星期日喺北角行完山落返嚟食晚飯，由於消耗咗唔少體力💦，所以就近近地幫襯咗位於地鐵站旁邊嘅「愛上米線」。餐廳環境同一般米線舖唔同，設有好多卡位，座位唔迫夾，而且裝修仲好型格添，加上燈光明亮💡，喺度打卡都幾適合，哈哈。我之前喺尖沙咀店食過晏，印象都OK。今日再到訪發現好似多咗好多菜式，餐牌亦更精美😜。全部小食都好吸引，而價錢亦唔貴，嗌下嗌下就成枱都係🙈。A4啖啖肉:牛魔王麻辣湯米線($59)，餐廳命名非常貼切，🐮牛魔王包含肥牛、牛丸同牛𦟌，餸料份量好足。肥牛有好多塊，唔會碎濕濕；牛𦟌口感帶膠質，而牛丸就普通啲，如果轉做牛筋丸更佳。🌶麻辣湯辣度顯著，我諗可能有譚仔嘅小辣，食落帶麻香，但略嫌油咗啲。A6補吓先:蟲草花胡椒杞子雞肉配豬骨湯米線($59)，依款湯底唔錯，富有胡椒豬肚湯嘅感覺，飲落暖笠笠🔥，而且清澈唔油膩。餸料有五至六嚿雞件，無骨雞髀肉滑嘟嘟，大大啖肉；另外仲有蟲草花、腐皮、雲耳同芽菜等。不過我就覺得米線口感有改善空間，因為淋咗啲。惹味流心芥未恐龍蛋($32)，🍢炸魚蛋好正，玩味十足，佢嘅大小同網球相若，店員喺我哋面前將佢剪開，內裡嘅芥未醬一湧而出。🐟魚蛋外層炸至微微脆，魚肉唔腥兼彈牙，芥末汁有少許攻鼻但唔搶，墊底仲有辣粉炸米線脆脆，成個小食嘅組合好新穎。懷舊蔥油餅配藤椒野菌雞粒($36)，我之前食過呢款小食好鍾意，因為蔥油餅配辣雞粒好搭調🌮。蔥油餅有四件，熱辣辣炸起，兼且好索汁。藤椒重麻不重辣，正正係藤椒嘅特色，雞粒同野菌相比，我更鍾意後者🍄。香噴噴奶黄金沙脆雞翼($32/3隻)，🍗雞翼大大隻，煎至外脆肉嫩。同時，佢超邪惡，表面蘸滿鹹蛋黃醬🍳，口感起晒沙，比平日食開嘅甜少少。椒鹽脆辣雞球($22)，原本都驚炸雞球會好乾身🐔，不過出到嚟個炸皮都幾薄脆。椒鹽口味好香口，雖然稍為鹹咗啲，但送酒一流。剁椒皮蛋($9/輕盈版)，🥚皮蛋擁有完美嘅溏心效果，但重點係面頭嘅剁椒，佢集燈籠椒、辣椒同芝麻於一身。飲品方面🥤，我哋要咗冰感冬瓜茶($24)同青檸梳打($26)，嗌主食加特飲有優惠，只需$15。冬瓜茶好清甜，而冰感係指加入咗薄荷味嘅啫喱，令到飲品多咗一份清新感。🍋青檸梳打一啲都唔馬虎，好夠檸味。總括嚟講，愛上米線嘅出品真材實料，客人能充份感受到佢嘅誠意💕🥢。食物之外，店員服務亦係值得嘉許嘅地方，佢哋每一位都親切有禮，主動關心客人需要，就例如有個婆婆話餐牌啲字好細隻，店員願意耐心地向佢講解餐牌，抵讚👍。…查看更多
