唔少人都鍾意去太安樓搵食，最近嗰頭新開咗一間鯛魚湯專門店，主打各款海鮮鯛魚湯烏冬及飯，招牌鯛魚湯底每日用80斤日本黑鯛魚骨熬煮而成，味道又鮮又濃，而且鯛魚營養成分高，鍾意食魚湯嘅開飯仔囡們要去試吓。

餐廳每日使用大量鯛魚骨，先焗後燒至金黃，等完全收乾水份後再用小磨麻油落鑊壓碎慢炒，後配合自製嘅配料及水長時間熬製，先熬出呢碗乳白色又鮮甜嘅鲷魚湯。

鮑魚花膠鯛魚湯飯$128

呢個豪華版湯飯係抵食之選！鮑魚同花膠都大大件，炆得軟腍，鮑魚彈牙，而花膠仍有黏口嘅感覺，兩者同時索晒鯛魚湯鮮味，啱晒各位女士們食。

波士頓龍蝦鯛魚湯烏冬$138

海鮮控一定唔可以錯過波士頓龍蝦鯛魚湯烏冬，放上巨型原隻龍蝦，厚肉之餘肉質爽口彈牙，仲有好多蝦膏添啊～

松葉蟹腳鯛魚湯烏冬$128

湯底同時有松葉蟹及鯛魚味，可謂鮮上加鮮。而且足足有成4-5條厚肉蟹腳，一定滿足到各位蟹精。

鰻魚飯拼九州鯛魚湯烏冬($86)

貪心嘅開飯仔可以食呢個鰻魚飯拼鯛魚湯烏冬，一次可以食到惹味嘅鰻魚飯同鮮甜鯛魚湯烏冬，而且仲有沙律送～

日本紫薯甘栗餅 $38

日本紫薯餅外皮炸得酥脆，紫薯蓉滑身，而且唔會過甜。

餃子手羽$48

呢個餃子手羽亦係人氣之選，手羽內釀入餃子餡，隻隻都咁飽滿啊！

九州鯛魚

地址: 西灣河筲箕灣道57-87號太安樓地下G25號舖

文、相、片: Yanica