年尾嘅十強榜，百花齊放，既有星馬菜系，亦有西、日美式；有情調餐廳、寵物友善餐廳，亦有快餐甚至food court都有！唔講咁多，即睇十強：
第10位 蘇山雞飯（*新上榜）
圖：位於長沙灣嘅星馬菜餐廳，人氣高企，想食可能都要排下隊，但佢哋嘅海南雞、肉骨茶等菜式做得幾有水準，又足料，都值得排下嘅。以文昌雞製作海南雞，皮薄肉厚，又夠嫩滑。油飯以香茅炒香，加埋雞油精華，啖啖都有油香。叻沙摻摻都落足本，星洲龍蝦大大隻，肉質爽彈，湯底椰香十足。
第9位 Proton（*新上榜） 
圖：好多「奴才」都鍾意呢間灰色工業風餐廳，帶埋主子嚟用餐打卡，絕對係放假嘅態度。推介龍蝦、 虎蝦、蝦頭油、蝦子手打意大利麵，睇個名就知道有幾架勢了。中西合璧，各種蝦嘅食材搭埋一齊，一個字，鮮。手打意大利麵質較煙韌，索滿蝦汁鮮香味。另外，脆卜卜嘅炸雞配蜜糖芥末醬都係人氣嘅選擇。
第8位 Vision 8 
圖：環境、情調唔錯嘅荃灣西餐廳，就算唔係嚟慶祝特別日子都好有feel。最多人嗌嘅應該係蘋果木燒西班牙黑毛豬鞍扒 ，激厚切，但又唔會好韌，切開仲有肉汁，而且帶有炭燒蘋果木嘅香氣，外皮又有微微焦，係幾唔錯。肉食獸亦可以揀烤美國極佳級肩胛牛扒，肉質呈嫩紅色，肉味濃郁。
優惠券：十二月份生日免費獲紅酒或白酒一枝
第7位 Coti the Bistro（*新上榜）
圖：呢間餐廳嘅咖啡幾出名，嚟到記得要試下。佢哋有好多款選擇，口味仲好特別下，會將甜品融入咖啡中，例如有焦糖布甸咖啡、Tiramisu咖啡、天然蜂巢咖啡等。棉花糖朱古力亦好啱打卡。食物方面可試煎慢煮西冷配薯條及沙律 ，肉質嫩腍juicy。
第6位 為食火鍋公司
圖：曾喺9月衝到上榜首嘅任食火鍋雞煲店，隔咗一個月再度上榜。一入場就有鮑魚食，雞煲又加入自家秘製醬處理，仲有款式多多又鮮味十足嘅海鮮拼盤，各樣配套同質素都保持得唔錯，人氣就當然繼續上升啦。而且呢度雞煲同火鍋係分開兩個煲，食完雞煲可以再另外揀過邊爐湯底，減低油膩感。
第5位 Boy n Burger
圖：呢間人氣burger，一開店已經引嚟大眾關注，連續第二個月上榜。主打牛、魚、雞肉嘅burger，雖然價錢親民，但選料一樣嚴謹，食得出質素。Fish burger魚柳厚肉香脆，bobby burger係手打雙層牛肉，肉味濃郁，口感柔嫩，性價比高。
第4位 惠（*新上榜）
圖：20foodhk
Omakase今年好hit，愈開愈多間，能夠喺眾多同業中突圍而出嘅，點都有返兩道板斧。灣仔呢間Omakase有日本當地買手協助參與魚巿場競標，得盡各地新鮮時令且珍貴嘅食材，又真係唔係間間都做到嘅，午巿壽司十二貫大約$500，伊佐木壽司肉質柔軟；深海池魚壽司口感清爽，兩者嘅魚香都非常突出，鮮甜嘅赤海膽更係吸睛之作呢。
第3位 富山麵家
圖：2013年登陸香港嘅日本過江龍拉麵店，當年一開冇耐就上十強榜。今次可能因為搖身一變成為My Melody期間限定店，人氣大升，而再度上榜。餐廳主打黑醬油湯底拉麵，以秘製鮮魚醬加豬骨、鰹魚片、蔬菜等熬煮五個鐘，既有魚鮮亦有肉香同菜甜，層次豐富。黃金蟹膏牛奶拉麵，亦係大眾飛佛，蟹膏香濃。
第2位 杏甜品
圖：繼續留守十強榜嘅甜品舖，以杏仁為主題，選用美國大龍杏，堅持每日新鮮現磨同埋打造微糖甜品。餐牌主要有三大系列包括杏仁、鮮果爽冰同吸吸系列特飲，另外有其他傳統/創新甜品。杏仁香味極濃嘅杏仁茶同杏仁燉蛋，非常滑口，不過每日限量供應，想試要早啲去。爽冰都係人手製作，重點係仲要加入新鮮生果，啖啖果肉，好似一碗龍眼爽冰就有成30粒龍眼咁滯！
第1位 The Big Things Noodles（*新上榜）
圖：唔好以為food court就冇好嘢，而家嘅美食廣場愈嚟愈高汁，而11月嘅榜首位置，更係一間位於food court 內嘅麵食店。餐廳供應特色烏冬同麵食，最多人嗌係北海道海膽稻庭烏冬，以北海道海膽同忌廉製成醬汁，烏冬又掛汁喎，啖啖都係濃郁海膽鮮香，仲夾有三文魚子𠻹。另外日式櫻花蝦擔擔麵都好有驚喜，值得一試。
文：Kar
