2025端午糉最後召集！無論係自用或送禮，親民價或矜貴口味都有得揀～
手作江蘇鮑魚鹹糉 江蘇銘悅 
手作江蘇鮑魚鹹糉」沿襲江南嘉湖糉嘅做法，先以秘製上海豉油同老抽醃製泰國糯米，令蒸煮後嘅糯米呈油潤焦糖色，散發濃郁鹹香；餡料加入原隻12頭南非鮑魚、已醃製嘅三層五花腩、濃郁嘅金黃色蛋黃同埋軟糯香甜嘅栗子，入口黏糯鮮味。
端午豐盛糭套裝 一粥麵
價錢又大眾化、咩口味都有嘅端午糭套裝～一套有齊金華火腿糭、五香鹹肉糭、黑糯米豆沙糭同埋蓮蓉鹼水糭，鹹甜味道各兩款，其中黑糯米豆沙糭帶淡淡桂花香。最重要係品牌有幾十間分店，係快手準備之選。
素食養生珍珠如意糭 翠亨邨
有50年歷史嘅翠亨邨今年新出素糭「養生珍珠如意糭」，特別選用日本珍珠米代替傳統糯米，較容易消化，同時搭配榆耳、黃耳、高纖十穀米、栗子、花菇等多種滋補養生又健康嘅食材，食落充滿蔬菜嘅清甜滋味。另外亦有原創黃金柑桔鹼水糭、特級元貝八寶裹蒸糭、金腿花生鹹肉糭等經典選擇。
餐廳特別供應端午糉至6月8日之外，自取或堂食都得㗎！精緻名貴嘅鮑魚極品糉包裹著原隻鮑魚、魚翅、元貝、蝦米、冬菇等上乘配料，飽滿厚實。另一款福果芋泥鹼水糉則展現潮州菜系嘅經典滋味，新鮮製作嘅香甜芋泥搭配福果，綿密有咬口，風味亦有別傳統廉東糉啊。
二十五年菜脯有機腩肉糉 茗悅
福建糉都可以加入創意？「迷你二十五年菜脯有機腩肉糉」加入熟成25年嘅陳年老菜脯喺傳統豬腩肉糉之中，讓陳香清幽嘅蘿蔔甜香味平衡肉粽嘅油膩感。另外以健康為提嘅「迷你茗悅香糉嚐味禮盒」就主打迷你養生紫米素肉糉，唔同口味分別以素肉、黑糯米、黑芝麻製作，送禮自用都夠特別～
榴槤/創新中式口味 IKEA
今年IKEA持續創新，推出三款自家製特色糉，其中D197貓山王榴槤水晶糉由馬來西亞直送D197貓山王榴槤，入口香甜軟糯；而川味臘肉蛋黃肉丸糉、梅菜粟米素肉丸素糉就係充滿新意嘅中式口味。
文：Cathy
