蟹呀蟹～終於又等到一年一度食大閘蟹嘅日子啦！怕麻煩唔想係屋企自己整嘅，出面好多中菜館都陸陸續續推出咗多款大閘蟹菜式。即刻嚟睇睇先。

北海道石狩川大閘蟹　帝京軒

呢間餐廳今年首次引入來自北海道石狩川嘅野生大閘蟹，佢嘅特點係比一般飼養嘅大閘蟹清甜同肥美。餐廳仲特別推出咗六道菜套餐，除咗清蒸大閘蟹之外，仲有松茸蟹粉燴拉絲雪燕、白松露油菌皇龍蝦球同慢煮鮑魚等菜式。一次過試哂咁多款海鮮，夠哂滿足。

「華麗蟹后．龍蝦．盛宴」
日期：即日起2017年11月30日
訂座：2622 6161

功夫湯大閘蟹宴　樂雅軒

除咗原隻食之外，呢間餐廳仲提供多款蟹粉蟹肉菜式，好似木魚蟹粉龍皇豆腐、珊瑚蟹粉海斑球、蟹粉扒翠苗同生拆蟹肉龍皇炒飯等。真係要一邊食一邊唱返句蟹全部都係蟹～配埋用花膠螺頭燉嘅功夫湯，又好味又滋補。

「功夫湯‧大閘蟹宴」
日期：即日起至2017年10月31日
訂座：2783 3286

創意蟹粉料理　萬豪中菜廳

未夠喉？呢間餐廳仲有一系列嘅蟹粉料理，好似蟹粉灌湯餃咁，混合咗蟹粉嘅灌湯餃配埋用蟹同龍蝦熬製嘅湯汁，滿口甘香。仲有蟹粉伴稻庭麵，爽口彈牙嘅稻庭麵吸收哂蟹粉精華，啖啖鮮味。另一必試仲有蟹粉焗大啡菇，面頭仲加埋芝士，非常吸引。

時令創意蟹粉美饌
日期：即日起至2017年10月31日
訂座：2810 8366

文：Crystal