雖然小弟喺潮州人，但香港出世，潮州話唔識講，亦唔識聽，不過，一樣好喜歡潮州菜。最近就約咗同晌中環返工嘅朋友聚一聚，結果嚟到「尚盛潮州海鮮飯店」嘆吓潮州菜，大家都話好耐未食過
。中環食晏一向人頭湧湧，入到嚟餐廳裡邊，當然座無虛席啦。一入門口先喺「潮州滷水檔」，滷水嘢當然喺食潮州菜嘅亮點啦。再望入去，大堂一字形去到尾，睇唔出個鋪位原來都幾大、幾深，整體裝修感覺樸實，右邊牆身掛有一幅古畫，非常有雅氣，左邊有好幾個廂房，有客人用餐，就唔多方便影。而枱上嘅餐具同樣透出一股氣質，非常別緻。眼見基本上全部侍應都喺上年紀，同老友傾開，先知喺以前上環嘅「尚興」原班人馬再起東山，難怪門面寫住50年老字號啦。
鹹酸菜 $10有理無理，坐低就放碟潮州前菜名物「鹹酸菜」，入口爽口，味道微微酸，好醒胃，無過鹹。順帶一提，茗茶又收$10位，咁仲有加一服務費呢。趁朋友未到，翻一翻餐牌先，大類而言，分別有滷水、魚翅、海鮮、潮州小菜、魚類、湯類、粥粉麵飯、甜品……等等。選擇非常之多
，不過呢度無午市套餐，全部嘢都喺散點。潮州滷水鵝 $158滷水喺潮州菜嘅經典，點可以錯過，滷水鵝單睇外觀已經非常誘人，鵝片堆得滿滿，切片大細厚薄均一，肉質柔軟，好有鵝嘅肉香，滷水醇香沉實又入味，果然喺老店嘅手勢。墊底嘅滷水豆腐，口感滑溜，有豆香，同樣滲出醇香滷水味。方魚肉碎粥 $65有一碗或一窩份量嘅選擇，嗌一碗其實都夠晒兩、三個人分，咁嘅份量正正啱晒我哋。潮州粥又喺有其獨特性，粥底唔會太綿，但米粒亦爆晒花，食起嚟有粒粒感，而加入咗方魚、肉碎，除咗食味豐富咗之外，添加咗一份好似柴魚嘅香味，伴滷水及春菜嘅濃味菜式好夾。春菜煲 $108呢記道菜喺朋友最想點吓，因為，佢好喜歡潮州啲家常菜。春菜即喺芥菜，不過，就會切得細條啲嚟做菜，再拌以炒過嘅豬肉，確喺好有家常風味，味道鹹鹹香香，幾唔錯，拌飯或粥都好。菊花石榴雞 $148潮州菜中都有唔少精緻手工菜，石榴雞就喺其一，因為造型特別，形態似石榴，又以雞肉入饌，所以叫「石榴雞」，外皮喺煎蛋白薄皮，再以西芹條紮實「袋口」，但又真喺估唔到煎蛋白可以做到層皮咁有柔韌性喎，包起咁多餡料都無穿無爛。內裡包裹著喺雞肉粒、蘿白粒、冬菇粒、冬筍粒、唐芹粒，每樣都刴得好細膩，又喺一番心機，至於口感上有細緻，有清脆，有濃香，有清爽，慢慢細味真喺感受到嗰份層次。最後淋晌石榴雞嘅芡汁，喺雞湯芡，甚具畫龍點睛之效。綠豆爽最後，竟然仲奉送甜品，雖然喺普普通通嘅綠豆爽，不過，亮點喺後面樽嘢。當時小弟見個侍應放低甜品時都奇怪，做乜多樽樽油，一問原喺陳皮醬，陣陣陳皮果香，甘甘哋，加咗落啲綠豆爽度真喺唔同晒。敢用得老字號做排頭，當然，自認有番咁上下實力，試咗幾道菜，食物嘅質素確喺唔失禮，有水準，師傅啲手藝紮實，唔喺花拳繡腿。…查看更多
