整個2月份，大家都少咗出街食飯。不過呢10間餐廳仍然人氣高企，力抗「疫」巿！當中有唔少都係新開業冇耐嘅過江龍，又或者係默默努力嘅小店！
第10位 當文歷餅店（*新上榜）
圖：guinevereee、Katrina_HK Foodie
大家期待咗好耐嘅紐約人氣甜品店，今年1月抵港，短短1個月已經火速打入十強榜，足證大家對佢嘅愛戴程度。佢哋嘅甜品內外兼備，創意十足，嚟到香港仲有幾款特定為香港設計嘅特色甜品，好似菠蘿油、檸茶蛋糕等等。當然唔少得佢哋招牌DKA，外脆內酥，必試。
第9位 ChaTraMue
圖：連續兩個月打入十大嘅70年歷史泰國茶葉品牌，上個月凍凍地，去到最啱就係飲返杯熱辣辣嘅正宗泰國熱薑奶茶，薑味特重，奶茶甜身，飲完當堂暖晒。平時飲開珍珠奶茶嘅朋友，可試泰國班蘭珍珠抹茶鮮奶，啲珍珠由泰國入口，以新鮮班蘭葉製，仲有陣陣清香添。
第8位 天 · 悠蔬食 
圖：近排大家出街食嘢都健康咗，荃灣呢間童話風素食餐廳更連續兩個月留守十強位置，除咗鰻魚好吸引之外，大啡菇鮮豆包栗子紫薯焗千層闊麵亦唔輸蝕，鹹鹹地甜甜地，蕃薯軟腍。而家幫襯，仲會送抗疫潤肺蘋果雪梨海底椰南北杏燉雪耳糖水添！
第7位 Lex Coffee
圖：結合藝術同美食嘅餐廳，特別受愛打卡嘅朋友歡迎。咖啡又好朱古力又好，都可以做到藝術打印，想要咩圖案都印到落去，好鬼靚，層cream仲好rich添。上個月個tea set又係靚到一個點，用滑板放上多款甜品，完全滿足晒視覺。
第6位 大渣哥茶記（*新上榜）
圖：最近好多餐廳嘅生意都大受影響，但偏偏呢間由篤魚蛋起家，喺九龍灣新開業茶記，就日日都大排長龍。餐牌上嘅菜名都花過心思，好似有歡樂今宵早餐、襟撈任砌等等。幾乎枱枱都會叫嘅黑牛黑麵，即係沙嗲牛肉麵，沙嗲幾香。不過亦有唔少食客認為價錢略貴。
第5位 Wingman（*新上榜）
圖：呢間雞翼專門店擺明為雞翼控而設，黑芝麻蜂蜜海鮮、泰式甜辣醬、咖啡香味、新加坡辣蟹味等多款口味嘅雞翼，全部都皮脆多汁，最勁嗰隻應該係死神醬味，辣到呢，自問食得辣嗰啲自己去挑個機。餐廳仲首創咗雞翼雞煲，又幾有諗頭喎。
第4位 Micasadeco & Cafe Hong Kong（*新上榜）
圖：香港人對班戟嘅熱愛一直冇減退過，呢間嚟自日本嘅班戟店，上年年底先開業，話咁快就上到第4位。主打嘅係招牌香軟ricotta芝士梳乎厘班戟，記住要三層一齊咁食，口感好鬆軟，蛋香十足，粒粒ricotta芝士亦正常發揮，微微鹹香。
第3位 Mamaday
圖：又一間疫巿突圍而出嘅餐廳，晚晚都依然係爆滿。餐廳裝修同餐牌設計都充滿玩味，碟碟菜式嘅名都好長，推介有蟹膏又有蟹肉的蟹蟹蟹意大利扁麵，淨係見到個名咁多個蟹字就知豐富，蟹味十足。Pizza嚟講，亦係坊間少見嘅配搭，例如鹹蛋牛油果蟹肉同蒜蓉虎蝦等款式都相當受歡迎。
第2位 Amitie Kitchen（*新上榜） 
圖：呢間位於尖沙咀嘅意大利餐廳，款款菜式都好吸引，好似火炙海膽芝士焗松蟹膏大啡菇咁，普普通通一件大啡菇畀佢加咗咁多靚料上去，仲要夾喎，係出色嘅。鮮甜海膽經火槍微燒過，連埋半溶芝士、香濃蟹膏、多汁大啡菇一啖咁食，係享受呀。btw，上個月餐廳仲好落力咁幫大家網購消毒搓手液，難怪咁多人捧場呀！
優惠券：正價7折: 主菜餐牌
優惠券：正價8折: 主菜餐牌
優惠券：正價8折: 主菜餐牌
第1位 頑固壽司（*新上榜）
圖：首次上榜就榮登榜首嘅係嚟自日本嘅親民迴轉壽司，但價錢親民唔代表質素就要退讓喎，佢哋嘅刺身每日新鮮由九州運返嚟，件件壽司都係師傅即場手握，送到上枱時仲可以感受到飯嘅微溫。鍾意嘅叫返個12件壽司拼盤，有鰤魚、三文魚子，帆立貝、甜蝦海膽，大拖羅等等，件件誠意！
文：Kar
