海鮮控注意～今期搜羅咗幾間主打海鮮盤嘅餐廳畀大家，間間嘅海鮮盤都好豐盛好澎湃，啱晒打卡又好味！

目錄

澎湃龍蝦海鮮山 海鮮山醉辣火鍋  

圖: Mcky

荃灣海鮮鍋專門店，招牌係海鮮山同龍蝦山，望落真係成座山咁澎湃！食法都好特別，火鍋上層就係炒過嘅海鮮，下層就係火鍋。好似龍蝦山就參考咗四川干鍋做法，洗淨海鮮後先拎去低溫過水，然後將龍蝦走油，剩底嘅油用嚟炒海鮮，其他海鮮就會吸收埋龍蝦油香，好正呀。食完海鮮就可以打邊爐，海鮮底層已有蔬菜、炸支竹、蓮藕、豆卜及粟米等，湯底會同時有龍蝦或蟹油香、蒜香同海鮮及蔬菜嘅鮮甜，海鮮仲有得揀唔同辣度～

新奧爾良巨型海鮮拼盤 Homeland 

呢間人氣新派西餐廳喺大埔同荃灣都有分店，最近推出全新巨型海鮮盤，逾 10 款海鮮連配料。有分中 Size 及大 Size，中 Size 就喺波士頓龍蝦或北海道松葉蟹腳二選一，大嘅就兩款都有。其他海鮮包括泰國珍寶羅氏蝦、鮮活大蜆、海蝦、小龍蝦、墨魚仔、青口及翡翠螺～口味更可選蒜香牛油汁或蒜香卡真汁（辣），呢個海鮮套餐仲包括自選餐湯、沙律、海鮮盤、主食、醬汁及飲品，好抵食呀～

超巨型海鮮盤 斗滾

主打雞煲海鮮火鍋放題嘅人氣餐廳，食完雞煲就會上呢個超巨型嘅蒜蓉海鮮盤，一上枱真係嘩一聲！用一個大圓盤裝住滿滿海鮮，勁有架勢啱晒打卡。包括蟶子、花蜆、海蝦、鮑魚、扇貝同龍躉，加入蒜蓉蒸好香，但又唔會蓋過海鮮嘅鮮甜！仲可以額外追加象拔蚌同龍蝦刺身，食完就可以飲靚湯同享受火鍋放題啦，真係超豐富。

波士頓龍蝦海鮮盤 明記 • 潮鍋 

圖: 新地食記

呢間同樣係火鍋店，不過就主打新鮮游水海鮮、潮洲特色嘅火鍋食材及潮洲滷水火鍋湯底～提供三種價格海鮮套餐，中價位嘅套餐已經包含刺身拼盤及波士頓龍蝦海鮮盤，波士頓龍蝦肥美飽滿，肉質鮮嫩彈牙，而且龍蝦頭有好多蝦膏。其他海鮮就有鮮活鮑魚、蟶子王、大元貝同六款廚師發辨海鮮，如生劏白鱔片及貴妃蚌，好高質素。

文: Yanica