大樹燒烤

第一次喺香港食呢類型嘅串燒店，呢間餐廳嘅串燒種類好多好齊，除咗串燒之外仲有啲一窩窩嘅食物同埋甜品，不過今日我同朋友就主要食串燒啦。落完單之後店員會喺鐵板下低點着兩個蠟燭，串燒嚟到就會放喺鐵板上面，咁就唔怕食得太慢啲串燒凍晒。調味料方面，餐廳準備咗辣椒粉同埋孜然粉，方便食唔同辣度嘅人可以調校適合自己嘅口味。第一輪嘅串燒到咗啦，我哋第一輪叫咗豬頸肉，雞肉串，烤翠玉瓜，烤秋葵，烤多春魚，同埋金菇肥牛卷。第二輪嘅食物，我哋叫咗燒茄子，花甲粉，同埋粟米串。豬頸肉同埋雞肉串都有醃過，而且燒得好香口，上面落咗少少孜然粉，不過我個人口味鍾意重孜然粉，所以我就自己落多咗好多。烤翠玉瓜本身個翠玉瓜都夠甜，燒完之後好爽甜，唔會乾晒，翠玉瓜係厚身嘅，唔係切到好薄，所以只叫咗一串翠玉瓜都唔會唔夠喉。秋葵我本身就唔食嘅，但係$28有兩串，我個人覺得幾抵食。金菇肥牛卷一串有三嚿，朋友唔食金菇嘅，我一個人食咗三嚿，開始有啲飽😂。雖然金菇嘅尾尾有少少燶左，但可以接受，因為比牛肉包住嘅部份入邊咬落係有菇汁嘅。多春魚一份有三條，食落唔腥，燒得好脆，多春魚好長要分兩啖先食得晒。呢條燒茄子個名叫做大大大茄子，一上到枱真係冇改錯名喎😂，真係好大份，上面鋪滿咗蒜蓉，茄子肉撈埋蒜蓉一齊食，真係好好味，食到最後我不停用筷子刮個茄子，一啲都唔想浪費，因為實在太好味。🥹粟米串一份係有10串嘅，我第一次食逐粒粟米串嘅串燒😂啲粟米本身好甜，但係又甜甜鹹鹹辣辣個味道好特別，所以我同朋友眨吓眼就清咗10串粟米。有一次我喺food court入邊食過花甲粉，一啲味都冇，今次係我最後一次俾機會花甲粉呢一個食物，好彩冇令我失望😎。 一落枱已經聞到陣麻辣味，蜆肉份量多，蜆肉嘅份量絕對唔係濫竽充數，每一粒都好鮮甜。食咗粒蜆肉之後，我用返個蜆殼嚟勺花甲粉嘅湯飲😂，個湯除咗鮮甜之外，仲飲到麻辣嘅味道，麻辣嘅比例，我個人覺得麻味比較辣味多，個人嚟講相當鍾意。粉絲就更加唔使講，吸晒啲湯汁，我覺得餐廳可以整一個選項俾客人選擇粉絲加底。😂…查看更多

我同朋友一直都好鍾意食大陸嘅燒烤（即串燒），但係香港啲串燒店多數都係港式串燒或者日式串燒，今日喺尖沙咀就食到呢一間好貼近大陸凬味嘅串燒。 Menu係簡單嘅兩頁落單紙，但選擇嘅種類好多，肉類串燒，海鮮串燒，蔬菜串燒，仲有好多特式小食同飲品。手打鴨屎杳（$36）近年喺大陸好興嘅手打鴨屎香檸檬茶喺呢度都有得飲，因為坐得比較近吧枱，真係見到店員好落力咁不停手打製作，鴨屎香茶底，再加上香水檸檬，聞落飲落都好香，滋味甘醇，既解渴又正好可以中和串燒嘅油膩。 西瓜冰（$36）呢杯西瓜冰嘅味道非常天然，唔係嗰種化學果汁味，亦都冇加糖，飲落就係好天然嘅西瓜甜味，炎熱嘅天氣飲上一杯用作解暑真係一流。韓式芝士年糕（$28/2塊）芝士年糕內裡非常之軟糯，芝士好香滑，感覺好邪惡亦好幸福。炸雞薯片（$38/份）呢個幾有驚喜，我哋原本以為係一般嘅炸雞，再加上薯塊，點知原來佢係將雞肉整成薯片形狀去炸，每一塊炸雞都好薄好似薯片咁，平時食炸雞好快就會覺得好油好濟唔想食，呢個薯片炸雞就令人一塊接着一塊食過不停，配上泰式辣醬，完全唔會覺得濟。開心花甲粉絲（$68/鍋）喺深圳同廣州食過好多間花甲粉絲都覺得好正，冇諗過呢間嘅花甲粉絲，同樣冇令我哋失望，佢用鍋點火呈上，令粉絲keep住保持熱辣辣。花甲份量非常多，幾十粒不在話下，湯底好香好鮮，亦帶點辣，非常之惹味。終於到咗重頭戲燒烤喇，我哋兩個人不知不覺叫咗好多串，擺滿左滿滿嘅一個爐。我哋原本覺得好疑惑，點解店員冇問我哋串燒既辣度，後尾發現原來每張枱都有兩甖調味粉，一甖係孜然粉，另一甖係辣椒粉，可以按個人嘅口味隨意調整調味粉嘅份量，因為我勁鍾意食孜然粉，所以落咗好多，朋友就好食得辣，落咗好多辣粉，佢話辣得好過癮好滋味。全部串燒都好香口好滋味，因為叫咗太多，所以不能盡錄，只可以精選以下幾款介紹。渣男五花肉（$18/串）呢個真係幾好食，燒得好香，五花肉嘅油脂就更香。 新鲜魷鱼鬚（$38/3串）魷魚鬚串比起其他嘅串燒大串，而且食落好新鮮好彈牙，口感同味道唔錯。粒粒粟米串（$28/10串）粒粒分明嘅粟米串成既串燒，好易食亦都好抵食，共有10串之多，當你食到唔知想食啲咩時，就可以食一串嚟過渡😂仲有無圖既燒土豆片、燒雞腎串、燒雞軟骨串、燒芝士腸串，我都覺得非常唔錯。即開即燒大生蠔（$35/一隻）呢個叫嘅時候有啲猶豫，因為真係有啲貴，最後都係叫咗一人一隻。好彩都真係幾大隻，食落幾新鮮，咬落去juicy。…查看更多

忙完一個禮拜，又到星期五，放咗工最適合去食吓串燒飲吓酒，約咗朋友去尖沙咀新開嘅餐廳-大樹串燒餐廳位於喺厚福街嘅H8商業大廈內，呢度係出名既美食街，一於試試佢入到去店員好快咁安排好座位，好彩我哋早嚟，由於係星期五，我哋走嗰陣到差唔多滿晒位。花甲粉，花甲粉調味適中，而且花甲唔會過老，粉絲更加吸收咗花甲嘅鮮甜。燒白鱔，外脆內軟，而且有把白鱔鮮甜味帶出來。而且有大量嘅孜然粉食起上嚟更加香。燒豬腰，豬內臟最怕係有腥味，但係佢洗得非常乾淨，高分之作。燒扇貝，即叫即開，而且清洗得非常乾淨，上面放咗一邊係蒜蓉，一邊係辣椒，食起上嚟非常惹味！新疆羊肉串，肥瘦均勻，唔會咬到一大舊肥肉，而且係少數嘅羊肉串有羊有羊味。大大大燒茄子十分多蒜蓉放係上面，脆口焦蒜加上油香令人食慾大開炒米粉，雖然Menu上面淨係寫住炒米粉，但係其實材料非常豐富，有魷魚，火腿，蛋同埋菜等。而且鑊氣同份量十足，男士的話唔怕會食唔飽！每一張枱都有一塊鐵板，下面放蠟燭幫串燒保暖，可以睇得出店家嘅用心，同埋佢對食物嘅要求。呢啲高質串燒一定要大力支持下！…查看更多