仲有兩個星期，就係一年一度嘅建行亞洲香港美酒佳餚巡禮（ Wine & Dine Festival）喇！作為官方媒體伙伴，開飯仔親身為你報導第一手資訊 ！今年踏入第十屆特別多搞作，面積由以往嘅4.1公頃去到4.9公頃，亦有更多新元素，除咗睇返上回介紹（Wine & Dine十週年預告 09年佳釀＋特別版啤酒威士忌晒冷），亦有最新預告一吓今年亮點先！

今年十大展區之中，六個為美酒、四個為美食，酒區同以往差唔多，都係以國家區分，亦有尊尚名酒區、權威品酒師Robert Parker Wine Advocate嚴選佳釀等，威士忌手工啤酒區成為重點，亦有女士鍾意嘅氣泡及雞尾酒區，大會再請來酒專家黃大鈞同各位介紹美酒。

留意返罕有產區代表，包括係首次於Wine & Dine亮相嘅斯洛文尼亞Istrski Rubini Cabernet Sauvignon 2009，同Wine & Dine同一年面世！本來只供會員享用，限量供應，帶成熟莓果香氣、咖啡、可可及香料等，複雜但易入口。而來自烏拉圭嘅Bouza Monte Vide Eu 2016，為酒莊旗艦酒，果香重，適合配襯肉類及燒味。

而同樣第一次參展嘅The Flying Winemaker,有一系列由釀酒師Eddie McDougall精心挑選嘅Rose，包括西澳葡萄酒展獲金獎嘅McDougall & Langworthy、用意大利葡萄但於澳洲釀製嘅Eddie McDougall Rosato、法國Revolution Bastards Rose等等。

手工啤除咗有本地人氣品牌少爺、大圍啤、Heroes，亦有今年首度參與嘅新晉酒廠Carbon Brews啤酒。Aloha Sour番石榴味極重，甜到如果汁咁易入口，而1bu係Hazy Pale Ale，色澤帶混濁，但有啤酒花香而滑溜唔苦澀。

壓軸登場有陳豪教大家品味咖啡！新增嘅咖啡園有陳豪嘅Blooms Roastery坐鎮,有專誠拍賣得來嘅危地馬拉藝妓咖啡豆、製作濃縮咖啡嘅墨西哥及哥倫比亞拼配豆。而Moses亦特別以法蘭絨方式沖泡，令人聯想起港式絲襪奶茶，配合返戶外氣氛，分分鐘會飲到Moses親手沖嘅咖啡俾你飲架。

超蓮BB嘅玖五牛肉麵，亦專登為Wine & Dine設計出刈包，於會場獨家供應，舖頭都食唔到！豬腩肉預先炆製至入味，加上花生粉、酸菜等，食落軟熟而且帶甜甜鹹鹹，超蓮精心推介呀。

其他必吃包括天天海南雞飯、Picada秘魯粟米餅、米芝蓮推介Kelly’s Cape Bop紫菜飯卷等等，於拍住賞環球小吃街就可以掃晒所有小食喇。

而香港迪士尼樂園今年亦首度參與Wine & Dine，將酒店最受歡迎兼iconic嘅公仔點心帶來中環,亦有新出嘅小吃,每一款都充滿迪士尼元素,好似Jack帶子蟹肉芝士慕絲多士、三眼仔菜肉包、小熊維尼芒果慕絲等。

為慶祝Wine & Dine十周年，酒迷可以購買全新「Perfect 10」紀念品酒證，包20張品酒券、10張美食券、一天無限進出尊尚名酒區、迎賓酒品一杯，仲有隻Lucaris金色別注被酒杯，零售價都要成$470架。

想知最新消息，梗係要mark實我哋當日現場即擊！

文、相、片：Perrins