Wine&Dine 2016現場睇特色美酒小食攻略

各位為食友，唔係放過Wine & Dine 建行(亞洲)香港美酒佳餚巡禮2016 呢個可以一次過試到唔同美酒佳餚嘅絕佳機會吖嘛？作為大會網上媒體夥伴，開飯仔當然係第一時間嚟到Wine & Dine現場，幫大家睇定有咩必試嘅特色嘢。Mark定下面資料，跟住攻略盡用手上嘅品酒券同胃嘅Quota！

重點重溫一下，今年Wine & Dine由今日(27/10)開始直到30號，喺中環海濱活動空間舉行。標準區當中有暢飲派對、國家展區、專業美酒區同美酒佳餚新發現，而要有「尊尚品酒證」先入得嘅就係尊尚區。全場總共有超過410個攤位，包括280個美酒攤位，同超過130個美食攤位。花多眼亂？咁當然就要嚟睇開飯仔嘅精選推介啦！

暢飲派對 & 街頭小食

如果你由比較近摩天輪嘅中環入口入嚟，首先就會嚟到暢飲派對區，呢區有唔少氣酒、果酒、香檳同甜酒，都係比較容易入口，啱哂Party Time一齊飲嘅選擇。記得去埋附近嘅街頭小食區買埋美食，嚟個港式Wine Pairing！

（＠好望角葡萄酒，A 011)
Gik Live：呢期好似興藍色嘅嘢食，連葡萄酒都有藍色，係幾特別嘅。係嚟自南非㗎介紹返。【品酒券：2】
莫扎特朱古力酒：呢隻朱古力酒呢就係奧地利出產嘅，之前開飯仔都同大家介紹過，比較杰身，朱古力味濃！【品酒券：1】

（@Yuan Li Trading Co., A101）
近期大熱嘅街頭小食：芋圓豆花呀，行到熱嗰陣食返碗都幾開心。（ $20/碗）

@海洋公園, A105
帶子元貝魚湯狗仔粉 $36：湯底係用智利鱸魚嘅魚骨自家熬製，加埋加拿大帶子同青島元貝，成碗粉好有鮮味！
威威迷你漢堡 $36：用美國牛肉打成嘅漢堡排，幾juicy，包面仲有威威司令個嘜頭，cute cute~
環保魚蛋 $36/8粒：用太平洋無鬚鱈魚整，全港首創！食落幾彈牙，重點係夠辣！怕辣嘅朋友可以揀沙嗲醬。

國家展區 & 酒店美饌

顧名思義，國家展區當然係集合咗多個產酒國家同地區嘅美酒，除咗大家較為熟悉嘅波爾多之外，仲有法國其他地區、西班牙、德國、美國、智利、日本同韓國等地，澳洲同西班牙仲係今年新加入！另外仲有7間酒店會獻上各款美饌，一手美酒一手美食一樂也。

@每天波爾多–偉成洋酒, C309
Chateau Michelet 2015：嚟自法國嘅美酒，只係需要1個token就可以試到啦。【品酒券：3】

@帝都酒店, C416
沙田友芝士餅 $30

專業美酒區 & 名氣美食坊

想寓「學」於樂？無問題！嚟到專業美酒區就會有專業酒商同品酒達人，一邊發掘平時比較少機會接觸嘅酒莊或者產酒區所製嘅佳釀，一邊交流品酒心得！而近維港嗰邊仲有個名氣美食坊，會提供「2016美食之最大賞」嘅得獎菜式。

@公啟行, C005
Bottega Moscato Pink NV：意大利有汽酒嚟，靚靚粉紅色樽已經好容易獲得女生嘅歡心，佢仲要係玫瑰味加荔枝味加蜜糖味……【品酒券：2】

@悅來酒店, D006
龍蝦包 $40、芝士蟹肉三文魚撻 $40

美酒佳餚新發現

鐘意試新嘢嘅朋友仔唔好錯過！首度登場嘅香港吧會有本地頂級酒吧調製香港特色嘅各款Cocktail，威士忌及手工啤酒區就有唔同新奇口味嘅手工啤酒同威士忌加唔同飲品嘅新嘗試，仲有個東洋製造畀大家一試日本各縣市嘅清酒同美食。

@喜和, D212-213
柚子酒：飛驒出產嘅梅酒，連續六年都係日本果酒界嘅No.1，鍾意梅酒嘅朋友要試下喇。

@Flavabomb, E506
意大利Moscato炸彈雪糕 $45：雪糕有幾種口味包括宇治抹茶、北海道牛乳味、彩虹糖等等嘅味揀~
意大利黑松露牛丸 $40碗、$70兩碗：估唔到兩種本嚟唔同檔次嘅嘢食都可以咁夾，值得試下。

@Ocean Three Development Limited, E814
美國安格斯牛肉燒 $40、熱溶芝士芝心腸加脆皮墨汁腸 $30

香港吧

由幾間本地頂級酒吧合作，各自去調製咗好有香港特色嘅cocktail。

@Seafood Room, E105
The Lion Rock Spirit：呢杯cocktail叫獅子山精神，原來飲落係檸樂煲薑咪，果然夠晒地道！【品酒券：3】

美食攤位

話名美酒佳餚巡禮，當然亦有唔少各國美食啦，由品酒常見嘅Parma Ham到你諗唔到嘅港式甜品都有。而且仲特別劃咗個芝士專區，芝士迷必去！

@卡洛芝士吐司專門店, C104
彩虹吐司 / 紫薯吐司 $40半件、$70全件：新鮮滾熱辣咁食有拉芝效果呀！呃like一流。
彩虹聯盟杯：下層係鮮榨果汁加天然花茶嘅梳打特飲，而上層仲盛住薯蓉配煙肉粒同黑松露芝士，有得飲又有得食。

@聰少甜品, D101
鮮果特種冰：龍眼／蜜瓜 $40：連聰少都喺度開counter！雖然冇紫薯冰，但呢兩杯龍眼同蜜瓜冰細細杯都好解渴呀！

尊尚區

買咗尊尚品酒證嘅各位愛酒之人記得嚟呢個尊尚區，除咗有個貴賓室畀大家望住維港璀璨夜景之外，仲有多個尊尚名酒同星級美食攤位！

@屈臣氏酒窖, G05
Pontet Canet, Pauillac 5eme Cru 2010 ：紫羅蘭花香，味道濃郁。飲到最尾仲會飲到啲咖啡同泥土嘅味。【品酒券：3】
Montrose, St Estephe 2eme Cru 2010：果味豐富，包括布冧、黑加侖子、無花果味等等，仲會飲到黑炭同朱古力醬味。【品酒券：2】

成個Wine and Dine 2016仲有個品味館。

當中會有甜品花園、名廚美酒佳餚晚宴同World Class Street Food Jam三個活動，網上報咗名嘅記得出席，或者現場入口售票處即場購買亦得，不過注意活動名額有限。

按圖看網頁版

美酒佳餚巡禮Wine and Dine 2016 詳情
日期： 10月27日 - 30日（星期四至日）
時間：
27/10 7:30pm – 11:30pm （最後入場、售票時間：11:00pm）
28-29/10 12:00pm – 11:30pm（最後入場、售票時間：11:00pm）
30/10 12:00pm – 10:00pm（最後入場、售票時間：9:30pm）
地點：中環海濱活動空間（設金鐘及中環出入口）
入場費： $30（長者、全日制學生及殘疾人士：$15）

門票資料：
入門品酒證 (只限現場發售)：「標準品酒券」5張及塑料酒杯1隻（ $100）
標準品酒證：「標準品酒券」8張及Stölzle酒杯1隻（$200）
尊尚品酒證：「尊尚品酒券」8張及Riedel酒杯1隻（$600）

隨時接收最新資訊
讚好OpenRice專頁！