餐廳環境好大間！成層都係佢，而裝修都唔hea，燈光夠，以金黃色為主，比人感覺好醒神，我就一行四人，18:30左右就到，已經有八成入座率，再過多陣已經全場full，香港人對放題既喜愛真係不能忽視。收費我食「星期一至四 兩小時自選時段 $248+10%」，另外果啲大家可以睇下以下張圖，因為實在太多唔同價錢。餐牌有A-L即12張紙可任點，A-F都係冷盤即壽司、刺身類，而G-L就係熱食。刺身同壽司既選擇會比熱食多啲，不過熱食都有啲比較吸引既選擇，例如有花膠、咖哩炒蟹等等，下面再同大家分享！
自助區首先，緊係去左自助區睇下先啦！自助區麻雀雖小但五臟俱全，有前菜：沙律、泡菜、海哲、螺肉等等；有小食：芝士蝦、小丸子、黃金炸魚皮；有湯：係蟲草花膠魚翅雞腳湯；有飲品區：各式汽水、啤酒、茶等等；有甜品：自助雪糕機同埋各款甜品杯。當然介紹唔哂咁多，亦都食唔哂各款，講下我覺得值得食既！開餐
自助區--蟲草花膠魚翅雞腳湯個湯好香好濃郁，好似係出面超市試飲果啲咁，最重要既係，真係有湯渣，而唔係齋水，值得留肚飲呢杯湯。自助區--芝士蝦得第一輪出去拎野食見過，之後就冇再見到有，隻隻蝦都大大隻，而且釀左好多芝士加埋沙律醬，好惹味，黎到一定要快啲出去拎返幾隻。刺身開始講餐紙點既任食類，當然係先講刺身，點得多既話會有乾冰挫住出煙上。試左三文魚、油甘魚、酒煮榮螺片、帶子、大赤蝦，不用置疑，出名以及價錢稍高少少既放題餐廳，刺身質素一定有返咁上下，呢間當然唔例外，「極尚大瀛喜」名氣係放題界好高，冇令我失望，刺身好新鮮三文魚、油甘魚都有油香，帶子雖然唔係好大粒，不過口感都唔錯，酒煮榮螺片好彈牙爽脆，連唔係好食刺身既老一輩都覺得新鮮好食。壽司同樣選擇不少，我呢個壽司迷當然唔會放過任何一款我想食既壽司！試左極尚三文魚腩、尊貴黑松露赤蝦、帆立貝、蒜香牛肉、香煎鵝肝帶子、芝士鰻魚玉子燒、芒果龍蝦沙律卷、香慕拖羅蓉軍艦。當中首推極尚三文魚腩、帆立貝同埋芒果龍蝦沙律卷！三文魚腩比起刺身既三文魚魚油香更重，充斥成個口，難怪係「極尚」，而帆立貝十分新鮮，好軟熟，唔洗點咬咁，我一個人食左3件，至於芒果龍蝦沙律卷會清新啲，雖然就真係唔係好食到龍蝦，不過芒果幾甜，配上壽司飯唔錯。炸物有一口芝士、吉列炸蝦餅、紫心香芋丸、各款炸天婦羅等等，當中我認為可以試下北海道牛乳炸鮮奶，似係酒樓食果啲咁，而我最中意都係紫心香芋丸，次次食放題一定會點。其他熱食試左黃金咖哩炒蟹、御品鮑汁燴花膠、蒜片和風汁炒牛柳粒、燒紐西蘭香草羊鞍、爆醬蝦米炒雜菜、黃金燒帆立貝、芝麻雞翼。一定要食御品鮑汁燴花膠，不過一客得一塊，但都幾大塊，當然唔會諗住食放題會食到啲好貴既花膠，但二百幾蚊既放題食到花膠已經有驚喜，而且真係調味調得幾好，醬汁稠身，花膠滑lulu，完全收貨！另外黃金燒帆立貝都要試，同自助區既芝士蝦所用既醬汁一樣，好惹味，帆立貝亦夠大隻。牛柳粒就炒得老左啲，一般般；咖哩炒蟹唔辣，係日式方法炒，不過冇鉗，要自己扑蟹殼有啲唔方便；羊鞍、芝麻雞翼、炒雜菜就中規中矩。甜品就算最後食得好飽都好，點少得甜品呢個環節！甜品就自己出自助區拎，自助雪糕機供應既味道係士多啤梨，不過就真係好麻麻，冇乜味同埋好沙冰好水既質地，可以唔洗試，包裝類既雪榚雪條選擇唔多，都係脆皮雪條、雀巢雪糕杯呢啲，我就對佢自己整既甜品櫃有興趣啲，試左幾款，味道都還可以，因為有好多間放題整既甜品都真係幾唔好食下，呢間我覺得真係OK，佢個迷小心太軟真係有做到流心先，同埋唔會太苦太甜，而甜品杯味道都唔會好假，Tiramisu杯cream都幾滑，同埋個迷你tart 係檸檬味，幾清新，佢既自家甜品比較出色。食到捧住個肚走！每人$300唔洗，我覺得食物選擇佢唔係我食過最多既一間，但係每樣水準都係到，唔係hea整交貨就算，味道係有質素，尤其熱食都有水準，難怪「極尚大瀛喜」一直都咁出名同咁多人幫襯，相信我都好快會再黎！…Read More
