呢間剛剛開幕冇耐嘅五星級新酒店屬於香格里拉酒店集團，位於黃埔海濱，設計到好似resort咁，座擁180度無敵海景，係靚嘅！不過開飯仔最關心都係酒店有咩好食，中菜館紅糖主打粵菜，隔離有個景觀一流嘅露天酒吧，而全日餐廳就未裝修好，冇咁快開張。大家最有興趣肯定都係自助餐啦，一於行一圈，睇吓晚餐buffet得唔得先！
自助餐通常都係以地方區分，好似西式、日式唔同station，呢度係以烹調技巧分成7個站，都幾特別！而家暫時未有特別主題，都係主打環球美食。每一個站都係開放式廚房，有駐場廚師即席製作，放出來嘅食物都唔多，密密refill保持新鮮及熱度。
一入門口第一站係The Nook，有麵包、火腿、五款芝士、肝醬、凍肉等，有意大利巴馬火腿同即切西班牙火腿兩款，梗係揀西班牙啦。
對面係冰鎮美食亭，有凍海鮮、刺身壽司、沙律吧等冷盤。海鮮雖然冇生蠔，不過就有半隻波士頓龍蝦同蟹腳，亦有蝦、翡翠螺、青口同蜆，用嘅係可持續發展嘅環保海鮮。
同一個counter仲有即製韓式石頭飯，可以自選泡菜、人參蝦、蔬菜等配料，放入熱辣辣嘅鍋入面，一人一鍋，熱辣辣架！
行入少少竟然先來甜品區，一口一件嘅糕餅全部放入餅櫃入面，夠晒衛生。由法籍甜品廚炮製，賣相精緻，必吃白朱古力柚子蛋糕同開心果法式泡芙。
雪糕有i-scream gelato同埋分子雪糕兩種，有著住工作服嘅師傅喺「實驗室」入面，表演用液態氮製雪糕，煙霧彌漫都幾震撼！口味每次都唔同架，仲可以加唔同toppings。
第三站嚟到國際燒烤區，有師傅密密燒嘅串燒同埋燒肉，採訪當日有燒龍蝦，比起凍海鮮更加香口惹味！另有燒牛肉、乳豬等輪流供應。
之後就係鑊炒佳餚亭，即小炒及炸物區，有中式小菜、天婦羅等等，師傅即席拋鑊，火光熊熊，完全feel到嗰陣鑊氣！
燉煮砂鍋亭有十幾款熱辣辣煲仔菜，除咗中式煲仔飯，亦有印度咖喱、慢煮牛尾等唔同國家菜式，用瓦煲保溫，而且細細煲，一食完就會再refill唔會擺到乾晒。
最後係麵、湯及點心區，不時會有師傅喺客人面前即拉拉麵，仲有大量配菜同三款湯底任揀。另有自家製餃子、點心及燉湯。
餐廳環境對住開揚海景，而且有露天位，唔介意出出入入趁而家唔係咁熱都幾爽！座位都幾多，但而家平日暫時未算好爆，都可以舒舒服服口咁拎食物。
自助午餐價錢：(星期一至五) 成人$328，(星期六及日) 成人$388
自助晚餐價錢：成人$598
7-11歲小童半價
文、相、片：Perrins