天氣凍，煲仔飯都係其中一樣冬天必食之選！如果食傳統款嘅煲仔飯食到悶悶地，今期介紹4間有供應創意煲仔飯嘅餐廳畀大家，話唔定有驚喜呢～

目錄

８款口味素食煲仔飯 心裡有素

油麻地新派素食店，今個秋冬限定推出八款口味素食煲仔飯，每晚6pm後會隨機供應四款，包括素蠔油冬菇粟子、梅菜芋頭煲仔飯、麻婆豆腐煲仔飯同黑松露野菌煲仔飯等。雖然係素食，但味道一樣香濃惹味，最重要係連素食人士都可以過一個暖笠笠嘅冬天呀～

鹽燒白鱔煲仔飯 秋香

招牌係即叫即燒嘅鹽燒白鱔煲仔飯，四大舊白鱔爽口彈牙，肥美肉嫩，皮燒得好香脆，每啖魚肉都充滿魚油脂香～煲仔飯最重要梗係飯焦，煲底嘅飯焦超香，而且用咗珍珠米，口感特別煙靭，米飯吸滿白鱔魚油，配埋蔥花同少量櫻花蝦乾，一入口嗰吓真係好滿足。另外仲有麻辣創意雞煲仔飯，飯面舖上一層以辣椒及蔥花蓋住嘅雞肉，中間仲有一個生蛋黃，唔算太辣，用個醬汁加生蛋黃撈飯真係無得輸呀。

圖: kikoyyyyy

火焰玫瑰肥牛煲仔飯 榮記茶餐室

鍾意煲仔飯嘅朋友應該都對呢間茶記唔陌生，佢哋最出名成日推出一啲創新嘅煲仔飯，好似之前都有出邪惡芝士煲仔飯咁。最近佢哋又出咗個火焰玫瑰肥牛煲仔飯，好濃玫瑰露酒香氣，上枱時仲會輕輕點火燒啲牛，有炙燒香味，牛肉嫩滑唔韌，而且啲牛油都滲晒入飯中，又真係幾出色！而且啱晒相機食先呀。

圖: minidance

日本鰻魚·日式煲仔飯 Nonsense  

一間主打多國菜嘅fusion cafe，除咗招牌蟹膏海鮮日式煲仔飯，日本鰻魚·日式煲仔飯都好受歡迎！鰻魚份量都幾吓，入口甘香軟滑，香甜嘅醬汁同魚油滲晒入飯到，飯焦帶有焦香同鰻魚汁嘅香甜，加埋紫菜絲真係好有驚喜。黑毛豬肋肉日式煲仔飯肥瘦平均，而且煮得好腍身，有種入口即化嘅感覺，配埋日式醬油都好夾。

圖: Gingerbunny

文: Yanica
編: Cathy.H