三月春暖花開，最啱約埋朋友家人，一齊去酒店嘆返餐豐富自助餐！唔單只有時令海鮮，仲有多國熱葷同靚靚甜品，滿足晒視覺同味蕾享受。

西班牙及泰式風味自助午餐 The Lounge  

餐廳喺2024年底完成翻新後，以全新面貌登場，三月至四月期間特別推出「西班牙及泰式風味自助午餐」，感受濃濃異國風情。西班牙美食方面有外脆內香嘅薯仔蛋餅、茄香濃郁嘅番茄燉牛肉丸，仲有色香味俱全嘅西班牙海鮮飯，鮮味十足。至於泰國菜區，大蝦冬蔭功酸辣開胃，紅咖喱鴨肉香濃惹味，再加上街頭風味十足嘅豬肉炒河，食完仲有甜美芒果糯米飯作結，回味無窮。現場仲有鐵板燒專區，專業師傅即席煎香大蝦同牛扒，亦有壽司吧、即煮麵檔同甜品專櫃，超豐富～

供應日期: 即日起至4月30日，星期一至六，中午12時至下午2時30分

Festa Italiana自助晚餐 咖啡園   

由意籍主廚Riccardo Catarsi率領團隊，帶領食客展開一場地道意式美食之旅～前菜有托斯卡納風味雜錦凍肉拼盤同芝士專區嘅意大利直送芝士；海鮮選擇一樣豐富，有波士頓龍蝦、加拿大鱈場蟹腳、大蝦、青口等，仲有特別炮製三文魚他他、劍魚薄片同八爪魚沙律！特別推介主廚家鄉招牌菜「利佛諾燉海鮮」，用龍蝦、青口同八爪魚配搭番茄、紅酒同香草慢煮，滋味濃郁。熱食方面有即煮意粉、燴飯專區及即制羅馬手切薄餅，款式輪流供應。最後甜品有經典意式甜品，意大利芝士蛋糕、沙巴翁、朗姆酒蛋糕、朱古力泡芙等，為整個自助餐畫上完美句號。

供應日期: 即日起至另行通知

齋月祝福盛宴 Café Kool 

呢間酒店一向致力為唔同文化背景嘅食客提供貼心服務，今年特別舉辦「齋月祝福盛宴」清真美食推廣，為齋戒後嘅穆斯林賓客帶來一場結合傳統文化同精緻餐飲嘅自助晚餐體驗。精選多款中東、北非、東南亞，以及中華特色清真菜式，包括慢燒四小時至入味濃郁嘅燒羊腿配布里亞尼飯、垂直旋轉烤爐即烤嘅土耳其旋轉雞烤肉、具濃厚街頭風味嘅馬來西亞咖喱牛肉蛋三文治等。更供應特別炮製嘅蘭州牛肉麵、多款穆斯林友善粵式點心，如水晶蝦餃、雞肉包、荷葉蒸海鮮等，糅合傳統同創新，令本地食客同穆斯林朋友都可以細味多元文化交融嘅飲食樂趣～

供應日期: 即日起至3月30日，下午6時至9時30分

Ciro d’Italia非凡美食之旅 港畔餐廳

呢間同樣係意式美食為主題，以意大利三大單車賽之一「環意單車賽」為靈感，將意大利南北各地嘅家常菜同特色風味帶到香港。美食包括來自拿坡里街頭嘅番茄燉蛋、即席拌入巴馬臣芝士輪嘅薯仔意粉，或外脆內煙韌、鋪滿新鮮水牛芝士同羅勒嘅拿坡里瑪格麗特薄餅，都充分展現食材本身嘅魅力，同時帶來最地道嘅意式風情。甜品方面有提拉米蘇、西西里奶酪卷、意大利泡芙等，仲並特別推出為婦女節而設嘅含羞草蛋糕，令食客恍如置身意大利一樣。

供應日期: 即日起至4月6日

琴師現場表演自助午餐 雅苑座

呢間酒店嘅自助餐可以喺110尺高嘅室內花園享用，坐喺種滿花草同設有噴泉嘅園林雅座，品嚐午市自助餐特別有feel。頭盤主打凍海鮮、即切魚生、壽司、自選沙律同各式冷盤，選擇相當豐富！熱盤同樣出色，提供即製日式爐端燒同海鮮，師傅現場即點即做，保證新鮮。甜品係呢度嘅招牌，包括帝苑馳名鮮果拿破崙、蝴蝶酥、意大利芝士餅等，絕對值得留肚一試！逢星期二至星期日嘅首輪自助午餐時段（下午12時45分至1時45分），更有琴師現場演奏同獻唱生日歌，氣氛一流～

供應日期: 即日起至4月30日

文：Yanica、Sharon
編：Cathy