就算今年迎嚟香港有紀錄以嚟最熱嘅中秋節，都無阻大家出街食嘢打卡嘅興致！九月十強榜，有唔少有主題裝修，或者招牌菜特別 IG-able 嘅餐廳啊。
圖: 尖沙咀山林道呢間西餐廳暌違一年再度上榜，打卡霓虹燈加上搞鬼嘅食物名吸引到唔少客人。例如招牌菜叫「門西淋牛豬 vs 蝦兵蟹將」，其實係自選焗豬仔骨、脆炸魚柳或者安格斯西冷配烤龍蝦、慢煮蒜香春雞、炸軟殼蟹，咩都有啲而且每樣嘢都好食！
第9位 10分麵包（*新上榜）
圖: 葵廣小食店一開就大受歡迎已經唔容易，今次更登上 10 強榜！靠嘅係韓國、日本近年流行嘅拉絲芝士餅，而且有兩大加分點：一係小店由真·韓國 Oppa 主理、味道正宗；二係本地化將芝士餅變成港幣一毫子造型、打卡搶眼。唯一有啲可惜係 $40／份有啲貴囉。
第8位 Pentola（*新上榜）
圖: 魚堅日記
餐廳位於由中學改建而成嘅藝術中心地下，磚牆設計加上舒適環境相當討喜。而主打嘅意粉標榜混合九龍麵粉同意大利 00 粉製作，能夠保留小麥香氣。各位海鮮控必試新鮮波士頓龍蝦意粉，伯爵茶胡椒慢煮牛面頰特寬麵亦係唔少食評當中嘅推介。
第7位 啤啤Bear韓國包車（*新上榜） 
圖: Ling1470232
同區另一打卡餐廳hoo韓國包車嘅姐妹店，呢邊就以韓式機舖為藍本，加上今年大熱嘅 Y2K 元素，真係幾有去咗首爾一轉嘅 Feel。嘢食除咗大家熟悉嘅韓式炸雞、韓式燉雞、烤五花肉之外，特別推介刨冰啤酒，清爽嘅啤酒加上帶甜嘅刨冰，配炸物同重口味菜式真心唔錯。
第6位 云手工火鍋店 
圖: 又一次證明香港人一年四季都鍾意打邊爐，尖沙咀呢間火鍋店雖然唔喺地舖，依然有唔少識食之人知呢邊嘅手工湯底同配料夠高質。兩大 IG-able 湯底分別係火焰白沙蟹鍋同火焰三椰雞湯，前者用酒燒香花蟹同沙白再加湯，後者更用椰子肉、椰皇水、椰青水煮湯，味道清鮮。
第5位 夏雪（*新上榜）
圖: phonebus
2014 年，由四個香港人開設嘅窩夫甜品店喺堅尼地城開張，後來兜兜轉轉，開過分店又結業，8 月終於又返到堅尼地城開店！山市街旺中帶靜感覺更 Chill。主打嘅窩夫勝在外脆內軟又有蛋香，無論係鹹食定當甜品都好出色。愛咖啡嘅朋友更要試試佢哋嘅手工咖啡啊。
第4位 Frozen Yogurt Drool（*新上榜）
圖: tastytasting
天氣咁熱，要消暑又想兼顧健康嘅話，呢間標榜用低脂希臘乳酪同北海道 3.6 牛乳製作 Froyo 嘅小店就最啱喇。有超過 20 款配料，六款醬汁任你自由配搭，當中最搶眼又最值得一試嘅係酥皮筒，據悉係向快樂餅店攞貨，口感酥脆，同冰涼微甜嘅 Froyo 好夾！
第3位 The Old Book Store by The So Lonely Club
圖: helloimbunny
英倫復古書店裝修同 Fusion 泰國菜好似無乜關係，不過喺呢間玩味度十足嘅打卡餐廳擺埋一齊又真係無違和感。菜式同樣充滿驚喜，鵪鶉蛋肉鬆比薩除咗有滿滿 der 肉鬆同半熟鵪鶉蛋，下面原來有一層朱古力醬！味道鹹鹹甜甜咁，加埋薄脆輕盈嘅批底好易食完。
第2位 三公台灣料理（*新上榜）
圖: LetsEat2014
旺角呢間樓上餐廳窗邊擺咗一排 BE@RBRICK 公仔，係幾搶眼嘅。上到去先知主打台灣菜，而且有唔少創意料理。例如蚵仔煎同滷肉飯可能大家都食唔少，但呢度你會搵到蚵仔煎滷肉拌麵！另外有 Black Pink 鹽酥雞，黑色鹽酥雞加上粉紅沙律醬，可能係最 IG-able 嘅鹽酥雞。
第1位 Starò
圖: Winkieeeeee
唔知係咪因為女孩子們都無辦法抵抗浪漫同夢幻感？尖沙咀呢間星空主題酒吧餐廳，繼 6 月十強後，9 月再度上榜，而且一樣穩坐第 1 嘅寶座！各款歐陸菜式包括 18 小時慢煮美國安格斯牛小排配法式薯蓉、西西里紅蝦手工幼蛋麵、手工薄餅都有水準。
文：Cathy.H
