八沢 (筲箕灣東大街)

一直都好掛住佢既忌廉湯烏冬，好想再去食，所以就㨂左情人節再幫襯。好彩有book 位早黎，估唔到都幾多人等位。✨今日比上次叫多左好多野食♥️, 兩個人坐卡位啱啱好。打後見要兩pair 人 一齊坐，你眼望我眼咁真係陰公🐷✨巨峰果汁清酒（$38): 個樽好靚，巨峰味幾天然同突出，清酒味亦唔會好"哽", 幾好飲幾易入口，呢支我都想入貨xD✨黑松露忌廉海鮮烏冬（$92 ）：食咗一啖有啲失望，忌廉湯冇之前咁香，味道比較稀薄。不過啲烏冬就真係好滑，扁身得黎帶點煙韌。海鮮就係帆立貝一開二，都算鮮味，三文魚都好味，唔會過熟同太嚡口。✨鮮什菌松露芝士烏冬（$68): 個湯其實同忌廉湯幾相似，但呢個多左芝士既香味，而且湯底濃厚d,我覺得好味過忌廉湯。 溏心蛋都好香滑，呢個湯底今次反而有驚喜。✨龍蝦沙律（$50): 龍蝦肉好彈口同入味，包埋紫菜估唔到又幾好食。✨雞翼串燒（$30): 燒得唔會好乾，不過調味料好勁都幾咸。✨豬頸肉（$26): d 肉好細串，食果時勁難齒出黎，又係好咸。✨三文魚腩串（$37): 呢個最好食，外皮好香脆，三文魚燒得啱啱好。✨黑豚生蠔燒（$70): 上次食過好正念念不忘，今次要再叫。未食近距離已經聞到好香既蠔味，豚肉厚身帶少許脆邊，入面粒蠔應該都幾大，因為食落勁多汁嫁，總算有番d 安慰。✨牛油蒜蓉燒扇貝（ $78）：呢個勁唔抵，扇貝勁細隻。蒜蓉味好香，扇貝都幾有鮮味，不過味道過咸同埋好油膩，咁既價錢食碗麵好過。…查看更多

今晚要同朋友去筲箕灣整啲嘢，整野之前梗係要醫下肚先啦，去筲箕灣食嘢就自然諗起筲箕灣東大街。其實東大街真係有好多嘢食，中西日韓泰乜都有，我哋就揀咗哩一間日式拉麵。我哋叫咗個黑豚肉生蠔燒同埋黑蒜炙燒極濃黑豚肉拉麵🍜先講下個拉麵，湯底真係好好味，豬骨湯好濃，黑蒜味亦好重，麵質軟硬適中，黑豚肉燒過，所以好香囗，鐘意重口味嘅人啱晒!至於黑豚肉生蠔燒，如果趕時間就唔好叫，因為要等成20分鐘。起初以為係一隻生蠔連殼攞去燒，所以唔明白點解要等咁耐，但係嚟到嘅時候就知道哩個小食唔係咁簡單，同埋因爲太太太好食嘞，所以覺得等都係值得嘅！…查看更多

東大街食肆林立，所以都好鍾意黎東大街呢度搵食，因為可以有好多餐廳選擇。因為天氣有啲涼，所以就想食湯麵，暖一暖，就嚟咗呢間日式餐廳。首先叫咗個黑松露忌廉烏冬。之前食嘅烏冬都係湯烏冬多，第一次食紀呢個忌廉烏冬。聽到忌廉可能話好似好肥，好濟咁樣，但呢個忌廉唔算話好杰，較湯，味道濃。:)面頭有一更黑松露醬，撈埋令個湯更香！烏冬扁扁地，唔算好粗，食落好彈牙。送方面有三文魚同埋帶子等，材料都算豐富。芥末果醋帶子冷烏冬首先佢個烏冬好爽口，好彈牙，唔會好乾身，仍然保持濕潤。帶子一共有四大粒。好爽口。個芥末果醋係成碟既靈魂！酸酸地，好香，烏冬沾黎食好開胃，呢一個冷烏冬真係好正。糖心蛋做到好靚！黑豚生蠔燒黑豚肉薄薄一片，煎到焦焦地，入面包住生蠔，外脆內軟。牛油蒜蓉扇貝好香牛油同埋蒜蓉嘅味道，啱啱焗起，所以上枱嘅時候已經好吸引。雞泡魚干我都係第一次食，佢燒到焦焦地，有少少嘅燒汁同埋糖漿，所以食落有少少痴牙既感覺。食落好似食緊豬肉乾咁樣，硬硬地，呢一個用嚟送酒一流！冰糖紅棗雪梨茶唔算太甜，幾好…查看更多

新年食得太多肥膩野，突然好想食烏冬清新下，見呢度有個忌廉烏冬好似好正，適逢初三都開😚不過就要收加二服務費裝修幾有格調，不過張枱放埋水就真係有d 迫。幾經掙扎，最後兩款都叫晒烏冬。✨芥末果醋帶子冷烏冬（$82): 第一次食撈果醋既冷烏冬，感覺應該幾開胃。不過個人覺得個果醋都幾酸，wasabi 味唔係好覺🤔，於是問侍應再拎wasabi, 佢好似吱牙膏咁比得一pat 仔我😳真係好矜貴。。。唔知點解d wasabi 攪極都好難溶，撈完都係比d 酸味蓋左😓完全無wasabi 既攻鼻過癮感覺，如果有得換做芥末胡麻醬會比較啱我口味。個烏冬就係扁身的，但略嫌太過煙韌，𡁻得有d 辛苦。帆立貝都幾大粒，有兩大粒開邊的，鮮甜味美。不過見menu 話係帶子～我一路以為係刺身果種添，呢個係帆立貝吧🤔另外果醋配沙律菜就幾好味，但個蛋如果可以做到溏心d效果就更開心。✨黑松露忌廉海鮮烏冬（$92): 食完果個好韌既烏冬，呢個好食好多！連埋d 湯食個烏冬好滑嘟嘟，雖然我食果時d 烏冬已經浸腍左但都帶點點咬口。✨最正係個湯，散發住陣陣黑松露既香味🤤個忌廉湯香而不膩，唔會係杰撻撻果種，加埋d 蔥花好香🤤飲左勁多。✨不過貴為海鮮湯烏冬，配料只有三文魚同帆立貝，感覺上有d 失色，如果搭多幾粒蜆又或者有多隻蝦會更加分。✨帆立貝我覺得冷烏冬果個好食d, 可能無咁熟，比較大粒同鮮味d✨黑豚生蠔燒（$70): 價錢都幾貴，不過好彩有叫！因為真係好好食😍個豚肉燒到帶點焦香脆脆地～個心真係好熱，一路咬d 蠔汁係咁漏出黎，好彩拎個匙裝住飲埋🤤～豚肉配生蠔真係好鮮味甘香😍😍😍唯一要彈係個豚肉包得比較厚，不過食完個蠔味仲起個口入邊散發出來🤤真係好滿足。…查看更多

八沢 (沢：同澤，開業多時，但過往門前宣傳不多，令人為之卻步。假日落東大街覓食，發現餐廳宣傳落力咗唔少，更重要係見到menu，一於嚟個早到的團年(excuse)。八沢裝修盡顯創意、玩味。仿真魚cushion掛喺天花，猶如置身日本漁市場。牆身餐點推介呈拼圖造型，簡單但吸睛~聽朋友講八沢烏冬比拉麵出色，果然冇令我哋失望。鍾情彈牙烏冬嘅人一定係叫烏冬，過咗冷河嘅烏冬會收縮，自然較為黏韌。芥末果醋帶子冷烏冬較其他菜式簡樸，只以果醋醬油調味，唔花巧，簡單食材配搭更令人專注於食材真味。烏冬大過一個麵餅，加上四隻厚肉帶子，食到好飽。烏冬絕非一般貨色。未點醬汁，先試原味。新鮮嘅烏冬當然冇酸味，扁身烏冬濕潤滑溜，望落潔白透亮。冷食掛烏冬，沾上果醋汁，散發淡淡柚子香，酸溜溜好開胃。芥末混和醬汁感覺剛好唔刺鼻，調味恰到好處。採用原隻帶子，每隻都肉厚肥滿，曲奇餅咁大。只係輕輕灼過，仲未完全變白，幾有鮮味。溏心蛋整個蛋黃呈半液體狀態，質感綿密，蛋白亦係啱啱成形，仲好滑溜。不過蛋黃略嫌淡口，由於唔係味付玉子，選用更濃蛋黃香嘅雞蛋會更好。唔少人都推薦黑松露忌廉海鮮烏冬。黑松露落得好重手，味道香濃。忌廉湯底奶白，但冇想像中咁漏，因為主要係淡忌廉，冇落太多牛油。三文魚塊好厚好香，但煮得熟咗啲，唔夠滑。忌廉烏冬嘅帶子全熟，比起掛烏冬嘅半熟帶子易咬、爽口。忌廉湯本身夠香濃，所以帶子自然質感比原味重要。廚師連帶子生熟度都顧及到，幾細心~好少聽人提及八沢嘅串燒。其實都做得唔錯~例如呢個黑豚生蠔燒，用薄切豬肉片卷住生蠔，係我從未試過嘅食法。豬肉片燒至滲出油脂，邊邊位脆口。串燒嘅調味唔多，味道來自中間多汁肉厚嘅生蠔。比起一味用照燒汁嘅串燒，我更鍾意呢種配搭。明太子雞翼將雞中翼部分拆骨，釀入明太子，封口再炸至金黃。雞翼炸後依然嫰滑，明太子事先拌入葱花，但炸後明太子比較乾身。如果雞翼調味淡啲，突出返餡料味道，就更好喇~最後推薦呢杯蜜柑啤酒，$38 250mL，價錢公道。我唔係飲開酒嘅人，亦唔算愛酒，一味追求醉意就唔啱我喇，但係每次見到特別口味嘅啤酒都會心動。啤酒開頭飲嘅時候覺得唔係幾苦，飲落舒服，但有欠蜜柑味。正當飲到一半，肚漲漲打算放棄嘅時候，口中含住嘅一啖酒竟然慢慢滲出蜜柑酸甜味，唔假、唔漏，唔係糖水味！原來蜜柑糖漿沉晒底...大家切記要問店員拎長匙羮攪勻先好飲。如果一早知道，啤酒甘味配淡淡蜜柑香一定更正！成餐飯食得幾開心，店員有禮而且細節位就得唔錯。餐牌循環再用，食串燒時店員又會收走湯碗，比隻新碗仔我哋盛住串燒。服務貼心，貼士樽可能唔係擺設嚟架~…查看更多

一心來東大街揾食，路過這間拉麵店，二話不說就跟喜愛拉麵的朋友入內開餐。睇餐牌時有點似曾相識的感覺，後來才發現原來我較早前去過他們在上環的另一店舖。結果我跟朋友點了2個招牌麵食：黑松露忌廉海鮮烏冬，聞及食落都很重黑松露香味，而且十分足料，海鮮包括三文魚及大大隻帆立貝。湯底濃郁，十分重忌廉味而且入口不會太膩，烏冬十分滑。蒜灸燒極濃黑䐁肉拉麵黑蒜香味十足，足料，有大大塊黑䐁肉，而黑䐁肉有炭燒香味，但又不會燒得太乾。黑豚生蠔燒做法新鮮，把黑豚肉包住生蠔燒。口感不錯，全因黑豚肉燒得不乾，咬落都多汁。串燒牛拼盤，包括牛舌、牛小排及安格斯牛肉。 牛舌十分厚，所有肉都多汁好吃。友人覺得這裡的小吃比拉麵還要出色！明太子雞翼，雞翼燒得皮脆，內裡釀了十分多明太子。每人二百蚊埋單，有拉麵，有小吃，抵食！…查看更多

星期六約朋友去筲箕灣,知東大街多嘢食：一出地鐵站轉右就望到呢間餐廳。門面門面寫八澤之外，仲有寫明自己係串燒、拉麵同烏冬專門店。門口左邊嘅裝飾好文青，有一架單車,單車係啡色。有一張木製嘅檯。檯旁邊有好多吟釀嘅酒樽。好有意思。餐牌餐牌有清楚寫明有咩食物,亦有標明價錢。見到「正」喺旁邊，我估應該果啲好好食。食物1.）黑松露忌廉海鮮烏冬湯有好濃忌廉,聞落去好有黑松露味：烏冬比平時扁身，但食落去就好滑口。三文魚都幾厚身差唔多兩個五蚊銀咁厚。食落去三文魚好滑，保留到三文魚示有味道。2.）黑豚肉生蠔燒一份生蠔燒有兩件：用黑豚肉包住成隻蠔，長度差唔多一隻手嘅嘅直徑：黑豚肉味濃而肉質鮮嫩，外層黑豚燒至金黃色；而蠔嘅味好濃,蠔就好肥美，啖啖肉而且好多蠔嘅肉汁。值得一試再試。3.）牛油金菇包金菇好淋，聞落去好有牛油味。飲品自家製冰糖紅棗雪梨茶：好清甜嘅雪梨味同有紅棗味。又唔太甜而且好清潤。餐具餐檯邊放左一樽水，而且用保溫壺裝住水。可以保持水嘅溫度。另外擺放水杯、筷子同匙羹。擺放整齊而且方便客人有而有需要之用。餐廳內餐廳牆用全木嘅裝潢，另外擺放咗一啲插畫。眼見餐廳好乾淨。服務態度侍應服務態度好好：當有熱嘅食物送上嘅嚟時侯，叫我地小心熱。亦有做覆單嘅動作，防止漏單。…查看更多