喺旺角呢個掃街熱點，最近多咗間粉紅色主調嘅飲品店。以為又係珍珠奶茶？仔細見到一格格擺滿唔同朱古力Bar，原來係主打唔同口味嘅朱古力奶昔，口味總共有成20款咁多！想Light啲亦有爆珠益力多沙冰，仲可以按口味加唔同Toppings，搭配出你嘅專屬口味。
 

Shake Shake Shake供應嘅飲品主要分為朱古力棒沙冰、鮮果x朱古力沙冰，同爆珠益力多沙冰三類。其中一位店主平時鍾意去旅行，見到唔同種類嘅朱古力，就想將佢地帶嚟香港，變成大家手上唔同口味嘅Milkshake。
 

繽紛樂朱古力棒沙冰（$38）

朱古力Bar口味有16款，包括大家見慣嘅金莎、麥提莎，細細個最愛嘅聰明豆、積及Club橙餅等等。最受歡迎口味之一係繽紛樂，用半條繽紛樂加明治牛奶、Nutella醬、黑朱古力醬等加冰打成沙冰狀嘅Milkshake。
 

上面再加榛子味忌廉、朱古力威化碎同半條繽紛樂，飲落朱古力嘅香味相當香濃，得意嘅係真係飲到繽紛樂嘅威化味同榛子醬香味！好似飲緊杯沙冰版嘅繽紛樂咁。撈埋忌廉一齊飲更柔滑，而且飲完唔會覺得太甜太膩。
 

香蕉朱豬（香蕉朱古力沙冰）（$35）

鮮果x朱古力就有4款口味，最夾嘅當然係老拍檔香蕉啦！用新鮮香蕉、香蕉果蓉、黑朱古力醬、明治牛奶加冰即叫即打。杯邊用朱古力醬畫花紋，最後唧上焦糖味忌廉同加朱古力同香蕉片，打卡特別搶眼呀。
 

香蕉同朱古力味道都好Rich， 香蕉嘅香味同朱古力嘅甜味都平衡得好好。最開心嘅時候係飲到細細碎碎嘅沙冰裡面有少少Creamy嘅香蕉果肉，特別香甜！
 

 

士多啤梨多多（士多啤梨爆珠益力多沙冰）（$28）

唔飲朱古力，呢度都有鮮果益力多沙冰可以滿足你。沙冰用兩支益力多、新鮮士多啤梨、士多啤梨果蓉等加冰打成。之後再加有爆汁效果嘅爆珠喺面，粉紅色感覺好少女。
 

有無留意到店家通常都用新鮮水果加果蓉打沙冰？原來佢地唔想用太多人工糖漿或人造色素，所以就用新鮮水果帶出香味同顏色，再加果蓉增加味道同口感。呢杯士多啤梨益力多沙冰飲落酸酸甜甜咁，仲有少少果籽同爆珠增加口感層次，非常討喜。
 

霹靂朱古力脆脆（配料每款+$3）

其實每款飲品上面都有唔少Toppings，但自問貪心嘅話，呢度亦有12款配料畀大家任加！煙韌控可以加麻糬，朱古力控就有朱古力粒、M&M's、布朗尼等任揀。呢款霹靂朱古力脆脆坊間少見，入口雖然唔會好似爆炸糖咁誇張，但的確喺口腔又有少少Popping口感，都幾特別。
 

店中間仲有個餅櫃，原來係同Instagram網店合作！每個月都會有一間網店寄賣佢地嘅嘢食，等客人多個選擇之餘，網店又多個宣傳渠道，係有計嘅。品牌先以旺角做試點，反應好嘅話仲話唔排除去港島開分店，各位朱古力控係時間去支持下啦！
 

Shake Shake Shake
旺角廣華街1號仁安大廈地下14D號舖

文、相、片：Cathy