佐賀燒肉谷 (大鴻輝(荃灣)中心) (已結業)

荃灣大鴻輝中心不嬲多嘢食，好耐冇食燒肉，就揀咗佐賀燒肉谷試試佢😋我同男朋友今次揀咗100分鐘level 4極上和牛海鮮放題，一早訂定枱就順便入座喇😎💕煙燻壺漬封門柳首先上枱嘅喺封門柳，一條長約30厘米嘅封門柳，味道超濃郁，肉質鮮嫩，一試就愛上🤤推介👍🏻💕牛肉頭盤頭盤包括咗極上牛小排、安格斯牛小排、嚴選牛肩里肌肉、太切SRF和牛三叉肉等，大部份肉質都鬆軟，有濃厚牛肉味，再配燒肉醬效果更佳😚薄身嘅牛肉唔小心燒耐咗會變牛肉脆片，但好好食，大家都可以試下🤣可惜肩胛翼板肉偏韌，就有小小失望🥹💕豚肉雞肉類雞肉豚肉都好滑，尤其雞腎燒完後好香好食好脆，所以我胃細都要encore了🫶🏻💕海鮮類海鮮俾到我超大驚喜，廣島蠔好鮮好好食😋鯖魚搭配燒肉醬一流，十分之嫩🥳清酒煮蜆估唔到好鮮味，可惜一盤得3粒，推介大家黎到要叫夠兩三盤🤣💕甜品類雪櫃嘅甜品有奶凍、紅豆粿子、芝士蛋糕，味道一般，失色咗小小，不過雪糕機好驚喜，乳酪雪糕配任加棉花糖朱古力，唔會死甜，好fresh👏🏻旁邊仲有豆腐花，不過我胃仔細，食唔落喇，下次再試🤓⭐️⭐️⭐️總結黎講，抵食，食材質素好，服務周到，㩒個制就可以要求換燒烤網，環境闊落好坐又整潔，唔會好大油煙味，值得再去👍🏻👍🏻…查看更多

小弟本身算不上日式燒肉迷，喺好久唔久都會幫襯吓，對上一次食日式燒肉都喺半年前嘅事。最近過開荃灣食飯，晌街上接過「佐賀燒肉谷」嘅宣傳單張，做緊午市二人同行第二位半價優惠，四人同行就一人免費，抵喎！所以，就約咗一位同喺食肉獸老友一齊過嚟大擦一餐日式燒肉午餐，講開呢位老友，就絕對用得上個「老」字，由一齊讀小學、上中學……到依家，情誼珍重。從餐廳門口睇唔出，入面原來都幾大，個鋪位好深長，裝修幾骨子，地方闊落光猛，唔止通道寧舍寬闊，啲卡位感覺亦寬敞:)。牆上亦有啲得意嘅彩繪漫畫，色彩搶眼。當然，最緊要喺做足防痠啦，卡位前後固然加高咗木隔板，就連側邊亦加設膠隔板，點都會予人客安心啲。餐廳共提供5款放題套餐，定價$268-$458（5:00pm前或9:00pm後入座，另減$40），正所謂平有平食，貴有貴食。除指定嘅肉類、海鮮、蔬菜作燒烤之外，套餐好似啲日式放題咁，仲可以任點沙律、小食、冷盤、特色料理、主食……等等由廚房製作嘅菜式，十分多元化、多選擇，夾夾埋埋可以講有百多款美食。唔一定全程都要食烤肉，好適合一家大細嚟，迎合到各人口味。但有人會話，就算咁，我食得唔多，都喺唔抵，無問題，佢哋有啲午市定食套餐，已包前菜、沙律、白飯、味噌湯、飲品及甜品，是日所見，$88起就有交易。我哋一心嚟狂掃牛肉，自不然喺對準放題啦。除咗落單點嘅菜式外，場內仲有啲以自助形式，任拎任食嘅食物，如沙律吧、港式小食、飲品、甜品。田園沙律小弟就慣性先食啲蔬菜落肚，開開胃先，尤其食自助餐、放題之類，否則，一陣咁多肉，好易滯住個肚。晌沙律吧度樣樣都執啲，淋啲柚子沙律醋，酸酸爽爽，提升戰鬥力，哈哈！ 春卷、咖喱魚蛋、蘿蔔牛腩呢啲就唔喺我拎嘅，老友好大食，佢咩都過試吓。啲春卷唔喺好得，但啲咖喱魚蛋唔錯，最估唔到喺啲蘿蔔牛腩，蘿蔔好清甜，入口無渣，而牛腩炆到好軟腍鬆化。 正所謂工欲善其事，必先利其器，枱上已放好餐具，更有埋放口罩嘅信封，而用作烤肉嘅鋼夾、鉸剪，準備就緒。順帶一提，烤爐採下抽式，而且抽力強，食完成餐，一身都完全無油煙味。當然，亦唔少得醬料呢個大配角，每人會送上燒肉汁、韓式辣醬、燒肉谷蒜醬，各有特色，配合唔同食物，個人而言，都唔好點太多，盡量食番食材嘅原味。 除咗工具、醬料，食燒肉嘅另一拍檔就喺啲飲品，整整一大排雪櫃，都無數有幾多款飲品，總之就非常多，更提供埋即磨咖啡、熱茶，務求做到各式其式，人人都有合適。我哋亦唔客氣，一口氣先拎幾罐埋位，唔使走幾轉，邊食邊飲。特色前菜雖然喺放題，但餐廳都搞小小花臣嘢，每位客人都奉送一份小冷盤，仲會日日唔同，今次喺南瓜蓉伴麥芽餅。啲南瓜蓉勁好食，打得好綿滑，充滿南瓜味，非常香甜，當牛油咁搽落塊餅同食更喺一流。 C.極上牛小排配海鮮放題 $368我哋揀咗中間價位嘅C餐，因為，已經包咗好多款牛肉，加加埋埋其他嘢，其實都試唔晒。而落單無耐，就先送上一系列靚牛唔同部位：精選牛肋肉、牛舌、牛肩胛肉、霜降一口牛、極上牛小排、牛翼板及煙燻壺漬封門柳，如果唔喺有個牌仔標明，相信都識唔晒咁多。每款肉都色澤鮮紅亮麗，加上以木架呈獻，非常吸晴。 精選牛肋肉、牛舌、牛肩胛肉我哋兩個都算喺食肉獸，老友更喺好「擦」得之人，所以，你見我哋真喺點咗唔少嘢，一輪烤肉，又一輪海鮮，跟住又燒吓啲蔬菜，然後又一輪肉……。故此，今次就真喺唔逐樣逐樣食物咁講，但可以講，食材嘅整體嘅質素喺中上，性價比絕對高。 霜降一口牛、極上牛小排、牛翼板再燒一輪清晒啲靚牛肉先，睇到牛肉啲油花又靚又平均，真喺未食都知好好食，輕輕沾丁點燒肉汁已可以大大提味。 煙燻壺漬封門柳攤出嚟真喺好大件，我諗都有平時鋸扒8安士嘅份量，我諗散點一件都要成嚿水。見表面有啲位鎅開咗，店員話師傅將啲筋位鎅走，唔怪之得口感超腍滑，又帶有濃濃肉香，加上以醬油醃過，好惹味，喺是日我哋嘅翻兜之選。 A5佐賀和牛 $98食到以上嘅幾款肉已經夠晒滿足、止癮，但老友真喺肉痴，加配一份佐賀和牛，佢話呢個價錢喺超抵食。一客有8件，油花平均，厚薄均一，店員更特別叮囑，每邊焫30秘即可，咪過火。果然，輕輕一焫，肉質腍滑，且極富油香，正呀喂！厚切豚五花、霜降豬頸肉、和風叉燒、蒜味雞鎚肉試咗啲牛，跟住試吓啲豚肉、雞肉，我哋兩個都唔怕肥，豚五花就一定要試，燒完極具油香，大可用韓式食法，沾啲韓式辣醬，以生菜包住食，減低邪惡感；豬頸肉就喺老友心水，貪其口感爽脆，而雞鎚肉好嫩滑，醃得非常入味。海鮮食完一輪烤肉，就輪到試試海鮮喇，分別點咗清酒煮蜆、牛油香草燒帶子、牛油帆立貝、香草海鹽蝦仁、墨魚仔。大大粒嘅帆立貝當然正啦，老友之後再追加幾轉，而清酒煮蜆都喺小弟推介，啲蜆好鮮甜，飲得吓酒嘅就更加唔好錯過啲清酒湯汁。野菜盛盒又肉、又海鮮，喺時候嚟一輪野菜平衡吓。先點咗原隻冬菇、茄子、翠玉瓜、南瓜同生菜，啲菜唔似肉有咁多汁，放晌外圍慢慢烘。啲冬菇超好食，燒過之後，菇味十分濃縮，所以，再點第二輪蔬菜時，喺翻兜之選，而南瓜亦非常粉甜。除咗牛肋骨肉及白豚梅花肉，其他都喺再添食，好似極上牛小排、精選牛肋肉、厚切豚五花、霜降豬頸肉、墨魚仔……等等，兩個食肉獸呢一餐真喺滿「載」而歸，咁食法，如果出去食散點嘅日式燒肉，淨喺以上呢埋肉類同海鮮，未計飲嘢及其他，每人都要三百蚊落下。再食兩輪燒肉，點都要嗌多一份野菜盛盒補一補啲纖維素，感覺無咁罪孽深重嘛。呢一轉嗌咗菠蘿、蕃薯、原隻冬菇、翠玉瓜，烤熱嘅菠蘿真喺一流，收收水之後，入口寧舍甜；冬菇再食，都喺咁正，不過，啲紫薯切得薄，好易燒乾，老友話入口似厚切薯片多啲。炸芝士年糕、椰汁流心球、榴槤炸彈甜品方面，臨尾就預咗食雪糕，因為可以自己唧，但趁截單前再先點定一份「甜品三拼」，其實已經喺炸熟咗，不過，擺咗一陣，我哋就再烘翻熱。三樣嘢都推介，炸芝士年糕裡面勁多芝士，又綿又香，椰汁流心球裡面嘅椰汁流心好澎湃，濃濃椰香，而榴槤炸彈當中嘅餡心榴槤味強勁，兼好軟綿，若非飽到上心口真喺想追加多兩粒。乳酪味雪糕飲品櫃嗰邊有啲和式、西式甜品，如紅豆和果子、泡芙、布朗尼，甚至百福豆腐花，不過，小弟就想食雪糕降降火熱，雪糕有乳酪及朱古力口味，之後見佢哋改咗抹茶味。乳酪味雪糕酸酸甜甜，好清爽，加少少朱古力針同朱古力豆，喺幾唔錯嘅降溫小甜點！食任食火鍋、日式放題……最好就喺一個價任食，有晒預算，睇我哋兩個麻甩佬食咁多輪，仲要咁多肉，點完又點，就知都喺好食先會咁。加上午市做緊大優惠，就算額外加多份佐賀和牛，老友都仲喺覺得好划算。而且，地方闊落、座位寬敞，服務又貼心，基本成餐飯無上漏，亦無上錯，此外，都上得幾快，另一邊收拾枱面亦快手，服務一環值得一讚。最搞笑，老友啲醬汁點到無晒，向店員再要求多少少燒肉汁，佢初時停一停，之後微笑一下話轉頭拎，後來就知道連啲醬汁都可以用二維碼系統落單架！…查看更多