壓扁牛角包呢個熱潮由韓國吹到嚟香港，牛角包本身已經夠好食，將佢壓扁食又會係咩感覺？今期介紹幾間有賣壓扁牛角包嘅餅店畀大家，包控一定要去嚐鮮～
脆脆花生焦糖醬口味 四喜麵包西餅
圖：經常推出特色麵包嘅人氣小店，呢排最hit嘅壓扁牛角包當然唔少得佢哋啦！一共推出六款口味嘅可頌餅，餅本身做得酥脆又鬆化，脆脆花生焦糖醬上有花生粒、原塊lotus餅同一層焦糖醬，啱晒鍾意甜食嘅朋友。岩燒挪威焦糖芝士就鹹鹹甜甜，焦糖味相對就更加出，仲冇咁甜膩。另外仲有蛋黃醬明太子、開心果同朱古力榛子碎等～
特大版本 Happy GLAZE
圖：店舖（IG）
鍾意相機食先嘅朋友呢間就啱晒～佢哋早前推出多款特大版嘅牛角酥，包括蘋果肉桂、士多啤梨、朱古力、開心果同鹹蛋黃等口味，蘋果肉桂帶有淡淡肉桂香，蘋果令味道更清新；鹹蛋黃同牛角包原來都好夾～不過真係比面更大塊，建議同朋友share食呀。
牛油味十足 Soft Thunder
圖：店舖（IG）
主打法式pastry嘅餅店，佢哋嘅酥皮一向都做得好好，如酥皮忌廉筒、牛角包同蝴蝶酥都係人氣產品。5月佢哋喺堅尼地城店限量供應壓扁牛角包呀，包括開心果、焦糖爆谷、朱古力榛子、花生醬同生日蛋糕口味。除咗醬，仲會加上唔同toppings，無論口感定味道都好豐富。
牛軋糖夾心 森林麵包
圖：店舖（Facebook）
呢間就特別啲，除咗將牛角包壓扁，仲加入牛軋糖夾心～口味有綠茶朱古力、玄米茶朱古力、士多啤梨朱古力等，撕開會有拉絲效果，口感外脆內煙韌，層次豐富。佢哋更推出壓扁牛角包蛋糕，加入鮮果同Mascarpone芝士，唔會太甜又勁香脆。
文：Yanica
編：Cathy
