霜月

要平食日式高級料理，識食梗係食午餐啦！時代廣場後的霎東街，在一堆未完工的地盤中，有一橦新裝潢完工的大廈，地點不大，卻內有乾坤。在OLIV 大廈的頂樓，有一間高級日式料理餐廳，這個星期六就和一個朋友嚟到呢個高級日式餐廳，品嘗一下這個和風料理的午餐。點解我會話佢係高級和風料理？最主要嘅原因就係佢秉承了精緻日本餐廳嘅風格，裝修，服務，制服，用具，品質，碗碟等等，都一絲不苟。再嚟呢度食lunch之前我已經了解過餐廳嘅特色，知道佢哋嘅晚市，價格比較高，主要係食高級日式料理，和牛火鍋等。所以要食就一定要醒目地揀午市啦！好多時呢啲比較高級嘅餐廳午市嘅價格都會比晚市爭好遠，但係呢品質都會很有保證，絕對唔會將貨就價，所以如果響午市食，其實有賺啊！壽司同鐵板燒同其他日本餐廳差唔多，師傅都可以係客人面前即席主理。點解我話午市抵食呢？因為午市定食價格有百多元到400元嘅都有，而且種類十分之多元化鐵板燒，和牛，烏冬，刺身，壽司等等一應俱全，如果係晚市食嘅話，未必可以以咁實惠的價錢食到。set lunch 全部配有有機雜菜沙律、日式燉蛋及味噌湯。比較欣賞佢嘅日式蒸蛋，足料又有小小鹹香的獻汁令到平凡的蒸蛋變得更吸引。主角係吞拿魚腩日本海膽飯 $350Toro 用上中toro , 帶點筋，更有質感，分量很夠有六七片中Toro , toro 新鮮無比，入口溶化，魚嘅油金香味迅速滲到口腔內，配上鮮甜海膽，味道很回甘，伴上甜蛋中和和日本米，如果說＄350貴，我會說＄350物超所值！單單一片如此新鮮和美味的中toro 的壽司，也大概在賣$80以上一件，這個部門中toro 和海膽的飯才＄350！値回票價，物有所值。另外我哋重點左日本牛肉網燒定食，網燒牛肉定食可選美國牛或日本和牛，難得嚟到食日本料理，要吃就當然要吃最高級的啦。生熟度可選，朋友比較怕生，所以叫了八成熟。一上枱已經被吸引，首先就看到網燒牛肉嘅表面還有一浸牛的油份。十分有光澤。生熟到控制亦都十分好，入口即溶嘅感覺，大概只有和牛先做到。全碟牛肉完全無筋，每一啖都鮮嫩無比，牛肉味香濃，火候控制都好好！八成熟只會看到小小紅，咬落去都仍然能夠保存牛肉嘅質感同埋肉汁，係廚師嘅功力，亦係靚嘅和牛先可以做得到，可以不添加任何調味都食得出牛肉的鮮嫩，也可以沾青檸/ 沙津汁，又會有另外一種味道。不過個人建議就係不添加任何調味因為呢一個和牛十分出色！但由於回味主菜嘅和牛同埋刺身飯。所以雪糕幾好食呀，無刻意品嘗！呢度嘅碗碗碟碟全部都用上高級日本產的陶瓷，有碗碟都食物都服務每一個細節都本着日本料理的細緻。絕對是日餐causal fine dinning 的不二之選。大家千祈唔好俾佢嘅午餐要幾百蚊嚇到當你品嚐過之後你就知道，午餐食最抵a ！…查看更多

有朋自遠方來當然要「食豪DD」啦！位於霎東街OLIV 24 樓既「霜月」交通十分四通八達，喺正時代廣場後面，地鐵、巴士、小巴、電車等等全部都係within walking distance，就算要去晒全港九新界都冇難度！一出電梯只見彎彎曲曲既走廊將餐廳分為兩部份，左邊係壽司/魚生 bar枱，而右邊就係用餐區同VIP房，格局分明。枱與枱之間非常闊落，一貫高級日本餐廳格局，同果D「扮高級野」之流絕對唔可同日而語！午市定食套餐非常多元化，由百幾蚊既牛肉鍋、烏冬定食以至四百大元既和牛定食都有。值得留意既係不論價錢，所有set lunch一律配有機雜菜沙律、日式燉蛋及味噌汁。有機雜菜沙律、日式燉蛋及味噌汁︰雜菜沙律落左平時食牛肉飯時經常使用既味粉，所以令到感覺非常開胃醒神，連平時唔鍾意食菜既我都忍唔住清晒佢。日式燉蛋方面，喺白滑既蒸蛋上面果層薄薄既茨汁令到個蛋唔會好似坊間果D既味道咁寡，誠意推介！吞拿魚南日本海胆丼 ($350): 幾塊中指咁長既吞拿魚鋪滿晒喺魚生飯上面，講份量真係一D都唔姑寒！味道方面，吞拿魚除左鮮甜之外，更加可以喺咀嚼時感受到佢既質感，口感非常特別。海膽方面感覺亦都好清新，唔似坊間好多將貨就價，「腥到爆」既質素之流，放喺甜蛋上面一啖咬落去既感覺真係超正！月見碎吞拿魚腩片 ($250): 除左上面已經介紹過既海膽之外，特別要提一提呢度一片片好似凡立貝（sorry，我唔係好知係乜野魚！）既魚。非常鮮甜唔在講，入口亦都非常爽口同埋清新醒神，絕對係除左吞拿魚以外既另一佳選！日本牛肉網燒定食 ($400): 網燒定食分美國牛肉 ($200)同埋和牛。都係果句，「一分錢一分貨」，和牛入口時非常鮮嫩，一D鞋口既感覺都冇，加埋青檸酸酸的口感更加可以中和返和牛因為油脂而黎既油膩感。所謂「越好的食材就應用越簡單的烹調方法」，我覺得碟邊的沙律醬完全可以放埋一邊，「原汁原味」一啖和牛、再一啖白飯就可以完完全全食到和牛juicy既感覺！甜品分別係「綠茶roll」及「柚子雪糕」。綠茶卷的味道十分清新，中間的cream亦都唔算太濃味，十分適合好似我呢D鍾意食「少甜」既朋友。柚子雪糕方面應該係自家製的，因為裏面既柚子真係非常足料！味道方面甜甜地之餘又帶少少酸，非常適合喺食完好似和牛呢D咁濃味既食物之後淺嘗，再配埋玄米茶就可以解晒口腔既油膩感啦！除左食物質素同用餐環境之外，特別要讚一讚呢度既服務水準。侍應們非常細心，經常幫我地加茶不特止，重會主動幫我地收碟，同埋喺每道菜上枱之前為我地介紹食材既資料同埋食用方法等等，服務完全係高級日本食肆既水平。整體黎講，呢度絕對係陪客食飯或者casual fine dining既不二之選！…查看更多

是日同朋友們返完教會後就黎到開張無耐既「霜月」一試。餐廳位於銅鑼灣霎東街OLIV既24樓，地鐵站行過去都只不過係2分鐘，環境寛躺優雅，裝潢都相當日式。坐低之後侍應好快就為我地端上熱茶，我地亦都好快落左單。每個是日午餐都會包一個沙律，一個蒸蛋，一個味噌湯同埋一個甜品既。沙律菜好新鮮同爽脆，除左加左胡麻醬之外，仲加左少少飯素，味道好特別，我都係第一次咁樣食，至於醬汁比例適中，令人好開胃。味噌湯味道唔會過重，可惜湯料相對較少，建議加多少少豆腐同海帶。日式蒸蛋有別於平時食到果D，呢到既蒸蛋內有蟹肉，蝦肉同魷魚，口感非常滑溜，值得推介。吞拿魚腩日本海膽丼: 吞拿魚腩新鮮而唔膩，海膽油油甘香，軟滑甘甜而肥美，彈出鮮鹹香味，加埋又大又厚既玉子，配上日本珍珠米煲出黎既飯，點上少少Wasabi同豉油，真係令人一試難忘。北海道丼:所謂既北海道丼，除左係由上面已經提及過既海膽，玉子，同埋日本珍珠米煲出黎既飯整食之外，仲有唔少得既三文魚籽。呢到既三文魚籽晶瑩剔透又大粒，粒粒飽滿豐郁，味道一D都唔腥，唯一美中不足既係飯既份量比較少，男仕們可能會唔夠食。日本牛肉網燒定食:牛肉網燒定食可以揀日本牛肉或者係美國牛肉，當然價錢上都好大分別，反正今日都諗住豪返次，最後都係揀左比較貴既日本牛肉。日本牛肉肉質非常腍滑，肉香濃郁，肉汁都可以話一流水準，配埋又大碗又熱騰騰既日本飯真係完美配搭。食完主菜之後就係上甜品既時候，甜品可以揀雪榚同綠茶卷，如果唔揀甜品既話都可以改要咖啡或茶既。我地三人最後要左一個柚子雪榚同埋兩個綠茶卷。柚子雪榚口感有D似雪葩，裡面有少少柚子顆粒，果味重而帶出清新既感覺。綠茶卷既海錦蛋榚同滑滑既忌廉都滲透濃濃而清新既綠茶味，入口甘香而不膩，賣相仲好吸引添。3位埋單最後都要成$1100，的確有點兒貴，但係呢到環境優美，服務一流，仲有侍應不斷加茶，唯一美中不足既就係女洗手間入口比飛機既更窄，真係肥少少都入唔到去呀。…查看更多