇見就想食😝。撻皮有好多層，食落微脆，帶點牛油香，而中間嘅餡料部份就為味蕾帶嚟一份豐富嘅感覺。廚師將帶子肉同青蘋果肉切粒🍏，前者鮮甜醇厚，後者清新爽口。不過調味竟然用上XO醬，再配合埋三文魚籽，為菜式添加一份淡淡鹹香。我敢講無喺第度食過呢個口味，好新穎啊😋。Beef Cheek($288)，牛臉頰肉接近預期中嘅味道，但賣相就唔算太討好，因為色調好深好灰沉🙈。牛臉肉好大件，瘦肉同脂肪比例均勻，肉質軟稔，牛味濃郁。佢中間帶少少筋位，食落更有咬口，可補充骨膠原🐮。底部嘅係叉壓薯仔蓉，餐牌強調用叉壓應該係有原因，因為出到嚟嘅形態真係有啲唔同，佢並非完全壓到綿哂，反而仲食到有啲粒粒🥔。牛臉肉同薯仔都索盡紅酒汁，香濃而不膩。Red Velvet Cookie@sugarism($45) ，🍪呢塊面積咁大嘅曲奇應該係叫Ooey Gooey Cookies。佢嘅口感有別於傳統脆身嗰種，反而濕潤啲同軟身啲，有少少似蛋糕，切開後發現中間有啲啲流心嘅效果，估計係白朱古力嚟。整體係偏甜，但唔會反感，而且紅絲絨味一向都係咁㗎啦。Chocolate Cinnamon Toast@pinky__bakery($20)，呢塊肉桂多士好正🍞，因為好重肉桂嘅香氣，又同朱古力味好夾，唔會過甜。多士微微烘過，但仍能保持到麵包鬆軟嘅質感。佢賣廿蚊一塊，我覺得係合理價錢啊。飲品方面，我哋要咗一茶一果汁，分別係Iced Apricot Houjicha($58)同埋Cabernet Rose Grape@Alain_millet($58)。前者係焙茶🍵，富有烘烤嘅香味，而且亦帶點點果香。後者好好飲，店員介紹呢個牌子係由法國果園起家，佢嘅提子汁好清醇🍇，甜度同澀度都適中，我直頭記低咗個牌子之後再搵嚟買。總括嚟講，9️⃣0️⃣Ninetys嘅出品相當有水準，自家煮製嘅精緻菜式盡顯心思🍽。同時，我亦好欣賞佢入貨好有眼光，而且仲同唔同品牌／小店合作，帶比客人更豐富嘅體驗。雖然價錢唔平，但我絕對會再次幫襯，期待佢推出新菜式呢💫。…查看更多
