有咩開心得過喺靚靚cafe chill住嘆brunch！今期搜羅咗幾間人氣咖啡店畀大家，有興趣記得bookmark～
必食Ricotta Toast Fineprint
圖：BaoSaiLa
呢間人氣cafe喺香港多個地區都有分店，超方便！環境簡約時尚，主打優質手工咖啡同輕食，最受歡迎嘅Ricotta Toast，用香脆Sourdough做底，上面鋪滿自家製Ricotta芝士，質感creamy細滑，再加上蜂蜜、百里香同藍莓作點綴，微甜中帶少少酸香，味道平衡得啱啱好，每啖都充滿層次感。想試簡單輕盈款式，Ultimo Eggs亦係唔錯選擇，將炒蛋同香蔥鋪滿toast上，簡單卻帶出濃濃蛋香～
高質純素cafe WANAKA
圖：呢間係知名素食品牌素年嘅姊妹店，以全素料理為主打，採用本地有機蔬菜，堅持用最天然健康嘅食材，炮製出色彩繽紛又打卡一流嘅素食料理。夏日三文魚芒果壽司配本地有機秋葵係店內人氣之選，壽司內餡超豐富，配料包括牛蒡、甘荀、蘿蔔漬、紫椰菜、堅果、枝豆同埋清甜嘅芒果；最大驚喜就係用蒟蒻製成嘅「素三文魚」，口感細膩到以假亂真，配埋本地有機秋葵同自家製純素千島醬，每一啖都好清甜味。另有本地有機莧菜青醬田園千層麵、本地有機南瓜野菌牛油果藍莓酸種Bagel全日早餐都值得一試。
淺水灣度假風咖啡店 Parabolica Caffe
圖：joyceclt
餐廳環境優雅，最正就係大玻璃窗設計，可以望住戶外庭園同噴水池嘆杯咖啡，打卡一流！Crabmeat Toast絕對係打卡同味道兼備嘅選擇，面層鋪滿鮮甜多汁嘅蟹肉，煙煙韌韌嘅酸種麵包烘到外脆內軟，散發天然麵包香；鍾意濃郁口感嘅話，可以試埋Peanut Butter Hotcake，花生醬帶有淡淡焦糖香，配上楓糖漿更加惹味，每一口都充滿濃郁堅果香氣。The English Muffin亦係人氣之選，麵包、士多啤梨果醬同叉燒都係自家製，味道鹹甜交錯，加上太陽蛋同芝士，口感豐富有層次。
焗大啡菇黑松露炒蛋漢堡 Reaction Coffee Roasters
圖：一間以自家烘焙咖啡聞名嘅精品咖啡店，唔單只有高質咖啡，仲有出色brunch選擇！呢度嘅咖啡以淺炒烘焙為主，帶有濃郁果香花香，係fruity風味愛好者嘅天堂～食物方面焗大啡菇黑松露炒蛋漢堡係必試之選，一上枱就聞到濃郁黑松露香氣，炒蛋澎湃嫩滑，加埋juicy嘅大啡菇、黑松露蛋黃醬同黑松露芝士粉，每啖都充滿黑松露風味。想食light啲可以試紅菜頭香蕉希臘乳酪，加咗蜜糖、香蕉、亞麻籽、奇亞籽同南瓜籽，清新又健康。
藍色主題歐陸風cafe Passepartout
圖：曾經喺銅鑼灣開業，憑住獨特嘅Fusion Brunch風格吸引唔少忠實粉絲，現時搬到佐敦，環境更舒適，有室內同戶外座位，悠閒嘅氛圍特別適合週末慢慢嘆返個brunch。菜式靈感嚟自世界各地，將唔同城市嘅經典風味融合，好似有紐約特色嘅自家醃製Pastrami牛肉配酸種麵包，大大片自家醃製嘅Pastrami鹹牛肉鋪喺扎實嘅薯仔沙律上，口感豐富，鹹香味適中；底層嘅酸種麵包烘得外脆內軟，加上橄欖油輕輕調味，令整體味道更提升。另外仲三文魚班尼迪蛋、北印番茄咖喱炸雞等都好有特色～
文：Yanica
編：Cathy
