龍糖坊 (寶漢大廈)

前兩日同朋友喺銅鑼灣食完飯想再搵個地方坐多陣，就去左波斯富街新開嘅龍塘坊食糖水，星期五晚9 點幾到大約排25 分鐘，店舖入面都少逼，但算非常整潔。Menu 選擇好多，除左傳統嘅中式糖水之外，都有雪花冰，巴斯克芝士蛋糕之類！我揀左焦糖娟姍雙皮奶，朋友就揀左招牌蛋白杏仁茶同羽衣甘藍菠蘿汁，焦糖雙皮奶其實就係傳統嘅雙皮奶上面加一層creme brulee 嘅焦糖，雙皮奶唔算太甜，所以同焦糖一齊食都唔會擔心太甜/ 太漏。而杏仁茶就好濃嘅杏仁味，上嘅時候都仲係熱辣辣。羽衣甘藍菠蘿汁由於菠蘿味比較重，所以飲落冇好青嘅味道，如果食得太飽唔想再食糖水，呢杯健康嘅飲品都係一個好選擇！呢間糖水舖雖然唔算坐得咁舒服，但位置非常方便而且性價比頗高，期待下次返去試其他甜品 ❤️…查看更多

呢間新開嘅糖水鋪係龍點心旗下嘅新品牌🐉裝修同龍點心一樣咁有心思 傳統中帶點新潮就好似佢地嘅食品一樣 有傳統同新派糖水 亦有西式糕點🍰🍡 焦糖娟姍雙皮奶 ($40)傳統嘅雙皮奶加上一層焦糖脆面 焦糖面好脆 好似食緊焦糖燉蛋咁🍮雙皮奶方面 店家採用奶脂較高嘅十字牌娟姍牛牛奶食落口感順滑 奶味香濃 唔錯😆🍡 芒果河粉 ($58)河粉以椰奶製造 有淡淡椰香 口感十分滑溜配撘芒果泥同椰奶一齊食 味道不錯☺️不過略嫌芒果粒有點兒少🍡 芝麻湯圓娟姍奶燉椰皇 ($70)椰皇面頭放左三大粒芝麻湯圓湯圓外皮軟濡 內餡飽滿燉奶同樣採用娟姍牛奶 更帶有些微椰香仲可以刮埋啲椰子肉出黎食添😋值得一提嘅係店舖營業時間由朝早11點半去到夜晚11點半啱哂咁多位夜貓😉…查看更多

- 銅鑼灣｜龍糖坊 -▪️一碗大滿足🥣一碗有8款配料，包括椰奶、芋圓、桃膠、蓮子、仙草、西米、香芋，同埋紅豆🫘，非常豐富。其中香芋同紅豆都煮得好綿密，整體唔會太甜▪️焦糖娟姍雙皮奶🥛雙皮奶入口細緻嫩滑，奶香十足。面頭有一層燒到脆脆哋嘅焦糖，口感更有層次之餘，亦都增添一份甜味▪️芒果河粉🥭芒果蓉味道香甜，唔會酸，仲有啲芒果粒增加咬口。河粉好滑溜，帶有淡淡嘅椰香，撈埋芒果蓉一齊食，幾fresh龍糖坊📍銅鑼灣波斯富街24-30號寶漢大廈地下A號舖…查看更多