薩利亞不時聽人地講又話好污糟、又垃圾、又咩老鼠頭、又話咩預製菜，咁我就一試到底係衰到咩地步。我地冇嘢多就係人多，我地一行4人嚟到油塘比較多人嘅分店，就睇下佢嘅質素如何，最後又有冇肚屙收場呢？我地點咗《青醬鮮蝦西蘭花意粉》、《香焗白汁波菜》、《意式瘋狂水煮魚》、《原味雞翼》、《肉醬多利亞》、《黑椒蜆肉煮》、《青醬煙三文魚配西蘭花》、《鮮蝦冷盤》、《歐陸風烤香腸》、《三倍水牛芝士薄餅》、《開心果冰雪蛋糕》、〈比利時朱古力千層蛋糕》、《天使蛋糕》、《壼裝葡萄酒》、《Pinot Chardonnay Don Raffaele》同《Lambrusco Rosato Dolce》。《青醬鮮蝦西蘭花意粉》，只係一個35蚊嘅意粉，我食過啲百幾蚊都係呢種味，完全顛覆我嘅想法，就算係薩利亞都做到高級餐廳嘅質素。要彈嘅咪就係「冇擺盆」🤣。《香焗白汁波菜》，我完全難以相信呢個只係$20蚊！好creamy，冇諗到波菜可以咁整，又係完全顛覆咗我嘅想像。《意式瘋狂水煮魚》，我係聽到隔離枱講水煮魚，我仲吓咗聲「水煮魚？」，我睇番menu，原來係西式，我見到二話不說要點佢，味道係好正，有點帶酸味但又令人開胃嘅菜式。《原味雞翼》，佢嘅雞翼相信係我食過最好食嘅雞翼，一嚟唔算細隻，二嚟好入味，我唔知佢用咩醃，但個味道係非常正，正到我幾乎想買佢個冰鮮雞翼。《肉醬多利亞》，我一向都討厭肉醬，但佢個肉醬又偏偏出奇地好食。《黑椒蜆肉煮》，味道算係正常嘢，但略嫌有少少乾。《青醬煙三文魚配西蘭花》，呢個對我嚟講好一般，甚至可以話唔好食，連我咁鍾意食三文魚嘅人都「咦～！」咗聲，可以唔使叫。《鮮蝦冷盤》，呢個可以用差嚟形容，冇味，一啲都唔好食，我認為要刪除佢呢個菜式。《歐陸風烤香腸》，屬於正常嘢，又講唔出有咩個人之處。《三倍水牛芝士薄餅》好香濃嘅芝士味，我想話$38蚊，超市買急凍都唔得啦。《開心果冰雪蛋糕》，濃郁嘅開心果味，完全係我想要嘅味道，聽講某啲冰鮮店有得買，要去入貨先。《比利時朱古力千層蛋糕》，好香濃嘅朱古力味，得知出面都有得買，又係可以入定貨。仲有一堆出唔到咁多相就唔講了，只係純粹分享一下呢個體驗，佢嘅嘢明知係預制，但又勁多人食，始終佢又真係平靚正，聽講話佢已經加咗價「貴咗好多」！好似我哋咁叫法就真係貴咗好多😅。對我嚟講呢度除咗美食，更加係一間好正嘅酒吧，有得食又有得飲，飲飽食醉就返屋企，最正就係咁。…查看更多
