Extraordinaire Camus cognac，陳年佳釀老酒買少見少，絕版飲一支無一支﹗香醇潤澤飽滿厚身回甘，香氣在喉嚨及舌尖門遊蕩徘徊﹗陳年老酒可遇不可求，雖然不知道年份，飲落醇滑味香濃，估計超過20年佳釀。酒逢知已千杯少，大啖肉大啖酒爽乎﹗未開飯已輕微斷片，飲到頭盤送到已中度斷片，食食下直頭 AI 人工智能系統全開﹗諗住大大碌威士忌飲唔晒，啜下啜下一滴不留，再轉啤酒繼續飲勝！Sonderberg 森堡啤酒，完全唔知什麼來的，上望睇一睇，味道正常可以無問題。南乳豬腩肉，先來化皮再來乳香瘦肉，咸鮮味突出略濃，啖啖肉沾點南乳醬撈飯非常醒胃﹗蒜蓉炒西蘭花，爽甜翠綠，烚一烚快炒落味，蒜甜菜鮮﹗椒絲腐乳通菜，乳味飄香，椒絲惹味，大大注夾著嫩綠水通搭著椒絲掛滿汁，燙著嘴份外甜美。小炒皇⭐️⭐️⭐️有銀魚仔、蝦乾、蝦米、魷魚、韮菜花、彩椒、洋蔥、腰果，百鳥歸巢有鑊氣﹗最緊要多款食材齊齊趙，單一地品嚐食不到此道菜的精髓﹗韮菜花爽甜無渣，搭蝦乾魚仔份外美妙﹗豉汁蒸䱽魚⭐️⭐️⭐️茄子被鹿鳴居玩得出神入化天外飛仙，而蒸魚就非銓仔記莫屬﹗時間掌握得不差分毫，嬌嫩的魚肉散發濃濃魚甜味，啖啖魚汁夾雜豆豉香氣，整條損得一乾二淨一絲不掛，全身都係寶﹗蒜辣雞翼尖⭐️⭐️⭐️助酒浪伴，滑啫啫夠辣夠蒜食越辣越起勁﹗啜到嘴仔軟啊。川芎白芷天麻魚頭湯⭐️⭐️⭐️⭐️⭐️魚雲已斬件不是原隻魚頭，幸好保持鮮滑﹗天氣凍冰冰飲啖熱湯暖暖胃，豐胸魚湯最適合不過。魚鮮味突出，還有薑味酒味藥材味緊接著，最緊要趁熱飲啊﹗白灼游水活海蝦⭐️⭐️⭐️雖然煮耐了一丁點，不過游水生灼鮮爽無比，仲有甘香蝦頭膏點綴就更加可口﹗蝦肉在嘴裡紮紮跳，活力十足﹗韮菜豬紅⭐️⭐️⭐️豬紅浸得入味不鞋不腥，滑滑味濃帶汁，不過始終最愛長毛潮和興出品。清蒸兩斤半海鷹䱽，巨大靚魚可遇不可求，在街巿魚檔搶回來的兩斤異獸﹗師傅蒸得分秒不差，厚厚啖啖肉當牛扒食，嬌嫩無比鮮味一飛沖天，滑不溜口，魚汁噴射﹗貼心地另上不平凡的蒸魚豉油，讓食家們可以選擇直接淋上或是慢點享受。魚肉扒滾埋秘製蒸魚豉油，躺在大大啖飯再一齊釀入嘴仔慢慢享用，美味不停遊蕩及迴響，全世界像靜止了一樣。豉椒炒花蛤皇⭐️⭐️⭐️⭐️⭐️師傅生炒誠意十足，不是汆水翻炒兜汁﹗花蛤肉飽滿肥美滑嘟嘟，彈牙不韌爆晒汁，鮮味迫人要趁熱搶住食，豉椒香口惹味不混濁，芡汁厚薄適中不一舊舊，牢牢包著每粒靚肉如虎添翼﹗拆到满满一碗花蛤肉撈埋少少香辣豉椒汁，狠狠地連飯帶肉掃晒入口，爆汁爆味百味交差好食到曉飛﹗薑蔥炒花蟹⭐️⭐️⭐️蟹拑幼長沒幾兩肉，幸好原條拆出再整條塞入口夠鮮夠甜都是滿足的﹗蟹身鮮肉一梳梳大大舊夠睇頭，拆滿一埋再掃入嘴仔就更加開心﹗我個人喜歡食巨蟹，最好每隻都要半斤以上，啖啖肉先夠霸氣啊﹗所以大閘蟹我麻麻地喜歡。薑蔥炒魚卜⭐️⭐️⭐️雖然有點過熟而變得脆而韌，不過薑蔥味道已滲入每隻魚卜，可口惹味焦香有鑊氣，給多點牙力慢慢趙吧！另類享受。上湯焗龍蝦伊麵⭐️⭐️⭐️澳洲龍蝦完成度極高，脆甜鮮味無比彈牙，恰似在嘴裡游緊水一樣，滿星無可挑剔﹗伊麵煮得有點過火，太腍太濕太散碎，要用羮筷雙管齊下先夾得到，味道索盡上湯滑嘟嘟全部跌晒落肚。馬拉盞炒通菜⭐️⭐️⭐️爽甜翠嫩的通菜，焗夠時間讓馬拉盞味道完全迫入菜中，大注大注地享用，爆汁舒服，菜甜味非凡夾雜香辣咸鮮更加醍神﹗椒鹽花竹蝦頭⭐️⭐️⭐️游水花竹蝦用作刺身，剩返個頭當然不要浪費，走走油炸得金黃酥脆再兜個椒鹽，香辣鹽魚咬掉眼珠及鋸齒就可以成隻落肚，脆卜卜食得津津有味。原條三文魚刺身⭐️⭐️⭐️比想象中香甜軟綿，魚油豐富滑滑，沾少少山葵豉油更美妙。薑蔥灼鮮吊桶⭐️⭐️⭐️⭐️原條原汁原味千祈不要劏開，保存鮮甜墨汁鮮味吊桶肉汁，雖然未能媲美游水活灼，甜美彈牙可口已心滿意足﹗豉汁蒸魚頭⭐️⭐️⭐️豉汁跟刴椒煮法各有千秋，不過大家愛刴椒更甚。豉汁的咸香風味別樹一格，魚雲魚臉珠魚三角同樣啜得我心花怒放，滑嘟嘟魚味濃郁。白灼游水瀨尿蝦⭐️⭐️⭐️⭐️⭐️發現秘技食得輕鬆，先用鉸剪從中間剪開，外殼由左右兩邊撕掉，最後只剩低中間大大條濕潤嫩肉﹗不要怕醜大大力啜，蝦汁甜到入心，鮮到講粗口不停喃喃自語，肉質幼滑可口拍爛手﹗清蒸漩水石蚌，師傅功力深厚，魚骨一點紅稱為最上成的武功﹗緊緊熟就立即出爐，鋪上蔥絲贊油，淋上豉油滾熱辣飄住煙上枱。個人一向不太愛石蚌，眼前依尾竟然魚甜味非凡完全在我意料之外﹗啖啖結實厚肉魚味濃郁，肉彈皮黏，大舊大舊地嘴嚼更是幸福﹗成條都係寶，魚春魚肝魚骨魚鰭魚尾魚頭魚三角無一幸免，都被吸啜得乾乾淨淨。豉油皇炒麵加底，份量十足混入芽菜蔥段及洋蔥更加香口，雖然我全部都唔食的，要親手耐心地全部挑走才可以安心地大啖大啖品嚐。作為麵痴的我實在忍不住一二三四碗地搶攻，黃金比例的生老抽香噴噴，麵質乾爽彈牙不過濕不過腍，趙得開心痛快﹗唯一不太開心就是剪碎了我的長壽麵，我鍾意長啜長有一氣呵成最暢快，依家只可以扒飯一樣拿起碗掃入口，或續啖續啖夾入口裡去，正如出前一丁及意粉都不會弄碎吧﹗香芫大蜆煲，印象中叫韓國大蜆，肥美巨型脹卜卜，嚥韌而充滿彈性。又係我最討厭的芫荽﹗茜味強烈而霸道，但不失其鮮甜蜆味及海水咸鮮，各種味道爭持激烈，互相輝映。刴椒蒸魚頭，完全無馬虎無求其鋪上刴椒就算，混入蒜蓉豉油陳醋等等，酸酸辣辣更添風味﹗新鮮度滿分，只要一啜便知龍與鳳，我最喜歡魚眼，啫喱狀鮮而不腥，滑嘟嘟啜得過癮。魚雲魚三角魚臉珠登，嫩嫩膠滑充滿骨膠原，滾上開胃神汁啜過不停。豆豉鯪魚炒油麥菜⭐️⭐️⭐️⭐️油麥菜爽甜極至，沒有炒到縮水同甩色。所緊要炒得夠熱夠均勻，芡汁豉味已滲入每條菜中更是美麗。蒜蓉蒸勝瓜⭐️⭐️⭐️蔬菜沒什麼選擇，來道冷門一點的。新出爐勝瓜熱騰騰多汁飽滿，先來外層結實，緊接著嫩肉滑滑，瓜甜汁香。菠蘿生炒骨⭐️⭐️⭐️半肉半骨、半脆半彈、有咬口有肉食。咕嚕汁夠酸夠濃，如果菠蘿味更出會更開心。薑蔥炒台山蠔⭐️⭐️⭐️⭐️飽滿爆汁，爽彈鮮甜，蔥段爆得超級香口，夾住蠔肉齊齊趙，更加精彩繽紛。美味金牌雞⭐️⭐️⭐️結實白肉襯托著黏滑雞皮，滾滿蔥油蒜酥一樂也﹗白菜豆腐魚雲湯⭐️⭐️⭐️黃黃濃郁的湯汁充滿魚味及豆腐味，還有陣陣菜味，十分香甜無比。沙嗲肥牛粉絲煲⭐️⭐️⭐️香而不辣沙嗲汁已完全滲透粉絲及肥牛，熱到燙嘴撈飯食份外滋味。紅燒 BB 鴿⭐️⭐️⭐️香噴噴新鮮炸起即刻飛到﹗皮脆肉嫩滴著甘甜肉汁鴿油，緊緻的鴿肉搭埋鬆脆軟骨，趙得過癮。椒鹽狗肚魚⭐️⭐️⭐️薄脆炸粉好重要，不能硬不能燶，包著極嫩白色魚肉沾上喼汁，非常和味醒神﹗啫啫雞煲⭐️⭐️⭐️不少食肆只提供雞頸雞背雞翼雞籮友，骨杉杉無肉食，諗起都把幾火﹗幸好食到良心雞煲，惹味香口有肉食，雞肉夾豬膶齊齊食就更加滋味。黑椒牛仔骨煲⭐️⭐️⭐️輕鬆牛仔骨肉醃味重手，加埋黑椒汁撈一流。…查看更多
