羊滋味

🛖阿豬媽好鍾意食羊，熊妹知道太子近期開咗間專食羊嘅地道小店《羊滋味》，就滿足下阿豬媽嘅羊慾啦！📌門面大大隻招牌《羊滋味》三隻字，真係無戴眼鏡都睇到👀。話就話係小店，但係地方都唔算細喎，都有好幾張四人枱同埋六人枱，枱與枱之間都有好有空間，唔算好壓迫。📌牆上有掛上充滿蒙古氣息嘅吊飾，有葫蘆、羊角等等，好特別喎！📌餐牌📋都幾多款式揀，有砂鍋米線、小菜跟飯、水餃、羊扒、炒菜、燉湯、涼拌小吃，仲有羊腩煲添，係一間羊肉小菜館！燒椒皮蛋，$48餐前小食梗係點個涼拌菜啦，燒椒皮蛋真係不二之選。一個木盅裝住一大兜皮蛋，仲配上一個木樁，好特別嘅方式呈上。皮蛋嘅份量係超級多，一般皮蛋起碼切成8至10件以碟上，呢個木盅皮蛋，只係切半，大大件，仲要有好多件，切半可以保留住入邊嘅溏心，路上好多蒜蓉粒同椒皮，味道係帶少少甜味嘅辣，大大件皮蛋咬落口真係好滿足，又足料又抵食，認真推介。羊肉餃子，$48餃子可以以湯餃煎餃或者蒸餃嘅形式烹調，阿豬媽話試吓清湯餃，可以好出羊肉嘅味道。份量有七大件，先飲一啖湯，清湯嘅味道有羊肉味，幾有驚喜！羊肉餃子咬落去，泌出羊肉汁，騷得來又唔油膩，加上芫荽同蔥花🌱，多一重草青味又可以解一解羊騷味，好唔錯喎！內蒙酸菜餃，$38食完羊肉餃子未夠喉，想試多款餃子，就揀咗呢款內蒙酸菜餃。有六件湯餃，Size好大一粒，比起羊肉餃子，酸菜餃嘅餡料比較紮實，啖啖豬肉撈埋剁碎的酸菜，酸菜濃烈嘅味道用上淡味嘅豬肉，呢個配搭唔錯，反而如果用上都係濃味的羊肉就應該冇咁夾啦！肚包肉湯，$68好特別嘅一款湯包小食，一碗有兩大件，貴精不貴多✨，用羊肚包裹住好紮實嘅羊肉餡料，真係成舊湯包都係羊肉，羊騷味出晒嚟，又有羊肚的煙靭，好似食緊成隻羊落肚，熊妹認為呢碟菜式絕對係鎮店之寶🏵，真係值得一試！水煮羊肉飯，$78食咗咁多款小食，都要叫返款主食嘅！平時水煮牛水煮魚都食得多啦，水煮羊真係好少食。好大兜鍋呈上，份量唔少喎！入邊有好多芽菜、木耳、迷你豆腐卜、黃花，仲有生菜做底，配料都已經夠吸引，當然唔少得主角羊肉片啦！用上好多花椒八角爆出嚟嘅水煮辣湯汁🌶，辣得來帶少少麻味，不過都係蓋過唔到羊肉嘅騷味，但係味道又好夾喎，咁惹味嘅餸菜配飯真係一流，仲要價錢咁平民，成件事真係街坊抵食價。📌食咗五款嘢都唔使$300 ，仲要唔使加一，真係頂住個肚離開。喺香港地真係好少食到咁地道嘅羊肉味，仲要價錢唔貴，下次嚟一於要試吓個羊腩煲🍲！…查看更多

同朋友仔嚟到呢間主打羊肉嘅內蒙特色菜，緊係要嘗試吓各款唔同嘅羊肉美食。一整個食羊無限好好好 😹燒椒皮蛋 - 皮蛋加埋辣椒，蒜頭。簡單組合作位前菜夠晒開胃醒神，自己落手盅爛更滋味~涼拌蹄筋 - 呢味第一次食，蹄筋係爽爽哋嘅膠質加粉粉哋嘅肉肉。配涼拌汁料又有芫茜又有花生個人覺得成個口感同味道有啲太過於 complex 😂羊肉餃子(7個) 🥟 揀咗比較小見嘅蒸餃，呢度嘅成品仲好過某羊肉米芝蓮店，起碼出嚟唔會蒸到溶溶爛爛，仲係隻隻都成形嘅！韭菜加羊肉味濃，入面仲有少少羊湯汁，好食~是日重頭戲枝竹羊肉煲 (我哋要咗細份)，南乳口味嘅鍋底配搭蒙古羊肉，羊腩鮮嫩唔靭，羊皮香，點埋腐乳醬更加正。鍋入面仲有唔同嘅嘅配料，最正係索咗湯汁嘅枝竹同埋爽口嘅馬蹄冬筍~ 店家仲好貼心哋送埋粟米生菜比你打埋邊爐~加分佢哋除咗枝竹羊腩煲之外仲有加入當歸、川芎、杞子等中藥材嘅滋補羊腩煲 ~呢款都想試，下次嚟挑戰埋最後，多謝店家仲請我哋食葱油餅，外脆內軟好香，nice~欣賞店家有好多一人份菜式，就算自己一個都可以嚟食羊~ 另外，鍾意獵奇嘅朋友仔嚟到可以留意下佢哋嘅特色菜menu，可能有驚喜哦~🐛🐛🐛…查看更多

食物質素一般，但係就勝在夠熱辣辣，2點半啱啱過咗飯市所以唔使等位，有好幾次都想將隔離枱 order 咗嘅嘢放低比我哋，當時得3枱客其實可以用心啲嘅，手抓羊排呢個價錢份量唔係好抵，叫咗炸饅頭冇影相，覺得最好食，男服務員細心攞碗仔比我哋，服務態度很好，店舖仍有進步空間…查看更多