太平館餐廳

營業中

休息中

太平館有好耐歷史，係我細個父母會帶我去嘅餐廳。依家過咗咁多年餐廳嘅裝修同氣氛都好懷舊，但又冇殘舊嘅感覺。同朋友係喺平日食晚飯，餐廳客人都好多元化，內地人外國人都有。我聽到侍應叔叔好有耐心又有啲幽默咁用普通話同英文介紹食物俾客人，服務質素真係非常高。乾炒牛河每次嚟都叫，佢調味適中，牛肉夠嫩，河粉唔會斷，仲有少少燶邊添。一上枱就忍唔住即刻食，結果唔記得影相😅焗葡國雞飯雞同飯係分開上，呢樣我唔係好鍾意。葡汁味比較淡，雞肉有啲柴，呢味我麻麻哋。瑞士雞翼招牌菜式點都要叫啦，瑞士汁夠惹味，雞翼又夠嫩，我哋用手食完諗住攞紙巾抹手，侍應就即刻自動攞咗一盤用嚟洗手嘅檸檬水。非常細心，值得一讚。焗疏乎厘另一個招牌菜式，仲好啱打卡添。不過記得要趁熱食先至香，一凍咗就唔好食㗎啦。總結成餐都食得好開心，環境好、服務好、食物都唔錯。坐足成晚慢慢傾偈冇人催你，喺香港呢種食飯體驗已經係非常難得！

📍尖沙咀如果話有邊間好食嘅餐廳係由細食到大，到而家仍然屹立不倒，太平館必定係其中之一太平館創辦於1860年，真正係咸豐年代；香港一共有四間分店 可能係因為全部都係自置物業，所以冇乜租金壓力；老闆只需要專心喺食物質素同服務方面，所以先可以保持住一貫水準四間分店全部都係走懷舊路線；入到去好似時光倒流咁，好有八十年代電影嘅格局，喺香港已經係買少見少佢哋嘅名物有幾樣，分別係瑞士雞翼、燒乳鴿、乾炒牛河同埋焗疏乎厘當然跟餐嘅羅宋湯同餐包都非常出色，只有舊式嘅西餐廳先可以食出呢種味道瑞士雞翼- 堪稱得上係太平館嘅傳奇，亦都係發明瑞士雞翼嘅始祖；配方以帶有甜味醬油去醃製嘅雞翼，每枱客人必點食物👍乾炒牛河- 從來都覺得乾炒牛河係非常之考功夫嘅食物；要煮得唔油膩之餘，每條河粉上色均勻，再加上生抽老抽同醬油要炒得出色，牛肉鮮嫩香濃，講就容易，全香港做到嘅冇幾多間焗疏乎厘- 蛋白加糖，人手打勻後放入焗爐大約十多分鐘；出爐後會脹大好多，香氣撲鼻，外層焗到金黃色帶微脆，飯後甜品首選