有去過台北師大夜市嘅朋友，一定都有見過一個寫住燈籠滷味大黃色好吸睛嘅大招牌，呢間人氣滷味老店被台灣媒體譽為「北市第一加熱滷味」，係唔少人遊台必食！而燈籠滷味終於正式登陸銅鑼灣，係海外首間分店，香港嘅朋友最近去唔到台灣又掛住台灣味嘅，就一定要試試啦。

香港店裝修都好有心思，負責人從台灣及日本搜羅咗唔少特色裝飾，如呢個中華民國53年嘅高雄火車時間表，都好有舊時台灣風味。

講到台式滷味，同我地平時食開嘅潮式滷水唔同，台灣滷味係熱食嘅，同埋會配上肉類、豆製品及蔬菜類多種食材。呢度嘅滷汁用上台灣總店嘅祖傳滷湯，用桂皮、花椒及甘草等數十種材料製成，鮮味又帶些少回甘嘅味道。

食物選擇方面，香港店一樣都有好多食材揀，除咗有得自由配搭外，為咗方便忙碌嘅香港人，午飯時間供應三款已設計好嘅套餐，啱晒各位有選擇困難症嘅朋友！先切材料後，再將所有材料放入滷汁內滷熱，淋埋滷汁就完成。

師大人氣組合($59)

最推介係呢個師大人氣組合，負責人親自向台灣總店嗰邊問邊種食材最受歡迎，就設計出呢個人氣組合，食材包括甜不辣、豬肉片、高麗菜、杏鮑菇、花枝丸及白蘿白，有肉有菜，配埋台灣人最愛嘅王子麵就最夾。

吃你滷味套餐($56)

鐘意食傳統滷水嘅朋友就要試吓呢個套餐，食材有豬腱肉、豬耳朵、雞腎、大腸及高麗菜，配埋索盡滷汁嘅粉絲就最正。

套餐唔啱心水都可以自由配搭，似港式車仔麵玩法！唔想食澱粉淨餸都無問題，鐘意多肉少菜或多菜少肉都得㗎。另外推薦百頁豆腐、豬血糕同彈牙貢丸。

唔單止滷水，仲有埋台式小食，蘋果鹽酥雞、香脆地瓜條、起司玉米蛋餅都值得一試。台式滷肉飯係由台梗九號米製成，食得返台灣味道！

最後當然要食返個甜品，呢度嘅芋圓係由台灣九份知名芋圓店入貨，一樣夠晒台味啊！

燈籠滷味

地址: 銅鑼灣登龍街39號地下

文: Yanica

相、片: Tom Li