相馬日式火鍋 觀塘

週末放假又是時候大吃特吃，今次就來到位於觀塘的相馬日式火鍋飽吃一頓shabu shabu。餐廳面積雖不大，但卡位座位坐得頗寬敞。晚餐時段提供限時90分鐘放題，美國頂級牛小排套餐附送海鮮及炸物放題，星期一至四成人每位 $308，五六日及公眾假期為$328，需另加$10醬油費。火鍋湯底有多達12款選擇。湯底加$18 就可轉成鴛鴦鍋，選了牛乳拼豚骨湯，我自己就比較喜歡牛乳湯，入口滑溜溜的很順口，散發陣陣奶香。除了湯底之外，其實火鍋的醬料也決定了味覺，醬料區亦可方便人客自行混醬，混出最適合自己的口味。自助Bar 提供多款火鍋配料。晚市有多款炸物、天婦羅和燒雞翼無限量供應，全程亦沒有漏單。一坐低侍應會奉上兩碟頂級牛小排、海鮮拼盤、豚肉和雞肉各一。美國頂級牛小排切得大小均一，色澤嫩紅，油脂分佈細緻平均，肥瘦勻稱，可以無限量追加。牛小排相當高質，肉質細嫩，就算不小心放在鍋內過久，也不會令牛肉變得過韌。豚肉片肥瘦適中，雞肉滑嫩不鞋口，沒有絲毫雪味，加上貼心地已經去走雞皮，不會令湯底過份浮油。還可以任食廣島蠔、日本帶子等海鮮，打邊爐也可嚐遍海上鮮。個人推介日本帶子，肉身光滑細緻，味甜富彈性。大頭蝦內藏豐腴的蝦膏，蝦肉爽口彈牙。天婦羅可選蝦、冬菇、秋葵、茄子及蟹棒，即叫即炸，外層麵衣粉漿不算太厚，入口酥酥脆脆。炸物同樣都是剛剛炸起，熱辣辣又脆卜卜，除了多款炸丸之外，還有洋蔥圈、蝦餅、庶蝦、蝦多士、蝦球、吉列蝦、米網蝦春卷等多款小食。就連燒雞翼也有七款口味之多，包括蒜蓉牛油、芝士、蜜糖、黑椒、南乳、土匪和豉油，一咬開肉汁豐富，香口惹味，而且切成單骨雞翼，食時更方便。丸類和蔬菜亦算多款，包羅萬有。重點是這裡可以任食Milk Top 雪糕，實屬坊間放題罕見。總共有三款口味，作為抹茶控最愛的當然是翠綠的抹茶雪糕，質感軟滑，滲出微瀝幽香的茶味。飲品都是無限量供應，放於雪櫃內任人自取。…查看更多

今晚同對面阿同事OT 完齊齊離開公司，好鬼死肚餓，又甘啱我哋兩個今晚都冇飯開，所以就結伴去醫肚。由朝到黑唔停手，消耗左好多腦力，只有食返餐勁先可以補番下。突然間比我諗到呢間牛肉鍋，之前試過同佢一齊來食lunch，試過D牛好得。可惜lunch 時間唔夠，我哋又唔係叫任食,所以就住就住不能盡興 ，今晚一於翻焯先。由於上次食過有信心，今次我哋諗住食好D叫咗美國頂級牛小排$288 任食，大戰牛魔王。湯底我哋叫咗豬骨湯同埋蕃茄湯，兩款湯底都偏淡，但係加入啲自選雜菜配料落去煲煲佢就好味啦！反而最怕啲湯底越煲越咸就真係難攪了。 等食期間，去掃一轉個場先。餐廳不是很大，约十幾二十張四人枱左右。所以佢的任食區域位置都不是太大。小小空間放滿飲品、雪糕同火鍋配料。火鍋配料有成二十幾種，都可以算應有盡有，refill 都算快手架 。配料中最鐘意佢個誠意黑椒丸同埋芝士丸，好味！首先佢會上兩碟牛肉，美國頂級牛小排果然係靚，油脂閃閃而且分佈平均，睇個樣就知掂啦。焯一焯轉顔色就食得，切得唔算薄，有咬口有牛味又唔韌，堅好味。我都唔記得自己到底食左七碟定八碟，後來的肉水準都 keep 到，任食真係很爽。除左靚牛，佢仲會包任食豬肉同雞肉。佢D豬肉質素唔錯架，夠嫰滑，食得過，我偷聽到隔離枱對佢讚不絕口。雞肉係去皮的，冇咁肥，晶瑩剔透啖啖肉，正！最後當然唔會放過佢既雪糕啦，係 milk top 喎！平時出邊好少有milk top架，我試曬三種味芝麻+ 綠茶 + 牛奶，仲食咗兩轉，爽呀！雖然呢間舖仔細細，但我都幾欣賞佢D坐位夠闊落，枱又夠大放食物。呢方面好過有D一人一鍋為左做多幾枱而張D枱做到好窄，基本上放食物都只能層層疊，迫到連電話都無得放。仲要臨尾果十幾分鐘不停陪你倒數，非常無癮。响呢方面相馬都幾抵讚，不枉我地食完又食。加上佢任食的高質靚牛，會再 encore 的。…查看更多