一連四日嘅復活節假期有咩節目？咖啡迷就一定唔可以錯過PMQ呢個市集！「The Coffee Agenda咖啡生活市集」由香港咖啡行業協會及多間本地精品咖啡店協辦，雲集多位得獎咖啡師，仲有首次來港嘅韓國咖啡品牌、世界各地嘅特色咖啡，仲有唔同食物配咖啡，啡迷一定滿足！
全個市集有超過30個攤檔，一入門口就見到來自韓國嘅Bean Brothers。品牌於2013年創立，於韓國有7間分店，2015更於吉隆坡開設海外分店。駐場嘅都係來自韓國嘅咖啡師，手勢純熟。
咖啡豆係自家烘焙，兩款自家拼配豆Black Suit及White Velvet，分別為男女口味，仲有每個月都會轉換嘅單品款式James。今次為市集度身訂造兩款特色飲品，Black Pana係加咗Kahlua咖啡酒、忌廉嘅咖啡，而Festival更係以香港凍檸茶為靈感，濃縮咖啡配檸檬乾、紅茶及爆炸糖，口感好清爽！
Black Pana、Festival 各$42
本地咖啡店陣容都唔弱，每日都請來三間唔同咖啡店輪流擺檔，第一日有元朗Accro Coffee、西環新開Tuckshop以及Roastery Lab。全部都係咖啡界有名嘅頂級人馬，好似虹吸式冠軍Tiffany Chan、拉花大賽冠軍Keith Tse、烘焙大賽冠軍Ed Lam及賽事評審Gary Wong等，可以把握機會同香港咖啡專家交流。
ATOM為香港首間咖啡店推出環保咖啡及茶膠囊，調酒師大賽冠軍Wallace將咖啡沖調成雞尾酒同無酒精mocktail，飲落有微微咖啡香，都幾refreshing。
Smooth As Silk、Bright Shady 各$40
Favilla將咖啡融入花藝，攤檔充滿少女風。必試自家冷泡咖啡，飲落甘醇似紅茶，配埋用雪糕Bailey’s窩夫，甜品迷實開心。
Ethiopia Cold Brew $38
Favilla Waffle $68
另一區就有來自世界各地嘅咖啡，包括用沙加熱嘅土耳其咖啡、罕有限量哥倫比亞咖啡、東帝汶野生咖啡、澳門古法瓦煲咖啡以及印尼峇里古樹咖啡等，每一款咖啡都有唔同背景及故事，想了解更多可以請檔主介紹吓。
飲咗咁多咖啡都肚餓喇，市集都有唔少美食攤檔，首次於市集擺檔嘅四喜麵包西餅，有多款唔同餡料牛角包。必試黑心心牛，牛角包好鬆脆，一切開就有流心黑芝麻餡，芝麻味濃又唔過甜。
黑心牛 $30
小食就有以咖啡醃製非洲咖啡雞翼、加入古樹咖啡粉製作嘅抹茶同焙茶Tiramisu、本地自家製流心芝士豬肉腸、手做玄米抹茶雪糕、越式法包等等。唔飲咖啡亦可以試試最新燕麥飲品oatly。
市集仲有工作坊、手作精品攤檔、小朋友區等，活動都幾豐富，免費入場，襯假期來行吓玩吓飲吓咖啡啦。
The Coffee Agenda咖啡生活市集
地址：中環鴨巴甸街35號PMQ元創方地面廣場
電話：3621 0581
開放日期及時間：30/3-2/4 12nn-8pm
文、相、片：Perrins