嚟到十月初，即係食大閘蟹嘅季節又到啦！今年有好多餐廳都有得食大閘蟹，仲要唔少都推出大閘蟹放題畀大家食夠本，最平$368就有得任食，亦有米芝蓮粵菜食府推出嘅大閘蟹宴，提提大家當造時間唔係太長，想食就要把握機會喇～

紫藤花主題居酒屋 夜櫻 • 居

旺角呢間日式居酒屋裝潢以紫藤花為主題，啱晒打卡～最估唔到嘅係餐廳最近推出⼤閘蟹放題，價錢分兩個級數，以大閘蟹重量計算，最平$398就可以食到約三⾄三両半嘅江蘇大閘蟹，同時供應蟹公同蟹乸。最抵係仲可以加$388就食到原條新鮮象拔蚌刺身，即撈即劏，入口爽脆鮮甜，海鮮控必試！

$368魚蝦閘放題 戀上台式料理 

將軍澳海傍嘅台式酒吧餐廳，今次破天荒推出全港獨家魚蝦閘放題，最平$368就可以任食88分鐘！價錢就分三個級數，$368就可以食到約三至四両重嘅大閘蟹，仲有秘制酸菜魚、麻辣小龍蝦、多款用蟹粉製成嘅菜式、台式小食同飲品，如蟹粉水餃、生滾大閘蟹粥、蟹粉花枝丸、一口蟹粉鴨血、蚵仔滷肉飯、士林鹽酥雞同蟹粉滷肉時菜等，款款都好吸引。溫馨一提餐廳只接受現金付款。

收費詳情

2:30pm-10:00pm/10:00pm後入座:

3両-4両大閘蟹公+約3両蟹乸: $398/$368
4両-5両大閘蟹公+約3両半蟹乸: $498/$468
5両-6両大閘蟹公+約4両蟹乸: $648/$598
*星期六、日、公眾假期及其前夕另收附加費每位$20

新派越式料理 Pho星登陸越球

佔地2500呎全新嘅越式料理，一開張就推出88分鐘大閘蟹放題，採用全新計時方式，每次上菜開始計時，中途等待上菜時間唔計，令食客更能享受真真正正嘅放題體驗！放題價錢由$453起，有16款小食同23款飲品，包括5款蟹粉小食如滑嘟嘟蟹粉鴨血、蟹粉水餃以及11款越式美食如生熟牛河、越球春捲、木瓜蝦沙律等。食客更可加$48任飲話梅花雕王、紅白餐酒同啤酒，配大閘蟹最啱。

收費詳情

14:30-22:00/22:00-00:00:

3両-4両大閘蟹: $383/$353
4両-5両大閘蟹: $478/$448
5両-6両大閘蟹: $613/$563

米芝蓮大閘蟹宴 明閣    

呢間米芝蓮粵菜食府相信大家都唔陌生，今年就推出全新六道菜大閘蟹宴配茗茶佳釀。團隊特意挑選新鮮肥美嘅時令大閘蟹以及多款上乘食材如魚子醬、燕窩及龍蝦等炮製六道大閘蟹菜式。推介清蒸太湖大閘蟹，以傳統清蒸手法烹調，配搭薑絲及黑醋食，完美呈現大閘蟹嘅鮮味。蟹粉芙蓉龍蝦球都有驚喜，嫩滑蛋白、香濃蟹粉配上爽口彈牙嘅龍蝦，鮮上加鮮。

供應時間: 即日起至11月28日期間晚市時段

文: Yanica