涼涼哋最好食臘味➕煲仔飯🤭唔想去西環咁遠，揾吓揾吓見到筲箕灣有幾間最後揀咗呢間，因為除咗煲仔飯都想試小菜。環境餐具都乾淨企理，掃QR code落單好方便。煲仔飯要6pm後先可以叫，早咗15分鐘去到，餓底友人表示叫兩個小菜攝住牙罅先😆小菜 「野山椒炒牛肉」 - 小辣🌶️上菜好快夠熱，牛肉炒得好香味道唔錯😋仲有不同顏色甜椒一齊炒，好甜好淋都係好入味，友人發現有一款係醃製過酸酸哋鹹鹹哋但又最辣嘅椒仔，應該就係野山椒，送飯一流，不過未等到煲仔飯嚟已經食晒😆小菜 「椒鹽雞翼」 同平時嘅椒鹽雞翼味道唔同，有啲紅紅哋似係辣椒味嘅「椒鹽」而唔係平時食胡椒味嘅「椒鹽」，味道都唔錯，係乾咗少少同埋凍咗會鹹啲。終於夠鐘叫煲仔飯🥳我哋揀咗要招牌「蒜香牛頸脊飯」➕臘腸，同埋「合時臘味飯」➕荔茸，有荔茸係好驚喜🤩可能係第一輪，等咗10分鐘左右就有，上菜後職員會打開蓋淋一圈秘製煲仔飯豉油再冚蓋焗一陣，我哋唔知要等幾耐見隔離枱開蓋我哋先敢開😂「蒜香牛頸脊飯」蒜味好香入晒啲飯度，牛頸脊完全無渣好入味👍🏻👍🏻「合時臘味飯」最出色嘅竟然係加餸嗰兩大球「荔茸」，好香好滑，加埋飯一齊食入口即化好滿足😌油鴨有啲乾同嚡，要啲牙力先咬到。每枱都有壺自家調嘅煲仔飯豉油，味道唔鹹剛剛好。有食過其他餐廳煲仔飯啲飯太生，呢度飯粒飯焦唔會過硬或者好濕，最後竟然兩個人食晒兩煲煲仔飯➕兩個小菜好瘋狂😜值得再嚟，下次想試其他小菜😋…查看更多
