終於等到你！講緊嘅係韓國人氣早餐店Isaac Toast嚟到香港啦！雖然只係快閃店，但勝在即叫即製，有三款唔同口味任揀。同層仲有另一間日式窩夫Pop-up，呢排想掃街就多個選擇啦。
 

韓國Isaac Toast

銅鑼灣Sogo B2嘅Freshmart重新裝修，引入唔少日本過江龍已經夠吸引，最近仲舉辦咗個韓風美食遊，將唔同韓國美食帶嚟香港，最吸睛嘅當然係唔少遊客去韓國必食嘅Isaac Toast啦。開飯仔第一日就準時嚟到，開店五分鐘就已經出現長長人龍！
 

另一邊店員亦準備緊吐司，今次銅鑼灣Pop-up店會供應三款口味：火腿Special 吐司、煙肉Best吐司，同港澳地區首發嘅雙重芝士薯餅吐司。不過要注意嘅係每人限買3份，每日限量1,000份。
 

火腿Special 吐司用兩塊鐵板烘過嘅金黃色麵包，夾住秘製醬汁、煎蛋、火腿、醃青瓜同椰菜絲，材料豐富配埋甜甜地嘅秘製醬汁，食完相當滿足。
 

煙肉Best吐司同火腿Special 吐司用嘅材料大同小異，主角由火腿改為煙肉同加多咗芝士，烘過嘅半溶芝士又係一個加分位。
 

而港澳首發嘅雙重芝士薯餅吐司一樣有加牛油烘熱嘅麵包，配料有烘過嘅薯餅、芝士同秘製醬汁，薯餅食落有一粒粒薯仔口感，趁熱食唔會太膩。
 

Isaac Toast Pop-Up
地址： 銅鑼灣軒尼詩道555號崇光百貨B2樓
活動日期：即日起至2017年6月20日
 

日本iWAFFLE

食完鹹嘅吐司不如食埋甜嘅窩夫？超市同時舉辦東瀛美食邂逅，參展商包括專賣比利時窩夫嘅iWAFFLE！窩夫由店員每日新鮮烤焗，窩夫麵團上面有糖粒，食落外層口感更加脆。
 

佢地嘅窩夫有多款口味，原味之外嘅都係將窩夫切半再唧入餡料，當中楓樹糖漿杏仁、紅豆士多啤梨忌廉、栗子大納言抹茶忌廉，同桃朱古力忌廉都係最近新出嘅。
 

栗子大納言抹茶忌廉食落以抹茶為主，有茶香但缺少回甘，配埋原粒栗子同紅豆，係就係有日本Feel但略嫌太甜。
 

紅豆士多啤梨忌廉賣相就最精緻，餡料以紅豆為主，士多啤梨就只有面頭一層士多啤梨乾，整體味道都係偏甜。無甜不歡又有Qouta嘅都可以嚟試試嘅。
 

iWAFFLE Pop-Up
地址： 銅鑼灣軒尼詩道555號崇光百貨B2樓
活動日期：即日起至2017年6月13日

文、片：Cathy
圖：Kar