草地滾球畀人嘅印象，好多時都係看似輕鬆、瞄準目標碌個波出去，係一項比較多老人家會玩嘅運動。但原來「碌波」都有好大嘅技巧，更蘊藏人生哲理，而且絕對唔係只得老人家玩。兩位前港隊成員為咗解大家嘅迷思，同希望可以推廣呢項運動畀更多人認識，早於一年前就開設咗全港首間滾球運動主題餐廳，最近更增設埋寵物友善區，以及邀得前五星級酒店大廚坐陣！

新增寵物友善區 

  (左) Dorothy、 (右) Vivian｜餐廳主理人及前草地滾球港隊成員

兩位主理人Dorothy同Vivian都係資深嘅草地滾球運動員，佢哋均認為草地滾球係一個Social Game活動。喺過往嘅運動、比賽後，佢哋都好鍾意同隊友聚返埋一齊講下波經、飲下酒之類，而Vivian更曾經從事過餐飲業，所以就順理成章，開設咗呢間餐廳，連室內草地滾球場地，「令到球員打完波後都可以enjoy返佢哋嘅social life，喺度飲杯酒，傾下偈，過下日辰。」

餐廳佔地合共二萬四千呎，咁大地方，當然要好好善用啦。另外亦設有飛鏢區、健身區、泰拳區等主題區域，而最新則增設埋寵物友善區，並有寵物鮮食、寵物蛋撻等pets menu供應，客人可以帶埋毛孩們到訪。Vivian表示希望大家可以全家一齊enjoy：「寵物都係我哋家庭嘅一部分。我哋希望喺一個環境入面，所有人都可以帶晒佢成個family嚟到，不論係玩草地滾球係輕鬆吖，或者係去做運動，一啲較為劇烈、激烈嘅運動都做到。」而Dorothy本身自己都養咗4隻狗7隻貓，對於寵物需要絕對了解。

前五星級酒店大廚坐陣

餐廳正正位草地滾球場隔籬，可以邊食邊睇人打波。以供應西餐為主，款式唔算好多，但價錢合理，特別推介慢煮62度醬燒牛肋骨。大廚選用美國安格斯牛柳扒，以62度低溫慢煮近6個鐘頭，肉質軟嫩之餘更可保留大量肉汁，配埋香甜嘅燒烤醬，啖啖肉好滿足。

Dorothy私心推介兄弟洋蔥湯，單睇賣相造型已經好吸引，以滿瀉嘅焗芝士蓋住湯品。成個湯嘅味道都好濃郁，陣陣甜香。原來係以牛骨熬製，再混合咗4款芝士同5款蔥製作，包括白洋蔥、乾蔥、青蔥同紅洋蔥等，入面仲有浸住湯嘅麵包，索晒啲湯汁精華！

至於Vivian則最鍾意烏魚子卡邦尼墨魚汁扁意粉。坊間好多墨魚汁意粉食完都會食到成個嘴黑麻麻、烏卒卒，但呢度就唔會喇。Vivian解釋因為師傅選用烏賊魚子製作，更特意一早將墨魚汁加入扁意粉中，而唔係最尾先淋喺面呢。意粉口感煙韌，不過墨魚汁嘅味道就唔算太濃。

玩草地滾球領悟人生

草地滾球玩法簡單，只要大家碌出去嘅球最接近目標球就可以得分，既可以係個人運動，亦可以係團體運動。不過其實都好考技巧架。Dorothy介紹時提及：「佢特別嘅地方係因為佢個波會轉彎，由於佢係偏重心設計，所以控制呢個波嘅線路就係靠你嘅力度同角度……所以佢要好講一啲策略，或者團體嘅合作嚟到達成個目標。」

講到團隊合作，Vivian話從中學到好多嘢，例如學習溝通、要喺適當嘅位置做適當嘅嘢：「除咗打波之外，都會係一啲人生嘅hints，即係點樣做人，點樣待人接物。」的確，運動如人生，要堅持、要分工。「打比賽有時落後緊，我哋都要繼續努力，繼續嘗試，唔可以咁快放棄，要好專注，直至打到最後一球先至知道勝負。呢份堅持喺做生意或者營運入面都一樣。」Vivian則認為比賽同做餐廳都好相似——分工好重要。「每一個位置要做嘅職責都唔同。純粹靠近（目標球）、或者喺後排保住個局，唔同崗位都有自己嘅責任。做餐廳就係你點樣令到一堆人一齊做得更加好，用到大家嘅強項。」

兩人都不約而同表示，「我哋都好希望借呢個機會，可以令大家接觸呢項喺我哋生命之中好重要，同埋我哋好想分享嘅一個運動。而點解我哋咁想分享，就係正正因為喺呢個運動，或者咁多年嘅比賽入面，對我哋嘅人生成長，得到好多幫助。而呢樣嘢，雖然我哋係前港隊，但我以前從來都冇去諗過，都話試兩日就已經去玩比賽。其實每一個人都有機會去做到同一樣嘢，只不過係大家願唔願意去試。」

 健身區及泰拳區

 草地滾球區及飛鏢區

對大部分人嚟講，平時好似冇乜機會接觸草地滾球呢種運動。Dorothy表示自己最初係咁啱喺個體驗活動中首次試玩後，就即刻畀嗰間球會招攬幫手打聯賽，「所以基本上我一試玩完就即刻有得打聯賽，咁就一直去到而家。」Vivian則係行過、路過草地滾球場，咁就同屋企人一齊玩，開始咗呢個旅程。而家呢間餐廳，就正正係一個機會，畀普羅大眾都可以好容易咁體驗到草地滾球，食個飯睇下人打波，甚至乎參加體驗班。

八號草   
地址: 美孚百老匯街77號美孚新邨四期商場保齡中心1樓

文：Kar
相：Sunny
片：Wilfred