又有一間海景高質餐廳值得Bookmark！呢間新店位於黄埔海濱長廊附近，室內加上露天平台佔地約6,000平方尺，同樣可以欣賞到180°維港海景，感覺特別Chill。餐廳主打摩登地中海菜，食盡西班牙、意大利、法國、希臘等地嘅特色佳餚，更設有乾式熟成牛肉架，無論係海鮮或牛肉菜式都值得一試。
 

露天平台可以無遮擋將180度維港海景盡收眼底，感覺愜意

The Bayside位於九龍海逸君綽酒店地下，係中環Quiero Más嘅姐妹店，由西班牙主廚Javier Perez同行政總廚Gary Batra帶領團隊，精選歐洲南部嘅頂級食材，炮製一系列地中海美食。星期一至五會有Lunch By The Bay，走半自助餐形式，可以任食經典冷盤、沙律、餐湯、芝士、Pizza同自家製甜品，再加上自選主菜。晚餐就以單點同Tasting Menu為主。
 

精選冷盤推介

Scallop Ceviche（$148）

前菜有多款冷盤同Tapas選擇，當中呢款Scallop Ceviche特別適合夏天，鮮甜嫩滑嘅帶子配搭柑橘油醋醬，加上醃迷你彩椒、洋蔥、櫻桃蘿蔔，酸中帶辣，清爽醒胃。可以加埋旁邊嘅脆脆，增加口感。
 

Avocado Tartare Verde（$128）

全素版本嘅他他以Creamy嘅牛油果為主，牛油果本身無乜味道，食落主要係上面嘅芒果同紅菜頭嘅清甜。軟綿嘅牛油果肉配搭外脆內韌嘅烤酸種多士，相當討喜。
 

必點香脆Pizza

Pizza Venetia（$108/Pizzette，$208/12 inch）

佢哋嘅Pizza餅底偏薄身，烤完食落有啲似餅乾咁，口感香脆而帶麵粉香。上面就鋪滿芝士、蝦、八爪魚、魷魚、青口同青醬。芝士香濃郁，而青醬可以平衡膩感，配搭海鮮嘅鮮味同多種口感，層次豐富。
 

自家乾式熟成和牛

Dry Aged - The Wagyu Bavette（$238/150g，$438/300g）

上文都提及過，餐廳特別訂製乾式熟成牛肉架，所以呢度嘅熟成牛肉亦不容錯過。Bavette即係後腰脊翼板肉，肉質緊實、牛味豐富，經過乾式熟成再烤，食落有嚼勁而唔韌，筋位亦變得爽脆，同時保留咗肉香。配以迷迭香烤新薯同有機迷你紅蘿蔔。
 

創意鱸魚千層

Fake Lasagna（$228）

呢道Fake Lasagna無任何麵，而係用海鱸魚同西班牙紅椒（Piquillo Pepper）層層堆疊而成！西班牙紅椒味道偏甜，去籽後食落似甜椒，甜度帶出海鱸魚肉嘅鮮味。而且紅椒可以令柔嫩嘅魚肉加添另一種爽滑嘅口感層次。加上紅椒醬汁同甜酒忌廉，味道有驚喜。
 

甜品配雪芭/Gelato

Basque Burnt Cheesecake served with Raspberry Sorbet（$108）

完滿嘅一餐當然唔少得甜品，呢度就有源自西班牙嘅巴斯克焦香芝士蛋糕，成功做到軟心效果，入口順滑，酸甜平衡唔會太膩，如果外層嘅焦香更明顯就更好喇。蛋糕加上覆盆子雪芭食落更清爽。值得一提雪芭同意式Gelato亦可以單點，有開心果、雲呢拿、覆盤子同椰子四款口味選擇。
 

自家Gin酒炮製打卡Cocktail

（左至右）The Bayside Sangria（$98/Regular，$78/Happy Hour）、BB G&T（$98/Regular，$78/Happy Hour）、Hummingbird By The Bay（$108）

酒吧請嚟調酒師兼品酒師Vincent Chue坐陣，多款Cocktail都好啱打卡，特別係以雀仔玻璃杯奉上嘅Hummingbird By The Bay，以冧酒同黑櫻桃酒為基底，混合青檸、蔓越莓同迷迭香，味道以酒香同迷迭香為主。

另一推介係用上餐廳自家Gin酒炮製嘅BB G&T，帶薰衣草嘅芬芳同柑橘嘅清香。而The Bayside Sangria就加入白蘭地同大量水果，飲落以水果嘅酸甜為主，唔會太嗆。呢兩杯同樣都係易入口嘅選擇。
 

室內設計由著名設計師Hernan Zanghellini操刀，以藍色同橙色為主調，呼應地中海主題

The Bayside 

地址：紅磡德豐街18號黃埔花園地下G1號舖

文：Cathy.H
相：Michael