近年香港嘅咖啡店愈開愈多，通常都主打西式、日式或文青風，想有啲新鮮感，有時去吓其他風格嘅都唔錯！上環最近就新開咗一間走傳統美式風格嘅咖啡店，由漢堡名店Burger Joys負責人Manu開設，餐廳座落於上環新街，有種遠離煩囂嘅感覺，裝潢都好有美國Style，牆上掛滿爵士樂歌手照片。食物方面主打美國傳統美食，好似香港較罕見嘅Detroit style pizza！
Detroit style pizza – pepperoni（$160）
於美國底特律一款歷史悠久嘅薄餅，由於Manu於美國讀書，見香港無咩餐廳有做，所以就決定自己製作喇～Detroit style pizza特色在於呈正方形，加入4倍芝士、辣肉腸及番茄醬，烤焗時芝士同辣肉腸嘅脂肪會流到餅皮四邊，所以會比較香脆，非常惹味。
Cabonara Pizza（$110）
流心蛋卡邦尼薄餅加入煙肉、巴馬臣芝士及白汁，最後放入流心蛋烤焗，一入口係煙肉鹹香及蛋香。
CCC Patty melt（$120）
Patty melt其實就係漢堡嘅前身，用白方包取替漢堡皮，口感香脆。餡料用咗手打安格斯牛肉，先將牛肉煎至medium well，再加入Mozzarella cheese及紅酒焦糖紅洋葱，味道香濃之餘成個包感覺唔會太Heavy。
Creamy pesto pasta with grilled chicken（$110）
至於意粉都幾有特色，好似呢味羅勒青醬照燒雞肉意粉，羅勒青醬自家製成，味道清新，配上日式照燒雞肉又幾有驚喜。
咖啡選用本地自家烘焙豆，入口香濃。
地址: 上環新街15-17號偉裕樓地下B號舖
文: Yanica
相: Tom Li