格格府御膳 (已結業)

一家大細食開年飯，今次簡左格格府，貪佢有特色，環境又好。年初四，7點到步，全場只有三圍，座位舒服鬆動，環境清靜，岩晒驚嘈雜既朋友。一入去就好有古代感，清朝服飾放係門口位置，係可以著黎影相架！裝修擺設都有心思，同出面中餐明顯唔同。我地一行10人，訂左個8人餐加多2份蝦球同湯，另外仲叫多碟水煮魚，份量足。前菜係五福拼盤有肴肉、醉豬手、酸青瓜、麻油木耳、胡麻醬雞絲。當中最好食係木耳同豬手。黃金大阿哥蝦球，原來單價要加97蚊一隻！一上已經好香蛋黃味，大大隻而且新鮮熱辣辣，非常香口夠味，對得住呢個價錢。菊花豆腐湯望落真係幾靚，朵花浮下浮下咁，而且味道唔錯。松子桂花魚，酸酸甜甜，外層香脆，內裹嫩滑。水煮魚麻香味濃，同樣以桂花魚入鐉，無骨又夠滑。重點係佢有大量芽菜同薯粉，吸晒d 麻辣味，好好食。我地叫左中辣，辣度可以接受，而且麻得好過癮。唯一要挑剔既係薯粉可以稍稍再淋身少少同入味少少。蔥油炸子雞一啲都唔鞋口，外皮香脆，水準都係高於預期。至於紅燒小元蹄，份量一啲都唔小，佢會幫我地切開晒一嚿嚿，方便入口。元蹄嘅肉質好淋易入口，肥而不膩。高湯浸菜苗都正常水準。格格府炒飯聽聞幾好食，反而食落有啲不足，飯粒確係炒到好乾身，粒粒分明。但係味道可以再濃郁少少。可能因為前幾道菜味道都好濃烈，呢碟飯就顯得有啲清淡了。最後嘅甜品係桂花酒釀丸子，都係一個唔錯嘅選擇黎嘅，唔會死甜，清清地，幾好味。全程嘅服務都唔錯，該換碟嘅換碟，加茶既加茶。如果一定要抽一樣嘢出嚟講，就係上菜上得有點過快，前面幾碟都未食完，就已經上另外一樣了，好似有少少趕咁，不過其實都係小小問題姐。重點係以呢個質素來講，價錢得宜，環境又好，服務又唔錯，食物又精緻。十人份量 set dinner 加水煮魚，包埋加一都係51xx。有得食有得睇有得玩，相信好多出面嘅餐廳都做唔到，下次一定會再嚟。…查看更多

以前到國內旅行，不少旅遊景點附近都會有戲服租借給客人拍照，通常我都興趣不大，但早排的延禧攻略實在好看，大大增加了我對清朝故事的興趣，得知銅鑼灣有間飯店，可以任玩皇上皇后格格皇子的戲服，心癢癢好奇去了一趟。 格格府御膳店名高檔，配合形象，店內細心佈置，頗有特色。 價位如是，每人$498 的套餐，六款食物加甜品，散店的菜都要兩三百蚊一道，選擇不多相信大家都會選套餐。 江南三小碟看來精緻，木耳、肴肉及蘿蔔各一粒。 菊花豆腐湯吃手工，切成菊花狀的豆腐很搶鏡，湯清味道可以。 宮保大阿哥蝦球名副其實的大阿哥，蝦球新鮮大隻，炸得有水準，皮脆肉彈，宮保汁甜酸惹味，並不辣。 麻婆豆腐沒有出錯，辣道輕微，豆腐滑溜。 松露醬獅子頭一人一粒，肉質軟滑松露香，味道幾好。 格格府炒飯是有味飯一碗，裏面有少少蛋絲、蔥粒及魚子在面頭，不過不失。 桂花糕是另一道手工菜，金魚眼仔碌碌，栩栩如生，另有蝴蝶及花形，內藏一粒杞子，甜度適中，但質感過硬。 菜式味道其實不錯，但份量偏小，而且上菜速度極之有效率，服務一般，不過來這裏是為玩戲服，吃一餐，都冇咩所謂啦！…查看更多

捐窿捐罅搵野食，今日來到銅鑼灣這幢較少來的地帶cubus大廈覓食。甫入到餐廳已見識到其魅力，地方闊偌，氣派非凡。一聽格格府這名已知道這是吃中餐的地方，裝潢想當然是走中國風，大大個紅燈籠高高掛。格格的梳妝台？😂到處都可見中國風擺設: 噱頭之處是餐廳更預備了多套古裝讓食客即場換裝，連頭飾也有，可以換上一整套格格服享用食物。隔離枱的食客有好幾個小朋友玩得不亦樂乎。餐具高質細緻！馬上點菜醫肚！原本想吃砂鍋雲吞雞，不過餐廳說雞🐔未送來，今日這餐吃不了，有些許失望😢。提醒大家想吃的菜記得打去餐廳確定能有得吃，可能要預約，不要像我們這樣失望而回。前菜是楓葉四小碟 雞絲粉皮勝在醬不會太多，配上青瓜吃清新口感醒胃！醉雞 - 雞肉嫩滑，酒香味濃！陳醋木耳 - 酸酸的開胃小菜，不算特別涼拌青瓜 - 少少偏咸陳醋肴肉 - 這上菜名菜有驚喜！咸豬手肥而不膩，肉質鮮嫩，啫喱水晶入口即化，試得過桂花豆腐湯入口已嚐出濃濃的雞湯味！清香味濃卻沒有雞湯的油膩感，味道恰到好處。能把豆腐切成一朵花，師博刀工可見一班！獅子頭 爽口的生菜包裹著大大顆肉丸，份量十足。肉頗嫩，獅子頭一向多肥肉，不過這肉肥而不膩，加上生菜更中和了肉的膩感。最出色在於醬汁！少少咸少少甜味道卻十分好！松子桂花魚 這道魚的醬汁就像平時吃甜酸咕嚕肉的一樣，酸酸甜甜十分惹味，卻蓋過了魚的鮮味，加上炸粉偏厚，吃不太出魚的味道，當是糖醋魚來吃。格格府炒飯 一上枱就見到多粒帶子和大蝦被嵌在飯中😂。味道如能濃少少會更惹味。大菜糕餐廳送上的甜品，完全的淡而無味，是我們不懂這懷舊正宗甜品嗎？😅窩心提醒: 在這餐廳用餐請富耐性，這餐廳出菜頗用時，就當自己是格格呀哥般品嚐每道菜吧。我們沒預好時間點了其他菜也因為等不及而取消了，要預鬆時間來吃呀！…查看更多

餐廳環境優雅，古色古香，有好多可以影相嘅位，明顯有特別設計過，帶朋友食中菜就啱哂，尤其外國朋友，一定鍾意。侍應服務貼心，有禮，招呼唔錯。菜式相當精緻，味道唔錯，尤其宮保大阿哥蝦球、醬燒牛肋條，好值一試，桂花豆腐湯，刀鋒勁，賣相幾好，味道清清地，可以。甜品桂花伴大海好好食，至於格格府炒飯，雲吞雞味道係可以，但無咩驚喜。晚飯每人平均400-500，係銅鑼灣食飯係呢d價錢，食環境同格局，一句講晒，銅鑼灣價錢。…查看更多