去過韓國嘅朋友，應該都有見過呢間遍佈全國、有800幾間分店嘅連鎖果汁店JUICY，單係舊年嘅銷量估計高達 2,500 萬杯！趁住炎炎夏日，果汁店香港首間分店 Fresh Juicy Bar正式進駐中環，同韓國分店一樣，採用最新鮮嘅生果，飲品有多達40款選擇。除了多款常見果汁，仲有奶昔、咖啡、香茶同埋香港首創嘅「熱飲果汁」！

草莓拿鐵($46)

招牌飲品當然唔少得呢杯啱晒打卡用嘅草莓拿鐵，將新鮮草莓加上微量果糖及鹽打成沙冰，加上明治牛奶、滿滿忌廉及大大粒嘅草莓，外觀吸引之餘又有啖啖果肉食。

芒果草莓汁、菠蘿橙汁(M$38/XL$42)

如果鍾意酸甜口味嘅朋友，呢兩杯就啱你哋飲～芒果草莓底層係芒果汁，上層就係草莓汁，同樣啱「相機飲先」。

牛油果香蕉奶(M$42/XL$46)

牛油果係近年好多人至愛嘅Super Food，呢杯牛油果香蕉奶放入原隻牛油果，有香濃牛油果味，好足料！加埋香蕉及明治牛奶令味道更香甜、口感更奶滑，營養價值仲好豐富。

蜜瓜奶(M$42/XL$46)

蜜瓜同牛奶有幾夾就唔使講都知，呢度用上大量新鮮蜜瓜，蜜瓜味特別香～

熱西柚汁($30)、特選朱古力奶($34)

好多女士們都未必想飲凍飲，但係又想飲果汁咁點算呢，呢度就好貼心咁推出咗香港首創「熱飲果汁」系列，包括熱西柚汁、熱橙汁、熱梨汁及熱草莓香蕉。

JUICY Fresh Juice Bar

地址: 中環港鐵香港站HOK42號舖

文: Yanica

相、片: Tom Li