中環呢間法式地中海菜嘅新餐廳，店名取⾃盛產頂級魚⼦醬嘅鱘⿂，顧名思義呢度主打名貴嘅魚子醬同特色香檳，當中包括帶鮮明海水鹹香味嘅法國⿂⼦醬Caviar Français。除此之外，以香檳入饌亦係呢度另一個特色。餐廳特別請嚟擅長線條類型畫作嘅本地藝術家Yannes，繪製多幅同餐廳主題相關嘅作品，讓大家好似置身於畫廊之中，並以唔同形式了解魚子醬同香檳。

前菜

金屬餐具會影響蠔嘅味道，所以品嚐日本生蠔配香檳及魚子醬（$198）會配專用嘅貝殼匙羹

而家天氣熱辣辣，以呢2道特色冷盤做開胃前菜就啱晒喇。首先係日本生蠔配香檳及魚子醬，餐廳選用來自日本沿海水域嘅時令生蠔，大隻又飽滿。蠔肉先輕輕灼過，再浸喺凍香檳忌廉雞湯中，香氣獨特之餘，亦令生蠔保持喺2-3°C之間，口感爽滑；連埋法國魚子醬一齊食，鹹鮮味更突出。

香檳啫喱溫泉流心蛋（$258）因受時尚名人Christian Dior青睞，英文名為Oeuf Christian Dior

另一款冷盤係香檳啫喱溫泉流心蛋，外層嘅啫喱其實係用雞肉熬煮約1個鐘製成嘅雞清湯，再加香檳而成，鮮味又帶點酒香；出菜前再放上魚子醬、啫喱碎同鮮艷嘅食用花作點綴。呢道菜擺盤精緻，再捕捉切開流心蛋時嘅爆汁效果，好啱打卡。

主菜

香煎法式油封鴨腿（$288）

講到法國菜又點少得香煎法式油封鴨腿呢？！餐廳選用當地嘅鴨腿，先用鹽醃1日，再加入油同香草慢煮12個鐘，然後煎至金黃色，令外皮香脆，肉質鬆軟，切開時肉呈現「一絲絲」嘅效果。而配菜有幼滑嘅法式薯蓉外，鴨腿下重墊有泡菜，一齊食可以減輕油膩感，蘸埋鹹度適中嘅紅酒燒汁，令呢道fusion菜味道層次更豐富。

法國紙包海鱸魚（$338）

想輕盈啲嘅話，法國紙包海鱸魚係唔錯嘅選擇。智利海鱸魚係油性魚，口感嫩滑，厚切更加畀人啖啖肉嘅感覺。配搭嘅海鮮汁製作需時，要先將波士頓龍蝦炒香，再加入蝦、蜆、魚等材料熬煮幾個鐘，入口酸甜開胃。而用法國耐高溫玻璃紙包住呈上，除咗可以保存食物香氣，亦令魚肉加倍吸收海鮮汁嘅味道，再以燈籠椒同豆角為配菜，係一道色香味俱全嘅料理。

甜品

北海道牛奶雪糕配香檳及魚子醬（$188/支）

夏天食甜品當然要食雪糕啦！餅乾脆筒內，先放入清新嘅香檳啫喱做基底，而呢款啫喱冇加入雞清湯，香檳味道較突出；然後加入自家製北海道牛奶軟雪糕，以及略帶海鹽味嘅魚子醬。食落先有鹹甜交融嘅味道，後有香檳淡雅嘅芬香。

特色香檳

最右邊嘅香檳來自法國特級葡萄園區

既然香檳係餐廳嘅主題之一，酒單當然提供多款香檳畀大家挑選啦。呢度嘅香檳都用3⼤葡萄品種釀造，包括⽩葡萄Chardonnay同Pinot Noir，以及⿊葡萄Pinot Meunier，而其中值得一試嘅香檳包括以下3款：

1)  Laurent-Perrier, La Cuvée, NV（圖左）：呢款香檳係干爽風格，體現出清脆、優雅、細膩嘅感覺，入口清新怡人，最適合配搭用魚類、家禽類同白肉製作嘅菜餚。

2) Vilmart et Cie Grande Reserve Premier Cru Brut（圖中）：最佳酒溫度介乎10°至15°C之間，比一般香檳略⾼少少。氣泡綿密細緻，先有香梨同⾞厘⼦嘅清新果香，緊接嘅後調則有淡淡餅乾麥香同奶油味道，香氣圓潤且酸度啱啱好。

3) Maison Mumm RSRV Blanc de Noirs Grand Cru Vintage 2012（圖右）：法國北部蘭斯山有5大特級葡萄園區，而呢款酒就產自其中一個園區，用100% Pinot Noir葡萄釀製，加上唔係每年定期推出下一批酒，所以特別珍貴。

香檳酒櫃設於VIP房，內裡嘅畫作則帶出飲香檳嘅輕鬆氣氛

點解天花都有畫？皆因店主想大家仰頭暢飲時，都畀畫作包圍

畫作更介紹釀造香檳所用嘅葡萄品種，以及3種享用魚子醬嘅方式，而其中1種就係放喺手上直接食用（圖右）

餐廳採用玻璃窗設計，陽光感十足

HUSO 
地址: 中環皇后大道中74號石板街酒店1樓2號舖

*新張優惠：即日起至2022年8月10日，每日頭10位訂座客人，2位送香檳2杯，4位則送香檳1瓶。